Read Јаҥы Кереес Марк 14 Bible Online

Марк 14 - Јаҥы Кереес bible

Марк 14

¹Эки кӱнниҥ бажында Пасха ла ачытпаган калаш јийтен байрам башталып јаткан. Улу абыстар ла бичикчилер Иисусты меке-тӧгӱнле тудуп ӧлтӱрер эбин бедиредилер.

²— Байрамда ла тутпаактар, — дештилер, — калык тӱймебезин.

³Ол Вифанияда капкаш балулу Симон-эште болуп, кыйын отурарда, ак балкаштаҥ эдилген јыракылу бир ӱй кижи келди. Јыракыда нард ӧзӱмниҥ бойынаҥ белетелген баалу-чуулу, јараш јытту май болгон. Ӱй кижи айакты оодып, майды Иисустыҥ бажына урды.

⁴Кезиктери чугулданып, бойы ортодо айдыжып турдылар: — Майды мынайып не кородор?

⁵Оны ӱч јӱс динарийдеҥ артыкка садып ийеле, тӱреҥилерге ӱлеп бергедий. Олор ӱй кижиге арбанып тургандар.

⁶Је Иисус айтты: — Ого тийбегер, оны не тӱймедип туругар? Ол Меге јакшы керек этти.

⁷Тӱреҥилер слерле кожо јаантайын болор, олорго јетирейин деген тужыгарда, јакшыгарды јетиргейигер. Мен дезе слерле кожо јаантайын болбозым.

⁸Ол эдер аргалузын этти: эди-канымды озолондыра майлап, мӧҥкӱмди кӧдӱрерин белетеди.

⁹Чынын айдадым слерге: бу Сӱӱнчилӱ Јар бӱткӱл телекейде, кайда ла јарлалза, оны эске алгылап, улус оныҥ эткени керегинде айдар.

¹⁰Он экӱниҥ бирӱзи, Иуда Искариот, Оны улу абыстарга садып ийейин деп, олорго барды.

¹¹Олор угала, сӱӱндилер, ого мӧҥӱн акча берер болдылар. Ол дезе Оны садып ийетен эптӱ учурал бедиреп јӱрди.

¹²Ачытпаган калаш јийтен байрамныҥ баштапкы кӱнинде, пасханыҥ кураанын сойор тужында, ӱренчиктер Иисустаҥ сурадылар: — Пасханыҥ ажын кайда јийин деп туруҥ? Барып, белетеп койок.

¹³Ӱренчиктериниҥ экӱзин ийип, олорго айтты: — Калага барыгар. Слерге суулу јыракы апарып јаткан кижи туштаар. Оны ээчий барыгар.

¹⁴Ол кирген айылдыҥ ээзине айдыгар: «Ӱредӱчи: „Ӱренчиктеримле кожо пасханы јийтен кып кажызы?“ — дийт».

¹⁵Ол слерге јуунадып, белетеп койгон ӱстиндеги телкем кыпты кӧргӱзер. Анда биске белетегер.

¹⁶Ӱренчиктери барып, калага келеле, Оныҥ айтканыла таап алып, пасханы белетеп койдылар.

¹⁷Эҥир кирерде, Ол он экӱле кожо келди.

¹⁸Олор ажанып кыйын отурган тужында Иисус айтты: — Чынын айдадым слерге: Мениле кожо курсак јип отургандардыҥ бирӱзи Мени садып ийер.

¹⁹Олор ачурканып, «Мен болорым ба?» — деп, Оноҥ ээчий-деечий сурай бердилер. «Мен болорым ба?» — деп, база ӧскӧзи сурады.

²⁰Је Ол айтты: — Он экӱниҥ бирӱзи, Мениле кожо бир тепшиге колын сунуп турганы.

²¹Андый да болзо, Кижи Уулы Ол керегинде бичилгениле барып јат. Је Кижи Уулын садып јатканга ачу-корон! Ол кижиге ак-јарыкка туулбаган болзо, торт болор эди.

²²Олор ажанып отурарда, Иисус калаш алып, алкайла, сындырды, ӱренчиктерине берип, айтты: — Алыгар, јигер, бу Мениҥ эди-каным.

²³Айакты алып, алкыш јетиреле, олорго берди. Ончолоры оноҥ ичтилер.

²⁴Иисус олорго айтты: — Бу Мениҥ јаҥы кереес каным. Ол кӧп улус учун тӧгӱлип јат.

²⁵Чынын айдадым слерге: Кудайдыҥ Каандыгында јаҥы јиилектеҥ ичер кӱним јеткенче, виноград јиилегинеҥ база ичпезим.

²⁶Сарнажала, Елеон кырга бардылар.

²⁷Иисус олорго айтты: — Ончогор Мени таштап барарыгар. Бичилген сӧс бар: «Кӱдӱчини ӧлтӱрзем, койлоры тозо берер».

²⁸Тирилгенимниҥ кийнинде дезе Галилейге слердеҥ озо барарым.

²⁹Петр Ого айтты: — Сени ончозы да таштаза, је мен таштабазым!

³⁰Иисус ого айтты: — Чынын айдадым сеге: бӱгӱн, бу тӱнде, пӧтӱк эки катап эткелекте, Менеҥ ӱч катап јана тӱжериҥ.

³¹Је ол такып-такып айдып турды: — Сениле кожо ӧлгӧдий де болзом, Сенеҥ јана тӱшпезим! Ончолоры база анайып ла айдып турдылар.

³²Гефсимания дейтен јерге келдилер. Иисус ӱренчиктерине айтты: — Мен мӱргигенчем, мында отурыгар.

³³Бойыла кожо Петрды, Иаков ло Иоаннды алганча барып, ачурканып, карыга берди.

³⁴— Ӧзӧк-тыныма ӧлӱмниҥ ачузы тӱшти — деди. — Мында болуп, ойгу болыгар.

³⁵Эмеш кедери барала, кӧҥкӧрӧ тӱжӱп, бу ӧй Менеҥ кыйышкадый болзо, кыйышсын деп мӱргип,

³⁶айтты: — Авва, Ада! Сениҥ этпезиҥ јок. Бу кыйын-шыраны Менеҥ кыйыштыр, је Мениҥ кӱӱнимле болбозын, Сенийиле болзын.

³⁷Бурылып, олордыҥ уйуктап јаткандарын кӧрди, Петрга айтты: — Симон, сен уйуктап јадыҥ ба? Бир де саат ойгу отурып албадыҥ ба?

³⁸Сергек болыгар, ченелтеге тӱшпеске, мӱргигер. Тын сергек, эт-канда дезе чине јок.

³⁹Катап барала, байагы ок сӧзин айдып мӱргиди.

⁴⁰Бурылып, олордыҥ база ла уйуктап јаткандарын кӧрди: олордыҥ кӧстӧри јумулып турган; олор Ого каруузына нени айдарын билбей турдылар.

⁴¹Ӱчинчизин келип, олорго айтты: — Эмдиге јетире уйуктап амыраганчаар ба? Је эмди ӧй келди! Бат, Кижи Уулы кинчектӱлердиҥ колына берилип јадыры.

⁴²Туругар, баралы! Бат, Мени садып јатканы јууктап келди.

⁴³Бу ла тушта, Иисус айдып турганча, Иуда, он экӱниҥ бирӱзи, келди. Оныла кожо улу абыстар, бичикчилер ле јаандар ийген кылышту ла шыйдамду кӧп улус келдилер.

⁴⁴Иисусты садып јатканы олорго темдек айдып берди: — Окшогон кижим Ол болор. Оны тудуп, јазап каруулдап апарыгар.

⁴⁵Келеле, бу ла тарый Ого јууктай базып, «Равви!» — дейле, Оны окшоды.

⁴⁶Олор дезе, Оны тудуп, каруулга алдылар.

⁴⁷Мында тургандардыҥ бирӱзи кылыжын ушта тартып, улу абыстыҥ кулыныҥ кулагын кезе чапты.

⁴⁸Иисус олорго айтты: — Тонокчыны тудайын дегендий, Мени тудуп аларга кылышту ла казыкту келдигер.

⁴⁹Кӱнӱҥ сайын Мен слерле кожо байзыҥда болуп, ӱредип јӱрдим, слер Мени тутпадыгар. Је бичилгени бӱтсин.

⁵⁰Айдарда, Оны таштайла, ончозы кача берди.

⁵¹Бир јылаҥаш уул кеден бӧслӧ оронып, Иисустыҥ кийнинеҥ барып јаткан. Оны тудуп алдылар,

⁵²је ол бӧсти таштап, јылаҥаш бойы кача берди.

⁵³Иисусты улу абыска апардылар. Ончо улу абыстар, јаандар ла бичикчилер јуулыжып келдилер.

⁵⁴Петр дезе Оны ээчиде ыраагыла барып, улу абыстыҥ кӱрентигине кирген. Анда јалчыларла кожо отурып, отко јылынып турган.

⁵⁵Улу абыстар ла оток-кӱреениҥ ончо улузы Иисусты ӧлӱмге берип ийерге, Ого удура кере бедиреп, таппай турдылар.

⁵⁶Кӧп улус тӧгӱндеп, Ого удура керелеп айттылар, је олордыҥ бу керези башкаланып турды.

⁵⁷Кезиктери туруп, Ого удура тӧгӱн керелеп, айттылар:

⁵⁸— «Мен кижиниҥ колы бӱдӱрген бу байзыҥды бузала, ӱч кӱнге кижи колы бӱдӱрбеген ӧскӧ байзыҥды тудуп койорым» деп, Оныҥ айтканын укканыбыс.

⁵⁹Је олордыҥ да керези башкаланып турды.

⁶⁰Айдарда, улу абыс ортозына туруп, Иисустаҥ сурады: — Не бир де карууҥды айтпай туруҥ? Олор Сеге удура не деп керелейт?

⁶¹Је Ол унчукпай, каруузын айтпай турды. Улу абыс Оноҥ катап сурады: — Алкышту Бойыныҥ Уулы, Христос Сен бе?

⁶²Иисус: «Мен — деди. — Слер Кижи Уулы кӱчтӱ Кудайдыҥ оҥ јанында отурганын ла теҥериниҥ булудыла келип јатканын кӧрӧригер».

⁶³Улу абыс дезе бойыныҥ кийимин јырта тартып, айтты: — Биске база керечи не керек?

⁶⁴Кудайды јамандап айтканын уктыгар. Слер не деп сананып јадыгар? Ончолоры: «Ол бурулу, ӧлӧр учурлу» — дедилер.

⁶⁵Кезиги Ого тӱкӱре бердилер, јӱзин јаап, согуп, «Танып, јарлыктап айт» дежип турдылар. Јалчылар да Оны сого бердилер.

⁶⁶Петр тӧмӧн кӱрентикте болордо, оноор улу абыстыҥ јалчы ӱй улузыныҥ бирӱзи келди.

⁶⁷Отко јылынып отурган Петрды ајыктап кӧрӧлӧ, айтты: — Сен де Назареттиҥ кижизи Иисусла кожо јӱргеҥ.

⁶⁸Је ол јана тӱжӱп, «Нени айдып туруҥ болбогой, билбезим, аайлабай турум» — дейле, алдындагы кӱрентикке барды. Бу тарый пӧтӱк этти.

⁶⁹Јалчы ӱй кижи оны катап кӧрӧлӧ, анда турган улуска айдып баштады: — Бу кижи олордыҥ бирӱзи.

⁷⁰Ол база ла јана тӱшти. Саат болбой анда турган улус Петрга база ла айтты: — Сен олордыҥ бирӱзи болгоныҥ, чын. Сен Галилейдиҥ кижизи инеҥ, эрмегиҥ де олордыйы ошкош.

⁷¹Ол дезе, айдып турган кижигерди билбезим деп, Кудайды адап, чертенди.

⁷²Бу тарый пӧтӱк экинчи катап этти. Айдарда, Петр «Пӧтӱк эки катап эткелекте, Менеҥ ӱч катап јана тӱжериҥ» — деп, Иисустыҥ ого айткан сӧзин эске алып, ыйлай берди.