Read Јаҥы Кереес Лука 1 Bible Online

Лука 1 - Јаҥы Кереес bible

Лука 1

¹Бисте болгон керектерди кӧп улус куучын эдип бичиирге ченешкен.

²Бу керектерди туку бажынаҥ ала бойы кӧргӧн, Сӧскӧ болуп иштеп јӱрген улус биске јетирген эди.

³Оныҥ учун, кӱндӱлӱ Феофил, ончозын учы-бажынаҥ ала быжулап шиҥжӱлейле, мен де сеге бир аай тизип, бичип берейин деп шӱӱдим.

⁴Сеге ӱредип айткан сӧстӧр чындык болгонын сени билзин деп турум.

⁵Иудейлердиҥ кааны Ирод тужында Захария деп абыс јуртаган. Ол Авия абыстыҥ бӧлӱгинеҥ болгон. Ондо Аарон укту абакай болгон; ады-јолы Елисавета.

⁶Олор экилези Кудайдыҥ алдында акту болгондор, Кайраканныҥ ончо јакылталарын бӱдӱрип, јаҥдаткан јаҥын тудуп, буспай јӱргендер.

⁷Је олордо бала-барка јок болгон: Елисавета бала таппас болуп бӱткен; экилези јажай да берген улус.

⁸Бир кӱн Захарияныҥ бӧлӱги абыстайтан ӧй једип келерде, ол Кудайдыҥ алдында мӱргип турган.

⁹Ого абыстардыҥ јаҥыла Кайраканныҥ байзыҥына кирип, фимиам ӧртӧӧр ӱлӱ келишкен.

¹⁰Фимиам ӧртӧӧр тужында байзыҥныҥ тыштында кӧп улус мӱргип турган.

¹¹Ого фимиам ӧртӧгӧн тагылдыҥ оҥ јанында Кайраканныҥ ангели турганы кӧрӱнди.

¹²Захария оны кӧрӧлӧ, јӱрексиреп, коркый берди.

¹³Је ангел ого айтты: — Коркыба, Захария: мӱргигениҥ угулды. Елисавета абакайыҥ сеге уул бала таап берер, оны Иоанн деп адаарыҥ.

¹⁴Уулыҥ сеге кежик ле улу сӱӱнчи болор, оныҥ туулганына кӧп улус сӱӱнер.

¹⁵Кайракан алдында ол улу болор, аракы ла эзиртер суузын ичпес, Агару Тынды энезиниҥ ичинде алынар.

¹⁶Израильдиҥ уулдарыныҥ кӧбизин Кайраканга, олордыҥ Кудайына, бурылтар.

¹⁷Адалардыҥ јӱрегин балдарына јандырайын деп, багынбастарды актулар чылап санандырайын деп, мынызыла Кайракан келерине калыкты белетейин деп, Кайраканныҥ ичкери алдынаҥ Илиядый тынду ла кӱчтӱ барар.

¹⁸— Мыныҥ чынын канайып билетем? — деп, Захария ангелдеҥ сурады. — Мен карып калдым, абакайым да јажай берген кижи.

¹⁹Ангел каруу јандырды: — Мен Кудайдыҥ алдында турган Гавриил; сениле эрмектежерге, бу сӱӱнчилӱ јарды сеге јетирерге ийилгем.

²⁰Сеге бу айтканым ӧйи једип, бӱтпей калбас. Је сен сӧзиме бӱтпедиҥ, оныҥ учун тилиҥ тартылып калар, мыныҥ чыны чыгар кӱн келгенче, унчукпай јӱрериҥ.

²¹Бу ӧйдӧ улус Захарияны сакып, байзыҥда не саадады болбогой деп, кайкажып турды.

²²Ол чыгып келди, је эрмектенип болбоды. Ого байзыҥда кӧрӱлте болгон деп, билип ийдилер. Улуска колыла имдеп, ол тил јок артканча болды.

²³Абыстап јӱрген кӱндери тӱгенерде, ол јанып келди.

²⁴Јаан удабай абакайы Елисавета барланып, беш ай јажынып, айдынып јӱрген:

²⁵«Улус ортодо мен керегинде јӱрген јаман эрмек-куучындарды токтодып, бу кӱндерде Кайракан меге мыны этти».

²⁶Елисаветаныҥ барланганынаҥ ала алтынчы айында Кудай Бойыныҥ Гавриил деп ангелин Галилейдеги Назарет калага,

²⁷Давид калдыгыныҥ Иосиф деп кижизиле кол алыштырылган кыска ийди. Кыстыҥ ады-јолы Мария болгон.

²⁸Ангел ого келип, айтты: — Сӱӱн, Јакшылыкту кыс! Кайракан сениле кожо! Ӱй улус ортодо сен алкышту.

²⁹Мария ангелди кӧрӧлӧ, айткан сӧзин кайкап, бу мынайып эзендешкени не атасы болотон деп, санана берди.

³⁰Ангел ого айтты: — Коркыба, Мария! Сен Кудайдаҥ јакшылык алдыҥ.

³¹Барланып, уул бала табарыҥ, Оны Иисус деп адаарыҥ.

³²Ол улу болор, Ӧрӧ Турганныҥ Уулы деп адалар. Кудай Кайракан Ого улу Давид адазыныҥ ширеезин берер.

³³Ол Иаковтыҥ калдыгын каан болуп ӱргӱлјиге башкарар, Оныҥ каандыгыныҥ учы-куйузы јок болор.

³⁴Је Мария ангелдеҥ сурады: — Ол канайып болор? Мен эр кижиле билишпес инем!

³⁵Ангел ого каруу јандырып, айтты: — Сеге Агару Тын тӱжер, сени Ӧрӧ Турганныҥ кӱчи кӧлӧткӧ чилеп бӱркеп ийер. Оныҥ учун табатан балаҥ агару болор, Кудайдыҥ Уулы деп адалар.

³⁶Бат, бала таппас дешкен тӧрӧӧниҥ Елисавета, ол до карыыр јӧбинде барланып, алтынчы айга барып јат. Ол уул бала табар.

³⁷Кудайдыҥ сӧзи бӱтпей калбас.

³⁸Мария: — Мен Кайраканныҥ кулы эдим, сениҥ айтканыҥла болзын — деди. Ангел јӱре берди.

³⁹Бу кӱндерде Мария туулык ороонго, Иуданыҥ калазына бачымдап барды.

⁴⁰Захария-эшке келип, Елисаветала эзендешти.

⁴¹Елисавета Марияныҥ эзендешкенин угарда, ичиндеги балазы кыймыктанды. Ол Агару Тынла толуп,

⁴²тыҥ ӱнденип айтты: — Ӱй улус ортодо сен алкышту! Карындап јӱрген балаҥды Кайракан алкады!

⁴³Мен кем ондый, меге Кайраканымныҥ энези келетен?

⁴⁴Эзендешкен ӱниҥ кулагыма угуларда, ичимдеги балам сӱӱнип, тепкиленди.

⁴⁵Кайраканныҥ ого айтканыла болор деп бӱткени, кежиктӱ.

⁴⁶Мария айтты: — Јулам мениҥ Кайраканды улуркадат,

⁴⁷тыным мениҥ Аргадаачы Кудайыма сӱӱнет,

⁴⁸Ол Бойыныҥ кулы јобожыганын кӧргӧни учун. Бу ӧйдӧҥ ала ончо ӱйелер мени кежиктӱ деп айдар,

⁴⁹кӱчтӱ Бойы меге улу керек эткени учун. Оныҥ ады агару!

⁵⁰Оны байлап, Оноҥ айап јӱрген улуска ӱйедеҥ ӱйеге быйаны једер.

⁵¹Ол Бойыныҥ колыла улу неме этти, улуркактарды ончо санаазыла кожо тоскурып ийди.

⁵²Јаҥда отургандарды ширеезинеҥ аҥтарып, базынчыкта јӱргендерди кӧдӱрди.

⁵³Аштап јӱргендерге јакшылык сыйлады, байларды как куруга тайып ийди.

⁵⁴Ада-ӧбӧкӧлӧриске: Авраамга ла оныҥ калдыктарына ӱргӱлјиге быйаным јетирерим деп, айдып салган сӧзин Ол эске алынып, Израильге — Бойыныҥ кулына болужарга келди.

⁵⁵

⁵⁶Мария Елисавета-эште ӱч ай кире јӱреле, јанып ийди.

⁵⁷Айы-кӱни једип, Елисавета уул бала тапты.

⁵⁸Кайракан ого улу быйанын јетиргенин угала, айылдаштары ла тӧрӧӧндӧри оныла кожо сӱӱнип турдылар.

⁵⁹Сегизинчи кӱнде баланы томдоорго[1] келгилеп, оны адазыныҥ адыла Захария деп адаарга санандылар.

⁶⁰Је энези: — Јок, оныҥ ады Иоанн болор — деди.

⁶¹— Сениҥ угыҥда андый атту кижи јок! — дешкилеп,

⁶²уулын кем деп адаарга турганын, колло имдеп, адазынаҥ сурадылар.

⁶³Захария јалбак агаш сурап алала, «Оныҥ ады Иоанн» деп бичиди. Турган улус ончозы кайкады.

⁶⁴Бу тарый оныҥ тили-оозы чечилип, Кудайды алкап, эрмектене берди.

⁶⁵Айылдаштары сӱрекей коркыды; кайкамчылу учурал керегинде куучын туулу Иудейге текши јайылды.

⁶⁶Уккан улус ончозы оны кӧксине алынып, «Бу бала кем болгой не?» — деп турдылар. Чындап та, Кайракан оныла кожо болгон.

⁶⁷Иоанныҥ адазы Захария Агару Тынла толуп, јарлыктап, айда берди:

⁶⁸— Кайраканга, Израильдиҥ Кудайына, баш болзын! Ол Бойыныҥ калыгына келип барган, ого јайым берген.

⁶⁹Бойыныҥ агару јебрен јарлыкчылары ажыра айтканыла бисти ӧштӱлеристеҥ, јаман кӧргӧндӧрдиҥ колынаҥ аргадайтан кӱчтӱ Аргадаачыны Ол Давид кулыныҥ калдыгынаҥ биске јайап берди.

⁷⁰

⁷¹

⁷²Ол адаларыска быйан јетирерим, Бойымныҥ агару кереезимди сананып јӱрерим деп, сӧзин берген.

⁷³Бисти ӧштӱлеристеҥ аргадаар, ол тушта бис кемнеҥ де јалтанбай, Оныҥ алдында агару ла чындык болуп, ончо кӱндеристиҥ туркунына Ого бажырып јӱрерис деп, Ол улу Авраам адабыска чертенген.

⁷⁴

⁷⁵

⁷⁶Сен дезе, балам, Ӧрӧ Турганныҥ јарлыкчызы деп адаларыҥ, Оныҥ јолдорын белетеерге, Кайраканныҥ алдында барарыҥ,

⁷⁷кинчектери ташталганы ажыра аргаданары керегинде Оныҥ калыгына билгир берериҥ.

⁷⁸Бисти сӱӱген ле биске быйанын берген Кудайыс теҥеридеҥ биске јарык таҥдак ийер —

⁷⁹ол чыгып, караҥуйда отурган, ӧлӱмниҥ кӧлӧткӧзинде јӱрген ончо улусты бойыныҥ јарыгыла чалыдып ийер; амыр-энчӱге экелетен јолды ол биске кӧргӱзип берер.

⁸⁰Бала дезе чыдап, тын-санаазы ойгорып, Израильге ачылар ӧйи јеткенче, куба чӧлдӧ јӱрди.