Read Јаҥы Кереес Лука 12 Bible Online

Лука 12 - Јаҥы Кереес bible

Лука 12

¹Ол ӧйдӧ тӱмен улус јуулып, кысталыжып турарда, Иисус озо ӱренчиктерине айдып баштады: — Фарисейлердиҥ ачыткызынаҥ чеберленигер, онызы эки јӱстӱ болоры.

²Ачылбай калар туйук неме јок, јарталбай калар јажыт јок.

³Оныҥ учун караҥуйда айтканыгар, јарыкта угулар, айыл ичинде кулакка айтканыгар, айылдыҥ јабынчызынаҥ јарлалар.

⁴Слерге дезе, најыларыма, айдып турум: эт-канды ӧлтӱреле, ӧскӧ нени де эдер аргазы јоктоҥ коркыбагар.

⁵Је кемнеҥ коркыйтанын слерге айдып берейин: ӧлтӱреле, таамыга тӱжӱрер јаҥ кемде бар, оноҥ коркыгар. Эйе, айдып турум слерге: оноҥ коркыгар!

⁶Беш болчок боро кучыйакты эки оок јес акчага садатан эмес беди? Је Кудай олордыҥ бирӱзин де ундыбаган.

⁷Слердиҥ дезе бажыгардыҥ кылы да ончозы тоололып калган. Анайдарда, коркыбагар: слер кӧп кучыйактардаҥ баалу!

⁸Айдып турум слерге: кем Мени јарадып турганын улус алдына айтса, оны Кижи Уулы да јарадып турганын Кудайдыҥ ангелдери алдына айдар.

⁹Улус алдында кем Менеҥ јана тӱжер, Кижи Уулы Кудайдыҥ ангелдери алдында ол кижидеҥ јана тӱжер.

¹⁰Кижи Уулына удура сӧс айтканы ташталар, је Агару Тынды јамандап айтканы, ташталбас.

¹¹Слерди синагогаларга, башкараачыларга ла јамылуларга экелгежин, канайда коруланарыс, нени айдарыс деп санааркабагар.

¹²Агару Тын ол тушта нени айдарына слерди ӱредер.

¹³Улустыҥ ортозынаҥ бир кижи Иисуска айтты: — Ӱредӱчи, карындажыма айтсаҥ, энчини мениле ӱлешсин.

¹⁴Иисус ол кижиге: — Слерди јаргылаарга эмезе энчигерди ӱлештирерге Мени кем туткан? — дейле,

¹⁵улуска баштанды: — Ачаптанып неме јуурынаҥ чеберленигер, — кижиниҥ јӱрӱми јӧӧжӧзиниҥ элбегинеҥ камаанду эмес.

¹⁶Оноҥ укаа сӧс айтты: — Бир бай кижиниҥ кыразында јакшы аш бӱткен.

¹⁷«Эмди канайдайын? — деп, ол сананган. — Ажымды урар јерим јок».

¹⁸Оноҥ айткан: «Мынайда эдедим: алмарларымды бузала, оноҥ јаандарын тудадым, ончо ажымды, бар јӧӧжӧмди ого јууп койодым.

¹⁹Оноҥ алкы бойыма айдадым: „Јулам! Белетеп алган курсагыҥ, јӧӧп алган байлыгыҥ узак ӧйгӧ једер: амыра, ичип-ји, јырга“».

²⁰Је Кудай ого айткан: «Тенек кижи! Бу тӱнде јулаҥды алып баргылаар. Белетеп алганыҥ кемге једижер?»

²¹Кудайга байыбай, бойына байлык јууган кижиле андый болуп јат.

²²Иисус ӱренчиктерине айтты: — Оныҥ учун айдып турум слерге: јӱрӱмигерди кичееп, нени јиирис, эди-каныгарды кичееп, нени кийерис дебегер.

²³Јӱрӱм курсактаҥ баалу, эт-кан кийимнеҥ баалу.

²⁴Кускундарды кӧригер: олор аш чачпайдылар, кеспейдилер, јӧӧжӧ сугар јери де јок, алмарлары да јок, је Кудай олорды азырап јат. Слер дезе куштардаҥ канча кире артык!

²⁵Кемигер кичеенип, јӱрӱмин бир де саатка узадып болор?

²⁶Асты да болзо, бойыгарга эдип болбозыгарда, ӧскӧзин не кичееп јадыгар?

²⁷Чомур чечектердиҥ ӧзӱп турганын кӧригер: иштебей де, иирбей де јадылар. Је айдып турум слерге: Соломон до бойыныҥ бастыра магында олордыҥ бирӱзи де чилеп кийинбеген.

²⁸Бӱгӱн ӧзӱп, эртен отко ташталатан јалаҥныҥ ӧлӧҥин Кудай анайда кийиндирип турган да, слерди оноҥ артык кийиндирер эмес пе, бӱтпестер!

²⁹Нени јиирин, эмезе нени ичерин бедиребегер, ого санааркабагар.

³⁰Мыны ончозын бу телекейдиҥ улузы бедирейт. Адагар дезе мыныҥ ончозын керексинип турганыгарды билер.

³¹Карын, Оныҥ Каандыгын бедирегер, мыныҥ ончозы слерге берилер.

³²Коркыба, ас ӱӱр! Слерге Каандык берери — Адагардыҥ јакшылык кӱӱни андый.

³³Јӧӧжӧгӧрди садып, быйан эдип јӱригер. Бойыгарга элебес кап белетеп алыгар, коробос байлыкты теҥериде јӧӧгӧр, — ого уурчы једип албас, оны кӱйе јибес.

³⁴Јӧӧжӧгӧр кайда, јӱрегеер де анда болор.

³⁵Белигер курлу болзын, јарыткыштарыгар кӱйӱп турзын.

³⁶Бийи тойдоҥ келеле, эжикти токулдаткажын, тургуза ла ачып берерге сакыган кижидий болыгар.

³⁷Бийи јанып келеле, кулдары ойгу болгонын кӧргӧжин, кулдарыныҥ кежиктӱ болгоны ол. Чынын айдадым слерге: ол курчанып, кулдарын отургызып, базып келеле, олорды бойы кӱндӱлеер.

³⁸Тӱнниҥ ӱч те аразында, таҥ алдында да келип, кулдары ойгу болгондорын кӧрӧр болзо, ол кулдар кежиктӱ.

³⁹Уурчы качан келерин айыл ээзи билген болзо, ойгу болуп, айлын тонотпос эди деп, билип јадыгар.

⁴⁰Слер де белен болыгар: Кижи Уулы слер сакыбаган ӧйдӧ келер.

⁴¹— Кайракан! Бу укаа сӧсти јаҥыс биске айдып туруҥ ба, айса ончо улуска ба? — деп, Петр Оноҥ сурады.

⁴²Кайракан айтты: — Јалчыларды башкарзын деп, олорго ӧйинде курсак берип турзын деп, бий кӧстӧгӧн бӱдӱмјилӱ ле керсӱ айыл башкараачы кем болотон?

⁴³Бийи келип, кулы анайда эдип јӱргенин кӧрӧр болзо, байагы кул кежиктӱ.

⁴⁴Чынын айдадым слерге: оны ончо јӧӧжӧзине баш эдер.

⁴⁵Је ол кул ичинде: «Бийим бачым келбес» — дейле, јалчыларды, јалчы кыстарды согуп, ичип-јип, аракыдап јатса,

⁴⁶ол кулдыҥ бийи сакыбаган кӱнде, сананбаган ӧйдӧ келер. Оны бойынаҥ кезе чабар, оныҥ салымы бӱдӱмји јок улустыҥ салымындый болор.

⁴⁷Бийиниҥ табын билип, белен эмес болуп, оныҥ табыла этпеген кул кӧп соктырар;

⁴⁸је билбеген кул, кезедерине турар кылык эткен де болзо, ас соктырар. Кемге кӧп берилген, оноҥ кӧп ок некелер, кемге кӧп бӱдӱмјилелген, оноҥ кӧп ок суралар.

⁴⁹Мен јерге от тӱжӱрерге келгем, ол от јалбырап кӱйзин деп, кӱӱнзеп турум!

⁵⁰Мен креске тӱжӱп, крестелер учурлу; оны сакып, кыйналып турганымды!

⁵¹Мени јерге амыр-энчӱ экелерге келген деп туругар ба? Јок! — деп, айдып турум слерге. — Бӧлиштирерге келгем!

⁵²Мынаҥ ары ӱйде беш кижи болзо, олор бӧлинижер: ӱчӱзи — экӱзине удура болор, экӱзи — ӱчӱзине удура болор.

⁵³Адазы уулына, уулы адазына удура, энези кызына, кызы энезине удура, кайын энези келдине, келди кайын энезине удура бӧлинижер.

⁵⁴Улуска дезе айтты: — Кӱнбадыштаҥ булут чыгып келгенин кӧрзӧгӧр, ол тарыйын: «Јаҥмырлаар» — дейдигер; айтканыгарла болуп јат.

⁵⁵Тӱштӱк салкын соккондо, «Изӱ болор» дейдигер, айтканыгарла болуп јат.

⁵⁶Эки јӱстӱлер! Јерге ле теҥериге кӧрӱп, јылдыҥ ӧйин билип јадыгар, эмди кандый ӧй келгенин дезе билип болбойдыгар ба?

⁵⁷Чын дегенди билип аларга, бойыгарды бойыгар не јаргылабайдыгар?

⁵⁸Сени бурулаачы кижиле бийлерге барып јаткаҥда, јолой оныла јаражарга кичеен, сени ол јаргычыга апарбазын, јаргычы сени тӱрмениҥ ишчизине берип ийбезин, онызы дезе сени тӱрмелеп койбозын.

⁵⁹Айдып турум сеге: калганчы оок акчаны тӧлӧбӧгӧнчӧҥ, оноортынаҥ чыкпазыҥ.