Read Јаҥы Кереес Марк 13 Bible Online

Марк 13 - Јаҥы Кереес bible

Марк 13

¹Иисус байзыҥнаҥ чыгып јадарда, ӱренчиктериниҥ бирӱзи Ого айтты: — Ӱредӱчи! Кӧр, кандый таштар, кандый туралар!

²Иисус ого айтты: — Бу јаан тураларды кӧрӱп туруҥ ба? Мыныҥ ончозы јемирилип-сайалар, мында таш ӱстине таш артпас.

³Ол Елеон кырда, байзыҥныҥ одожында отурарда, Петр, Иаков, Иоанн, Андрей Оноҥ јаҥыскандыра сурадылар:

⁴— Биске айт, бу качан болор, мыныҥ ончозы бӱдериниҥ темдеги кандый болор?

⁵Иисус айтты: — Чеберленигер, слерди кижи аскырбазын.

⁶Кӧп улус Мениҥ адымды аданып келер, «Бу Мен» — деер, улустыҥ кӧбизин аскырар.

⁷Кайда да јуу болуп јат деп, эмезе јуу-чак керегинде табыш угар болзогор, чочыбагар: бу болор учурлу, је бу учы эмес.

⁸Калык калыкка, каандык каандыкка удура туруп чыгар, кезектей јер силкинер, ачана-торо болор. Је бу ончозы ӱй кижиниҥ бала табарда оорузыныҥ јӱк башталганы.

⁹Слер дезе ајарыҥкай болыгар: слерди јаргылаар, синагогаларда согор, олорго кере эдип, Мениҥ адым учун бийлердиҥ, каандардыҥ алдында турарыгар.

¹⁰Је элдеҥ озо ончо калыктарда Сӱӱнчилӱ Јар јарлалар учурлу.

¹¹Слерди олордыҥ колына берип ийерге апарып јатса, нени айдарыс деп, кӱн-эртеде шӱӱбегер, је ол тушта слерге не берилер, оны ла айдыгар, нениҥ учун дезе слер айдар эмезигер, Агару Тын айдар.

¹²Карындаш карындажын, адазы балазын ӧлӱмге берип ийер, балдары ада-энезине удура туруп чыгып, олорды ӧлтӱрер.

¹³Слерди Мениҥ адым учун ончозы јаман кӧрӧр. Учына јетире чыдашканы дезе, аргадалар.

¹⁴Даниил јарлыкчыныҥ айтканыла, јайрадыштыҥ быјары турбас јерде турганын кӧрзӧгӧр, — кычыраачы аайлазын — ол тушта Иудейде јӱргендер кырларга качсын,

¹⁵јабынчыда болгоны, айыл ичиндеги немезин алайын деп тӱшпезин.

¹⁶Кырада јӱргени, кийимин алайын деп, бурылбазын.

¹⁷Ол кӱндерде барлуларга, бала эмискендерге ачу-корон!

¹⁸Бу керек кышкыда болбозын деп мӱргигер.

¹⁹Кудай јайаган не-неме бӱдердеҥ бери бого јетире качан да болбогон, соҥында да болбос андый ачу-корон ол кӱндерде келер.

²⁰Ол кӱндерди Кайракан кыскартпаган болзо, тынар-тынду неме аргаданып болбос эди. Је Ол Бойыныҥ талдап алгандарына болуп ол кӱндерди кыскарткан.

²¹Ол тушта кем-кем слерге: «Бат, Христос мында!», эмезе: «Бат, анда!» — дегежин, бӱтпегер.

²²Тӧгӱн христостор, тӧгӱн јарлыкчылар табылар, улу билдилер ле кайкалдар кӧргӱзер. Мыныла олор, аргалу болзо, талдалгандарды да астыктырарга эдер.

²³Слер дезе ајарыҥкай болыгар! Бат, слерге ончозын озолондыра айттым.

²⁴Ол кӱндерде, ачу-корон ӧткӧлӧктӧ, кӱн карачкыланар, ай јарыгын бербес;

²⁵јылдыстар теҥеридеҥ тӧгӱлер, теҥериниҥ кӱчтери косколонор.

²⁶Ол тушта улу кӱчтӱ ле мактулу Кижи Уулы теҥериниҥ булудыла келип јатканын кӧргӱлеер.

²⁷Айдарда, Ол ангелдерди ийер, ак-јарыктыҥ тӧрт талазынаҥ, јердиҥ кырынаҥ ала теҥериниҥ кырына јетире талдап алгандарын јуур.

²⁸Слерди смоква агаш ӱреткей: оныҥ будагы јымжап, бӱрлене бергенде, јай јууктап келди деп, билип јадыгар.

²⁹Анайып ок слер де: мыныҥ ончозы бӱдӱп турганын кӧрӧр болзогор, ӧй јууктап келди, эжиктиҥ јанында туру деп билигер.

³⁰Чынын айдадым слерге: мыныҥ ончозы бу ӱйе баргалакта болор.

³¹Теҥери ле јер јоголор, је Мениҥ сӧстӧрим јоголбос.

³²Ол кӱнди эмезе саатты кем де билбес, теҥеридеги ангелдер де, Уулы да билбес, јаҥыс Ада билер.

³³Ајарынып, сергек болуп, мӱргигер! Ол ӧй качан једе конорын билбезигер.

³⁴Ол ӧйдӧ дезе, бир кижи јорыкка атанар алдында айлын артырып, јалчыларына јаҥ берип, кажызыныҥ ла эдетен керегин айдып, эжик каруулчыгын сергек болзын деп јакарганындый болор.

³⁵Анайдарда, сергек болыгар! Айыл ээзи качан келерин билбезигер: эҥирде бе, эмезе тӱн аразында ба, эмезе пӧтӱк этсе бе, эмезе эртен тура ба.

³⁶Сакыбаган јанынаҥ келип, уйуктап јатканыгарды кӧрбӧзин!

³⁷Слерге айтканым, ончогорго айтканым ол: сергек болыгар!