Read Јаҥы Кереес Марк 12 Bible Online

Марк 12 - Јаҥы Кереес bible

Марк 12

¹Иисус олорго укаа сӧслӧ айдып баштады: — Бир кижи виноград-агаш тарыйла, эбире манаган. Ондо сыскыру казып, каруулчыктыҥ баганазын тудып салган. Тарыган агажын ишчилерге табыштырып, атана берген.

²Бойыныҥ ӧйинде виноградтыҥ јиилегин ишчилердеҥ экелзин деп, олорго јалчызын ийген.

³Олор дезе јалчыны тудала, согуп, как куру јандыргандар.

⁴Олорго база ӧскӧ јалчызын ийген. Онызын да ташла бажын јара согуп, базынчыктап, божодып ийгендер.

⁵База ӧскӧзин ийген, онызын ӧлтӱрип койгондор. Кӧп ӧскӧлӧрин де согуп эмезе ӧлтӱрип тургандар.

⁶Ондо карузыган бир уулы бар болгон. «Олор уулымнаҥ уйалар» — деп айдып, эҥ калганчызында онызын да ийген.

⁷Је байагы ишчилер бой-бойына айдышкан: «Бу энчи алар уул. Оны ӧлтӱрели, энчизи бистийи болор».

⁸Оны тудуп алып, ӧлтӱреле, виноградту јердеҥ чыгара таштап ийгендер.

⁹Виноград-агаштыҥ ээзи эмди канайдар? Келип, ишчилерди ӧлӱмге берип ийер, виноградын дезе ӧскӧ улуска табыштырар.

¹⁰«Тура тудаачылар јектеп койгон таш булуҥныҥ тӧзиндеги таш болуп калды.

¹¹Бу мынайда Кайраканнаҥ болды, бис оны кайкап кӧрӧдис» дегенди Агару Бичиктеҥ кычырбаган бедигер?

¹²Иисус бис керегинде укаа сӧс айтты деп, олор билип ийдилер. Оны тудайын дейле, улустаҥ коркыдылар. Оныҥ учун Иисусты артырып, јӱре бердилер.

¹³Иисустыҥ сӧзинеҥ јик табарга, Ого кезик фарисейлерди ле Иродтыҥ улузын ийдилер.

¹⁴Олор келип, Ого айттылар: — Ӱредӱчи! Сениҥ чындыгыҥды, кижиге јакшы адым чыксын дебезиҥди билип јадыбыс. Улусты ылгабай, Кудайдыҥ јолына чын ӱредип јадыҥ. Айдарда, айт: Рим каганына калан тӧлӧӧргӧ јараар ба, эмезе јок по? Бис тӧлӧӧрис пе, эмезе тӧлӧбӧзис пе?

¹⁵Иисус дезе, олордыҥ эки јӱстӱзин билип, айтты: — Мени не ченеп туругар? Меге кӧрӧргӧ, динарий экелигер.

¹⁶Олор экелдилер. — Бу кемниҥ сӱри ле ады? — деп сурады. Олор: — Кагандыйы — дедилер.

¹⁷Айдарда, Иисус айтты: — Кагандыйын каганга беригер, Кудайдыйын дезе, Кудайга. Оныҥ берген каруузын кайкадылар.

¹⁸Мыныҥ кийнинде Иисуска ӧлгӧндӧр тирилбес дежетен саддукейлер келип, сурадылар:

¹⁹— Ӱредӱчи! Моисей биске мынайда бичип берген эди: «Кемниҥ карындажы, бала јок бойы ӧлӱп, ӱйи артып калза, оныҥ ӱйин ӧскӧ карындажы алып, оныҥ угын улалтсын».

²⁰Јети карындаш кижи болгон. Бирӱзи кижи алала, бала јокко јада калган.

²¹Тул ӱй кижини экинчизи алып, бала артырбай, јада калган. Ӱчинчизи анайып ок.

²²Оны јетилези алып, бала артырбагандар. Ончозыныҥ кийнинде ӱй кижи де јада калган.

²³Айдарда, тирилер кӱнде ӧлгӧндӧр тирилгежин, ол булардыҥ кажызыныҥ ӱйи деп адалар? Олор јетилези оны алган ине.

²⁴Иисус олорго айтты: — Агару Бичикти де, Кудайдыҥ кӱчин де билбей јадып, азып турганыгар бу эмес пе?

²⁵Тирилгенде, кижи де албас, кижиге де барбас, је теҥеридеги ангелдердий болгылаар.

²⁶Ӧлгӧндӧрдиҥ тирилери керегинде Моисейдиҥ тӱрбегинеҥ кычырбадыгар ба, канайып Кудай кӱйӱп турган јыраадаҥ ого айтканын: «Мен Авраамныҥ Кудайы, Исаактыҥ Кудайы ла Иаковтыҥ Кудайы».

²⁷Кудай — Ол ӧлгӧндӧрдиҥ Кудайы эмес, тирӱлердиҥ Кудайы. Слер тыҥ азып јадыгар.

²⁸Бичикчилердиҥ бирӱзи олордыҥ сӧс блаашканын угуп, Иисус олорго карууны јакшы бергенин кӧрӧлӧ, базып келип, Оноҥ сурады: — Ончо јакылталардыҥ баштапкызы кандый јакылта?

²⁹Иисус каруу јандырды: — Баштапкызы бу: «Ук, Израиль! Кудайыбыс Кайракан — јаҥыс Бойы Кайракан.

³⁰Кайраканыҥды, бойыҥныҥ Кудайыҥды, бастыра јӱрегиҥле, бастыра јулаҥла, бастыра санааҥла, бастыра кӱчиҥле сӱӱп јӱр» — бат баштапкы јакылта.

³¹Экинчизи андый ок: «Бойыҥды сӱӱгеҥдий, јуугыҥды сӱӱп јӱр». Булардаҥ јаан ӧскӧ јакылта јок.

³²Бичикчи: «Јакшы, Ӱредӱчи! — деди. — Кудай јаҥыс, ӧскӧ Кудай јок дегениҥ, чын.

³³Оны бастыра јӱрекле, бастыра санаала, бастыра кӱчле сӱӱри, бойын сӱӱгендий, јуугын сӱӱри кандый да кӧдӱргидеҥ, кандый да берӱдеҥ улу-јаан».

³⁴Оныҥ керсӱзин каруу бергенинеҥ кӧрӱп, Иисус ого айтты: — Сен Кудайдыҥ Каандыгынаҥ ыраак эмезиҥ. Мыныҥ кийнинде Ого сурак берерге бир де кижи тидинбеди.

³⁵Байзыҥда оноҥ ары ӱредип, Иисус айтты: — Христос Давидтиҥ Уулы деп, бичикчилер канайып айдат?

³⁶Давид бойы Агару Тыннаҥ кӧдӱриҥи алып, мынайда айткан эмес беди: «Кайракан Кайраканыма айткан: „Ӧштӱлериҥди будыҥныҥ алдына салып бербегенчем, оҥ јаныма отур“».

³⁷Давид бойы Оны Кайракан деп адап турганда, Ол канайып оныҥ уулы болотон? Кӧп улус Оны сӱӱнип, угуп турды.

³⁸Ол ӱредип, айдып јӱрди: — Бичикчилердеҥ ајарынып јӱрӱгер. Олор узун кийим кийерин, тепсеҥдерде уткыдарын,

³⁹синагогаларда ичкери ӧдӱп отурарын, той-јыргалда тӧрдӧ кыйын отурарын кӱӱнзеп јадылар.

⁴⁰Олор, тул ӱй улустыҥ јӧӧжӧзин ӱптеп јип, кижи кӧрзин деп узак мӱргигилеп, там буруга калар.

⁴¹Иисус акча-јӧӧжӧлӱ кайырчактыҥ јанында отурып, ого акча салган улусты ајыктады. Кӧп байлар кӧптӧҥ салып турдылар.

⁴²Бир јокту тул ӱй кижи келип, эки оок јес акча салды.

⁴³Иисус ӱренчиктерин кычырып алала, айтты: — Чынын айдадым слерге: бу јокту тул ӱй кижи кайырчакка салгандардыҥ ончозынаҥ кӧп салды.

⁴⁴Ончозы артыкташканынаҥ салгандар, ол дезе, андый јокту бойы, не барын ончозын, курсак алар акчазын салган.