Read Јаҥы Кереес Марк 15 Bible Online

Марк 15 - Јаҥы Кереес bible

Марк 15

¹Саадабай эрте таҥда улу абыстар, јаандар, бичикчилер ле оток-кӱрее ончозы јуундап, јӧп чыгардылар. Иисусты кӱлийле, Пилатка апарып бердилер.

²«Сен иудейлердиҥ Кааны ба?» — деп, Пилат Оноҥ сураарда, Ол каруу јандырып, «Сен айдып туруҥ» — деди.

³Улу абыстар Оны кӧп бурулап турдылар.

⁴Пилат дезе Оноҥ база катап сурады: — Бир де каруу јандырбай туруҥ ба? Кӧрзӧҥ, Сеге удура бурулаштыҥ кӧбизин!

⁵Је Иисус бого до бир де каруу јандырбаста, Пилат кайкап турды.

⁶Байрам сайын дезе ол калык сураган кижендӱлердиҥ бирӱзин божодотон.

⁷Тӱрмеде тӱймеенчилерле кожо Варавва дейтен бир кижи отурган. Олор тӱймеен тужында кижи ӧлтӱргендер.

⁸Улус Пилатка келип, кижендӱлердиҥ бирӱзин алдындагы ла чылап божотсын деп, сурай берди.

⁹— Слерге иудейлердиҥ Каанын божодойын ба? — деп, Пилат олорго айтты.

¹⁰Улу абыстар Оны, кӱйӱнеле, берип ийгендерин ол билер болгон.

¹¹Је улу абыстар оныҥ ордына Варавваны сурагар деп, улусты тӱймедип ийдилер.

¹²Пилат олорго каруу берип, база айтты: — Иудейлердиҥ Кааны дешкенеерди мени канайтсын деп туругар?

¹³— Керип кой! — деп, олор база ла кыйгырыштылар.

¹⁴Пилат олорго айтты: — Ол јаман нени эткен? Је олор там тыҥыда кыйгырышты: — Керип кой!

¹⁵Айдарда, Пилат улуска јараарга, олорго Варавваны божотты, Иисусты дезе камчыладала, кере тартсын деп, берип ийди.

¹⁶Јуучылдар Оны претория дейтен кӱрентик ичине апарала, ончо черӱни јууп алдылар.

¹⁷Ого кубакай-кызыл кеп кийдирип, тегенекти ӧӧрӧлӧ, бажына салдылар.

¹⁸— Иудейлердиҥ Кааны эзендик болзын! — деп, Оны уткый бердилер.

¹⁹Бажына тайакла согуп, Ого тӱкӱрип, тизеленип, бажырып турдылар.

²⁰Оны электейле, кубакай-кызыл кепти уштып, Бойыныҥ кебин кийдиреле, керӱге апардылар.

²¹Киринейдиҥ Симон деп бир кижизи, Александр ла Руфьтыҥ адазы, јалаҥнаҥ бурулып, ӧдӱп бараткан. Керӱ агашты апарзын деп, ого јакардылар.

²²Иисусты Голгофа — «Куу-Баш» деп јерге экелдилер.

²³Ого смирна кошкон аракы ичерге берерде, албады.

²⁴Оны кере тарткандар, кемибиске нези јеткей не — деп, шыбага таштап, кийимин ӱлежип алдылар.

²⁵Оны кере тартарда, тогус саат эртен тура болгон.

²⁶Бурузын кӧргӱскен «Иудейлердиҥ Кааны» деп бичик илгендер.

²⁷Оныла кожо эки тонокчыны керип койдылар: бирӱзин оҥ јанына, ӧскӧзин — сол.

²⁸Анайып, «Оны кара сагыштуларга коштылар» деп, Агару Бичикте айдылган сӧс бӱтти.

²⁹Ӧдӱп бараткан улус баштарын кекип, Оны јамандап, айдыжып турдылар: — Э-э, байзыҥды бузаачы ла ӱч кӱнге тудаачы!

³⁰Бойыҥды Бойыҥ аргадап, керӱ агаштаҥ тӱш.

³¹Улу абыстар бичикчилерле кожо анайып ок Оны шоодып, бой-бойына айдыжып турдылар: — Ӧскӧ улусты аргадап јӱрген эди, Бойын дезе аргадап болбойт!

³²Христос, Израильдиҥ Кааны, эмди керӱ агаштаҥ тӱшсин, бис кӧрӧлӧ, Ого бӱдерис. Оныла кожо кере тартылгандар Оны база сӧгӱп турдылар.

³³Тал-тӱш боло берерде, јер ӱстине караҥуй тӱжӱп, ӱчинчи саатка јетире турды.

³⁴Ӱчинчи саатта Иисус улу ӱнденип кыйгырды: — Элои, Элои! Лама савахфани? Онызы: «Кудайым, Кудайым! Мени не таштадыҥ?» — дегени.

³⁵Анда турган улустыҥ кезиги мыны угала, «Бат, Илияны кычырып јат» — дештилер.

³⁶Бирӱзи дезе јӱгӱрип барып, шиҥдиретен немени уксусла чыктыдып, тайакка саптап, Ого ичерге берип, айтты: — Акыраар, Илия Оны тӱжӱрип аларга келгей не, кӧрӧлик!

³⁷Иисус дезе, тыҥ кыйгырала, тыны кыйыла берди.

³⁸Байзыҥдагы кӧжӧгӧ ӱстиги бажынаҥ тӧмӧн тӱжӱре эки јара јыртылды.

³⁹Керӱ агаштыҥ алдында турган јӱс јуучылдыҥ јааны Ол мынайда ӱнденип, тыны ӱзӱле бергенин кӧрӧлӧ, айтты: — Бу кижи чындаптаҥ Кудайдыҥ Уулы болгон!

⁴⁰Анда ыраагынаҥ кӧрӱп турган ӱй улус бар болгон. Олордыҥ ортозында: Мария Магдалина, кичӱ Иаков ло Иосийдиҥ энези Мария, оноҥ Саломия.

⁴¹Иисус Галилейде болордо, бу ӱй улус Оныла кожо јӱрӱп, Ого болужып туратан. Мында ок Оныла кожо Иерусалимге келген кӧп ӧскӧ ӱй улус болгон.

⁴²Бу суббот алдындагы белетеништиҥ кӱни болгон. Эҥир кирерде,

⁴³Аримафейдеҥ оток-кӱреениҥ тоомјылу кижизи Иосиф келди. Ол, Кудайдыҥ Каандыгы келерин сакып јӱрген бойы, Пилатка тидинип киреле, Иисустыҥ сӧӧгин сурады.

⁴⁴Пилат Оныҥ качан ок ӧлӱп калганын кайкады. Јӱс јуучылдыҥ јаанын кычырып алала, «Ӧлгӧни удаган ба?» — деп сурады.

⁴⁵Јӱс јуучылдыҥ јаанынаҥ угуп алала, сӧӧкти Иосифке берип ийди.

⁴⁶Иосиф кеден бӧс садып алды, сӧӧкти тӱжӱрип, бӧслӧ ороды. Кайада ойгон сӧӧк салар јерге апарып, салып койоло, эжигин ташла базырды.

⁴⁷Мария Магдалина ла Иосийдиҥ энези Мария сӧӧкти кайда салганын кӧрӱп тургандар.