Read Јаҥы Кереес Лука 22 Bible Online

Лука 22 - Јаҥы Кереес bible

Лука 22

¹Ачытпаган калаш јийтен, Пасха дейтен байрам јууктап келеткен.

²Улу абыстар ла бичикчилер Иисусты тудуп ӧлтӱрер эбин бедиреп, је калыктаҥ коркып тургандар.

³Је бат, он экӱниҥ бирӱзи Иуда Искариоттыҥ ӧзӧк-буурына сатана кирди.

⁴Ол улу абыстарга, бийлерге барып, Иисусты олорго канайда садып ийерин эрмектешти.

⁵Олор сӱӱнип, ого акча берер болдылар.

⁶Иуда јӧпсинип, улус јок тушта Иисусты олорго садып ийетен эптӱ учурал бедиреп јӱрди.

⁷Ачытпаган калаш јийтен байрамныҥ кӱни једип келди. Бу кӱнде пасханыҥ кураанын сойотон болгон.

⁸Иисус Петр ла Иоаннды ийип, — Барып, биске пасханыҥ ажын јиир јер белетегер — деди.

⁹— Оны кайда белетезин деп туруҥ? — деп, олор сурадылар.

¹⁰Иисус олорго айтты: — Бат, калага кирип јатсагар, слерге суулу јыракы апараткан кижи туштаар. Оныҥ кирер айлына јетире оныҥ кийнинеҥ барыгар.

¹¹Айыл ээзине айдыгар: «Ӱренчиктеримле кожо пасха јийтен кып кажызы — деп, Ӱредӱчи сурап јат».

¹²Ол слерге јуунадып койгон ӱстиндеги телкем кыпты кӧргӱзер. Анда белетегер.

¹³Олор барып, Оныҥ айтканыла таап алып, пасханы белетеп койдылар.

¹⁴Ӧй једип келерде, Ол кыйын отурды, Оныла кожо он эки апостол.

¹⁵Иисус олорго айтты: — Кыйналарымнаҥ озо бу пасханы слерле кожо јиирге тыҥ кӱӱнзеген эдим!

¹⁶Айдып турум слерге: бу пасха Кудайдыҥ Каандыгында болгончо, Мен оноҥ база јибезим.

¹⁷Айак алып, алкыш јетиреле, айтты: — Мыны алып, бойыгар ортодо ичип, эбиртигер.

¹⁸Айдып турум слерге: Кудайдыҥ Каандыгы келбегенче, виноград јиилегинеҥ база ичпезим.

¹⁹Калаш алып, алкыш јетирди, сындырала, олорго берип, айтты: — Бу — слер учун берилип јаткан Мениҥ эди-каным. Мени эске алынып, анайда эдип јӱригер.

²⁰Курсак јиген кийнинде айакты база анайда берип, айтты: — Бу айак — слер учун тӧгӱлетен Мениҥ канымдагы јаҥы кереес.

²¹Је бат, Мени садып турганныҥ колы Менийиле кожо столдо.

²²Андый да болзо, Кижи Уулы темдектеп койгон јолло барып јат. Је Оны садып јатканга ачу-корон!

²³Олор бой-бойынаҥ суража бердилер: — Бистиҥ кемибис оны эдер?

²⁴Оноҥ сӧс блаашкылап, «Кемибис улу-јааны болгой не?» — дештилер.

²⁵Је Иисус олорго айтты: — Каандар калыктарды бийлейдилер, башчылар дезе бойлорын быйан јетиреечилер дейдилер.

²⁶Је ортогордо андый неме болбозын! Кемигер улу-јаан, кичӱдий болзын, кемигер јамылу, јалчыдый болзын.

²⁷Кемизи јаан: кыйын отурганы ба, эмезе јалчы ба? Кыйын отурганы эмес пе? Мен дезе ортогордо — јалчыдый!

²⁸Мениле кожо ончо ченелтелерди ӧттигер.

²⁹Адам Меге кереестегени чилеп, Мен де слерге Каандык кереестеп јадым.

³⁰Мениҥ Каандыгымда Мениҥ ажы-тузымды ичип-јииригер, Израильдиҥ он эки угын јаргылаарга, ширеелерге отурып аларыгар.

³¹Кайракан оноҥ айтты: — Симон, Симон! Бат, сатана слерди буудай чылап сееп койсын деп сураган.

³²Је Мен бӱдӱп турганыҥ јылыйбазын деп, сен учун мӱргидим. Меге ойто келзеҥ, карындаштарыҥныҥ бӱдӱп турганын тыҥыт.

³³Петр: — Кайракан! — деди. — Сениле кожо мен тӱрмеге де отурарга, ӧлӧргӧ дӧ белен!

³⁴Је Иисус: — Айдып турум сеге, Петр: бӱгӱн пӧтӱк эткелекте, Мени билбезим деп айдып, Менеҥ ӱч катап јана тӱжериҥ — дейле,

³⁵олорго айтты: — Мен слерди таар да, акча да, ӧдӱк те јок ийеримде, немедеҥ тутадыгар ба? Олор: — Недеҥ де тутабадыс — дедилер.

³⁶Айдарда, Ол айтты: — Је эмди таарлу кижи онызын алзын, акчазын да алзын. Кемде јок болзо, кийимин садып ийип, кылыш садып алзын.

³⁷Айдып турум слерге: «Оны јазык эткендердиҥ тоозына коштылар» деп, Мен керегинде бичилгени бӱдер учурлу. Эйе, Мен керегинде бичилгени ончозы бӱдӱп, учына једип барадыры.

³⁸Олор: «Кайракан, бат мында эки кылыш» — деерде, Ол: «Једер» — деди.

³⁹Иисус айылдаҥ чыгып, Бойыныҥ јаҥжыкканыла Елеон кырга барды. Ӱренчиктери де Оныҥ кийнинеҥ бардылар.

⁴⁰Једер јерге једип, Иисус олорго айтты: — Ченелтеге кирбеске, мӱргигер!

⁴¹Бойы дезе, таш чачым кире ырайла, тизеленип, мӱргий берди:

⁴²— Ада! Кӱӱниҥ бар болзо, бу кыйын-шыраны Менеҥ кыйыштыр. Андый да болзо, Мениҥ кӱӱнимле болбозын, Сенийиле болзын.

⁴³Теҥеридеҥ Ого ангел кӧрӱнип, тын-санаазын сергидип турды.

⁴⁴Ол тартыжуда болуп, там кичеенип мӱргиди. Оныҥ тери јерге тамчылаган кан ошкош болды.

⁴⁵Мӱргип божойло, ӱренчиктерине келерде, олор тыҥ кунукканына уйуктап калтыр.

⁴⁶— Не уйуктап јадыгар? — деп, Иисус олордоҥ сурады. — Туруп, ченелтеге кирбеске, мӱргигер!

⁴⁷Иисус мынайда айдып турганча, кӧп улус кӧрӱнип келди. Он экӱниҥ бирӱзи, Иуда дейтени, олорды озолоп келип јатты. Иисусты окшоп ийерге, Ого јууктай басты. Иуда андый темдек айдып берген: кемди окшоорым, ол ло кижи Иисус болор.

⁴⁸Иисус ого айтты: — Иуда! Кижи Уулын окшошло садып туруҥ ба?

⁴⁹Ӱренчиктер керектиҥ аайын кӧрӱп, айттылар: — Кайракан, кылышла чабалы ба?

⁵⁰Олордыҥ бирӱзи кылыжыла улу абыстыҥ кулына јаҥып, оҥ кулагын кезе чапты.

⁵¹Иисус: «Болор, токтогор!» — дейле, кулдыҥ кулагына колыла тийип, јазып ийди.

⁵²Оны тударга келген улу абыстарга, байзыҥныҥ каруулыныҥ бийлерине ле јаандарга дезе мынайда айтты: — Тонокчыны тудайын дегендий, Мени тудуп аларга кылышту ла шыйдамду келдигер.

⁵³Кӱнӱҥ сайын слерле кожо байзыҥда болуп јӱрдим, слер Меге тийбедигер. Је эмди — слердиҥ ӧйигер ле караҥуйдыҥ јаҥы.

⁵⁴Оны тудуп алып, улу абыс-эшке экелдилер. Петр дезе ээчиде ыраагыла барган.

⁵⁵Олор кӱрентиктиҥ ортозына от салып, кожо отура берерде, Петр база олордыҥ ортозына отурып алды.

⁵⁶Бир јалчы ӱй кижи оныҥ от јанында отурганын кӧрӱп, лаптап ајыктайла, айтты: — Бу да кижи Оныла кожо јӱрген.

⁵⁷Је ол Оноҥ јана тӱжӱп: — Мен Оны билбезим, ӱй кижи — деди.

⁵⁸Удабай база бирӱзи оны кӧрӱп, «Сен де олордыйы» — деди. Је Петр бу кижиге «јок» — деди.

⁵⁹Бир саат кире ӧйдиҥ бажында база кандый да кижи бӱдӱмјилӱ айда берди: — Бу да кижи Оныла кожо болгоны чын. Ол Галилейдиҥ кижизи эмей.

⁶⁰Је Петр ол кижиге: — Нени айдып туруҥ болбогой, билбезим — деди. Бу тарый, ол айдып турганча, пӧтӱк этти.

⁶¹Кайракан кайра баштанып, Петр јаар кӧрди. «Пӧтӱк эткелекте, Менеҥ ӱч катап јана тӱжериҥ» — деп, Кайраканныҥ ого айтканын Петр эске алды.

⁶²Кӱрентиктеҥ чыгала, ӧксӧп ыйлады.

⁶³Иисусты тудуп турган улус Оны базынып, согуп,

⁶⁴кӧзин таҥып, јӱзине тажып, сурап турдылар: — Јарлыкчы болуп танып, айт, Сени кем сокты?

⁶⁵Ого ӧскӧ дӧ кӧп јаман сӧстӧр айттылар.

⁶⁶Тӱш боло берерде, калыктыҥ јаандары, улу абыстар, бичикчилер јуулыжып, Оны бойлорыныҥ оток-кӱреезине экелдилер.

⁶⁷— Сен Христос болзоҥ, биске айт — деп, олор сурадылар. Ол дезе каруу јандырды: — Слерге айтсам, бӱтпезигер,

⁶⁸суразам, каруузын айтпазыгар, Мени божотпозыгар.

⁶⁹Эмдидеҥ ала Кижи Уулы кӱчтӱ Кудайдыҥ оҥ јанында отурар.

⁷⁰— Анайдарда, Сен — Кудайдыҥ Уулы ба? — деп, ончозы сурады. Ол каруу јандырды: — Мен деп, бойыгар айттыгар.

⁷¹Олор: — Биске база кандый кере керек? — дештилер. — Бис мыны бойыбыс Оныҥ Бойынаҥ уктыбыс.