Read Јаҥы Кереес Марк 6 Bible Online

Марк 6 - Јаҥы Кереес bible

Марк 6

¹Оноортынаҥ чыгала, Иисус Бойыныҥ алтайына келди. Оныла кожо ӱренчиктери болгон.

²Суббот кӱн једип келерде, Ол синагогада ӱредип баштады. Оны уккан улустыҥ кӧбизи алаҥ кайкап, айдышты: — Бу ончозы Ого кайдаҥ келди не? Ого не болгон ойгор санаа берилген? Оныҥ колы мындый кайкалдарды канайып эдет болбогой?

³Ол агашла узанар ус эмес беди? Марияныҥ уулы, Иаковтыҥ, Иосийдиҥ, Иуданыҥ ла Симонныҥ аказы эмес пе? Эје-сыйындары мында, ортобыста эмес пе? Анайып Ого бӱтпей, Оны јуутпай тургандар.

⁴Иисус дезе олорго айтты: — Јарлыкчы кӱндӱзи јок болбойтон, оны јаҥыс алтайында, тӧрӧӧн-тууганы, айлындагы улузы тообойтон.

⁵Ол анда бир де кайкал эдип болбоды, кезик ле јоболдулардыҥ ӱстине колын салып алкап, јасты.

⁶Олордыҥ бӱтпей турганын кайкады. Мыныҥ кийнинде јака јурттар сайын ӱредип јӱрди.

⁷Иисус он эки ӱренчигин кычырып алып, олорды экидеҥ ийип, кара јелбистердиҥ бажын билетен јаҥ берди.

⁸Олорго јакып, айтты: — Јолго тайактаҥ ӧскӧ бир де неме алып јӱрбегер: баштык та, калаш та, курыгарда јес акча да.

⁹Тегин ӧдӱк кийигер, кат кийим кийбегер.

¹⁰Кажы бир айылга тӱшсегер, ол јердеҥ чыкканча, анда болыгар.

¹¹Кандый бир јерде слерди јуутпаза, слерди укпаза, ол јердеҥ чыгып барадып, будыгардаҥ тоозынды кактагар. Онызы олорго удура кере болзын. Чынын айдадым слерге: јаргы болотон кӱнде, ол калага кӧрӧ, Содом ло Гоморрага јеҥил болор.

¹²Олор барып, улусты Кудайга баштанзын деп, јарлыктап јӱрдилер.

¹³Кӧп шилемир чыгарып, кӧп јоболдуларга май сӱртӱп, јазып турдылар.

¹⁴Иисустыҥ ады јарлу боло берген учун, Ол керегинде табыш Ирод-каанга јетти. Ол айтты: «Бу Крестеечи Иоанн. Ол тирилген, оныҥ учун ол кайкалдар эдет».

¹⁵Кезиги: «Бу Илия» — дешти. Ӧскӧлӧри дезе, «Бу јарлыкчы, эмезе јарлыкчылардыҥ бирӱзиндий кижи» — дештилер.

¹⁶Ирод дезе, мыны угала, айтты: «Бу — меге бажын кезе чаптырган Иоанн. Ол тирилген туру».

¹⁷Ирод Иоаннды тутсын деп кижи ийип, оны кижендеп, тӱрмелеп койгон болгон. Ол мыны Филипп карындажыныҥ абакайын, Иродиаданы, бойы алганы учун эткен.

¹⁸Иоанн Иродко айдып туратан: «Сеге карындажыҥныҥ абакайын аларга јарабас».

¹⁹Иродиада Иоаннды ӧштӧп, оны ӧлтӱрейин де дезе, је болуп албай јӱрген.

²⁰Ирод Иоаннды акту, агару кижи деп билип, оноҥ айап, оны чеберлеп јӱрген. Оны угуп, кӧпти эткен, айткан сӧстӧрин јакшызынып уккан.

²¹Эптӱ учурал Иродтыҥ туулган кӱнинде болгон. Ол бойыныҥ кӧдӧчилерине, черӱ башчыларына ла Галилейдиҥ јаандарына той-јыргал эткен.

²²Иродиаданыҥ кызы кирип, бијелеген, Иродко ло оныла кожо кыйын отургандарга јараган. Каан кыска айткан: — Менеҥ сурайын дегениҥди — сура, сеге берейин.

²³Оноҥ чертенген: — Нени де суразаҥ, каандыгымныҥ кабортозын да болзо, берейин.

²⁴Кыс нени сурайын деп, энезине барарда, онызы: «Крестеечи Иоанныҥ бажын сура» — деген.

²⁵Кыс бу тарый каанга капшайлап барып, айткан: — Эмди ле Крестеечи Иоанныҥ бажын табакка салала, меге берзин деп турум!

²⁶Каан кунуга берген, је чертине ле кожо кыйын отурган улуска болуп ого берген сӧзин бузарга кӱӱнзебеген.

²⁷Ол бу тарый черӱчилди ийип, Иоанныҥ бажын экелзин деп јакарган.

²⁸Онызы тӱрмеге барып, оныҥ бажын кезе чабала, табакка салала, экелип, кыска берген. Кыс дезе башты энезине берип ийген.

²⁹Иоанныҥ ӱренчиктери угала, келип, оныҥ сӧӧгин алып, јууп салгандар.

³⁰Апостолдор Иисуска јуулыжып келеле, нени эткенин, неге ӱреткенин Ого ончозын айдып бердилер.

³¹Иисус олорго айтты: — Јӱк бойыгар аалга јерге барып, эмеш тыштанып алыгар. Чындап та, келип-барып тургандар кӧп болгон учун, олорго ажанарга да бош јок болгон.

³²Олор јаҥыс бойлоры кемелӱ аалга јерге јӱстилер.

³³Јӱзӱп бараткандарын кӧргӧн кӧп улус олорды танып, ончо калалардаҥ оноор јойу, озолоп, јӱгӱрижип келдилер.

³⁴Иисус чыгып, кӧп улусты кӧрӧлӧ, кӱдӱчизи јок койлордый јӱрӱ деп, ичи ачыды. Олорды кӧпкӧ ӱредип баштады.

³⁵Орой боло берерде, ӱренчиктери Ого базып келип, айттылар: — Бу аалга јер эди, оноҥ орой.

³⁶Улусты божодып ий, эбире турган айылдарга, јурттарга барып, бойлорына курсак садып алзын. Олордо јиир неме јок.

³⁷Иисус: «Слер олорды азырагар» — деди. Ого айттылар: — Бис барып, эки јӱс динарийге калаш садып алала, олорды азыраак па?

³⁸Је Ол айтты: — Слерде канча кире калаш бар, барып кӧрӱгер. Олор барып кӧрӧлӧ, «Беш болчок калаш ла эки болчок балык» — дедилер.

³⁹Айдарда, ончозын кӧк ӧлӧҥниҥ ӱстине бӧлӱктей отургызыгар — деди.

⁴⁰Олор јӱстеҥ, беженнеҥ бӧлӱктей отурып ийдилер.

⁴¹Иисус беш калашты, эки балыкты алды, теҥери ӧрӧ кӧрӧлӧ, алкады. Калашты сындырала, улуска ӱлезин деп, ӱренчиктерине берди. Эки балыкты анайып ла ончозына ӱледи.

⁴²Ончозы јиди, тойды.

⁴³Калаш ла балыктыҥ арткан-калганын он эки каламага толтыра јууп алдылар.

⁴⁴Курсак јигендердиҥ тоозы беш муҥ эр кижи болгон.

⁴⁵Бу тарый Иисус ӱренчиктерге: — Улусты јандырып турганчам, кемеге отурып, ол јанына, Вифсаида јаар, Менеҥ озо кечигер — деди.

⁴⁶Улусты јандырып ийеле, мӱргийин деп, кырга чыкты.

⁴⁷Эҥирде кеме талайдыҥ ортозында болгон, Иисус дезе јаҥыскан Бойы јерде болгон.

⁴⁸Терс салкын согордо, ӱренчиктери кайыктап болбой, шыралап турганын кӧрди. Таҥ алдында Ол талайдыҥ ӱстиле базып, олорго јууктап келеле, кӧндӱре ӧдӧ конорго сананды.

⁴⁹Олор дезе, Оныҥ талайла базып келеткенин кӧрӧлӧ, бу сӱне болбой деп, кыйгырып ийдилер,

⁵⁰нениҥ учун дезе, Оны ончозы кӧрӧлӧ, коркый бергендер. Ол дезе бу тарый олорго эрмектенип, айтты: — Чочыбагар, бу Мен, коркыбагар.

⁵¹Мынайда айдала, олордыҥ кемезине отурды. Салкын токтой берди. Олор алаҥ кайкадылар.

⁵²Јӱректери таш болгон учун олор калашла болгон кайкалды аайлабаган.

⁵³Кечеле, Геннисарет јерине келип, јаратка токтодылар.

⁵⁴Олор кемедеҥ чыгарда, бу тарый улус Иисусты танып,

⁵⁵ончо јака јерлерди эбире јӱгӱрип, оору улусты тӧжӧктӧргӧ салала, Ол јӱрӱ деп угулган јерге экелип баштады.

⁵⁶Ол кайда ла келгенде — јурт болзын, кала болзын, турлу болзын, јоболдуларды тепсеҥдерге экелип салала, олор Оныҥ эдегине де болзо тийзин деп, сурап турдылар. Ого тийген улус јазылып турган.