Read Јаҥы Кереес Лука 9 Bible Online

Лука 9 - Јаҥы Кереес bible

Лука 9

¹Иисус он экӱни кычырып алала, олорго ончо шилемирлердиҥ бажын билер, оору-јоболды јазар кӱч ле јаҥ берди.

²Кудайдыҥ Каандыгы керегинде јарлазын, оору улусты јассын деп, олорды ийип,

³айтты: — Јолго неме албагар: тайак та, баштык та, калаш та, акча да; солып кийер кийим алып јӱрбегер.

⁴Кажы бир айылга тӱшсегер, анда артып, оноортынаҥ јолго атаныгар.

⁵Слерди кайда јуутпаза, ол каладаҥ барып јада, олорго удура кере эдип, будыгардаҥ тоозынды кактагар.

⁶Олор барып, јурттарды эбирип, кайда ла Сӱӱнчилӱ Јар јарлап, оору улусты јазып јӱрдилер.

⁷Тӧрт тӧчинниҥ бирӱзин башкарган Ирод, Иисустыҥ нени эдип јӱргенин ончозын угала, алаҥ кайкады, нениҥ учун дезе кезиктери: «Бу Иоанн, ол тирилген»,

⁸бир кезиги: «Илия келген», ӧскӧлӧри: «Јебрен јарлыкчылардыҥ бирӱзи тирилген» — дешкен.

⁹Је Ирод айткан: «Иоанныҥ бажын мен кезе чаап койгом. Бу мындый кайкамчылу керектерди кем эдет болбогой?» Иродтыҥ Оны кӧрӧр кӱӱни келип турган.

¹⁰Апостолдор јанып келеле, нени эткендерин Иисуска айдып бердилер. Иисус олорды јаҥыс бойлорын алганча, Вифсаида дейтен каланыҥ јуугындагы ээн јерге ырады.

¹¹Је улус билип ийеле, кийнинеҥ барды. Иисус олорды угуп, олорго Кудайдыҥ Каандыгы керегинде куучындады, јазыларын керексиген улусты јасты.

¹²Эҥир кирип бараткан. Он экӱ Ого базып келип, айттылар: — Улусты божот, олор эбире јаткан јурттарга барып, конор-тӱнеер јер ле јиир курсак таап алзын, бу аалга јер.

¹³Је Ол: — Слер олорды азырагар — деди. — Бисте беш болчок калаш ла эки болчок балыктаҥ ӧскӧ неме јок — деп, ӱренчиктер каруу јандырды. — Айса барып, бу улустыҥ ончозына курсак садып алактар ба?

¹⁴Анда беш муҥ кире кижи болгон. — Улусты беженнеҥ јергелей отургызыгар — деп, Иисус олорго јакыды.

¹⁵Анайда эдип, ончолорын отургызып ийдилер.

¹⁶Иисус дезе, беш болчок калаш ла эки болчок балыкты алып, теҥери ӧрӧ кӧрӧлӧ, алкады, олорды сындырала, улуска ӱлезин деп, ӱренчиктерге берди.

¹⁷Ончозы јиди, тойды. Јигенниҥ арткан-калганын он эки каламага јууп алдылар.

¹⁸Бир катап Иисус јаҥыскан мӱргип турарда, Ого ӱренчиктери келди. Иисус олордоҥ сурады: — Улус Мени кем дешкилейт?

¹⁹Олор каруу јандырдылар: — Сени Крестеечи Иоанн дежет, кезиктери Илия, кезиктери дезе јебрен јарлыкчылардыҥ бирӱзи тирилген дежет.

²⁰Ол сурады: — Слер Мени кем дейдигер? Петр: — Сен — Кудайдыҥ Христозы — деди.

²¹Је Ол мыны кемге де айтпазын деп, кату јакарала,

²²айтты: — Кижи Уулы кӧп кыйналар учурлу, јаандар, улу абыстар ла бичикчилер Оны јектеп, ӧлтӱргилеп койор, ӱчинчи кӱнде дезе Ол тирилер учурлу.

²³Оноҥ ончозына айтты: — Мениле кожо барайын дегенигер, бойынаҥ бойы мойноп, бойыныҥ керӱ агажын алып, Мениҥ кийнимнеҥ барзын.

²⁴Јӱрӱмин аргадайын дегени, онызын јылыйтар. Меге болуп јӱрӱмин јылыйтканы дезе, онызын аргадап алар.

²⁵Јер-телекейде не бардыҥ ончозын табала, је бойын бойы ӧлтӱрип эмезе бойын јылыйтып салза, кижиге не туза?

²⁶Кем Менеҥ, Мениҥ айткан сӧзимнеҥ уйалза, Кижи Уулы Бойыныҥ, Аданыҥ ла агару ангелдердиҥ магында келгежин, ол кижидеҥ уйалар.

²⁷Чынын айдадым слерге: мында тургандардыҥ кезиги Кудайдыҥ Каандыгын кӧрбӧгӧнчӧ, ӧлбӧс.

²⁸Мынайда айтканныҥ кийнинде, сегис кӱнниҥ бажында Иисус Петрды, Иоанн ла Иаковты алала, мӱргиирге кырга чыкты.

²⁹Ол мӱргип турарда, чырайы кубулды, кийими агарып, мызылдай берди.

³⁰Је бат, Оныла эки эр кижи эрмектежип турды. Олор Моисей ле Илия болгондор.

³¹Теҥериниҥ магыла јаркындалганча келип, олор Иисустыҥ Иерусалимде бӱдӱретен керектериниҥ учын куучындажып тургандар.

³²Петр ла оныла кожо болгон улус дезе уйкуга јыга бастырып койгондор. Је ойгонып келеле, Оныҥ магыныҥ јаркынын, Ого коштой эки эр кижи турганын кӧрӱп ийдилер.

³³Байагы улус барарга јадарда, Петр Иисуска айтты: — Ӱредӱчи, биске мында макалу! Ӱч чадыр тудалы: бирӱзин Сеге, бирӱзин Моисейге, бирӱзин дезе — Илияга. Нени айдып турганын ол бойы да билбес болгон.

³⁴Айдып турганча, булут чыгып, олорды кӧлӧткӧлӧп ийди. Булутка киреле, коркый бердилер.

³⁵Булуттаҥ ӱн угулды: — Бу Мениҥ сӱӱген Уулым, Оны угыгар!

³⁶Ӱн угулбай барарда, Иисус ойто јаҥыскан артты. Ӱренчиктер мыны јажытта тудуп, нени кӧргӧндӧрин ол кӱндерде кемге де айтпадылар.

³⁷Эртезинде олор кырдаҥ тӱшкилеп келерде, Иисусты кӧп улус уткып чыкты.

³⁸Кенетийин улус ортодоҥ бир кижи: — Ӱредӱчи! — деп, кыйгырып ийди. — Сени јайнап, сурап турум, мениҥ уулымды келип кӧр! Ол мениҥ сок јаҥыс уулым!

³⁹Јелбис ого табарганда, ол кенетийин кыйгырып баштайт, баланы кура тартарда, оозынаҥ кӧбӱк чыгып келет. Оны чек кыйнайла, јӱк арайдаҥ айрылат.

⁴⁰Јелбисти чыгара сӱригер деп, ӱренчиктериҥди айбылагам, је олор болуп албады.

⁴¹Иисус: — Э-э, бӱтпес, балыр ӱйе! — деди. — Слерле кожо канчазын јӱрейин? Слерге канчазын чыдажайын? Уулыҥды бери экел!

⁴²Онызы келип јатканча, шилемир оны јерге јыга базып, калтырада берди. Је Иисус кара јелбиске јакарып, уулчакты јазала, адазына берип ийди.

⁴³Кудайдыҥ кӱчин ончолоры кайкажып турдылар. Ончо улус Иисустыҥ эдип јӱргенин кайкажып турарда, Ол Бойыныҥ ӱренчиктерине айтты:

⁴⁴— Айтканымды лаптап угыгар: Кижи Уулы улустыҥ колына берилер.

⁴⁵Је олор бу сӧстӧрди аайлабадылар, олорго бу сӧстӧр туйук болуп, оныҥ учурын оҥдободылар. Сурап угарга дезе јалтанып тургандар.

⁴⁶Кемизи улу-јаан деп, ӱренчиктер ортодо блааш-тартыш болгон.

⁴⁷Иисус дезе, олордыҥ јӱрегинде алып јӱрген сагыжын билип, бир баланы колго алала, Бойыныҥ алдына тургузып,

⁴⁸айтты: — Меге болуп бу баланы јуудып алганы — Мени јуудып турганы. Мени јуутканы дезе, Мени Ийгенди јуутканы ол. Ортогордо эҥ кичӱгер, улу болор.

⁴⁹Айдарда, Иоанн айтты: — Ӱредӱчи! Сениҥ адыҥды адап, шилемирлерди чыгарып турган кижини кӧрдибис. Ол бисле кожо јӱрбей турган учун, оны токтодып салдыс.

⁵⁰Иисус: — Токтотпогор — деди. — Слерге удура эмес кижи слер учун ине.

⁵¹Кудай Иисусты теҥериге алар кӱндер јууктап келедерде, Иисус Иерусалим јаар барар деп шӱӱп,

⁵²Бойынаҥ озо элчилерин ийди. Олор Ого керектӱ не-немени белетеп койорго, бир самар јуртка келдилер.

⁵³Је Оны јуутпадылар, нениҥ учун дезе Ол Иерусалим јаар барып јатканы кӧрӱнип турды.

⁵⁴Мыны кӧрӧлӧ, ӱренчиктери Иаков ло Иоанн айттылар: — Кайракан! Кӱӱниҥ бар болзо, Илия эткени чилеп, теҥеридеҥ от тӱжӱп, буларды ӧртӧп салзын деп айдалы ба?

⁵⁵Је Иисус олор јаар бурылып, олорды токтодып койды. Бойыгарда кандый тын барын билбей јадыгар — деди. —

⁵⁶Кижи Уулы дезе, кижиниҥ тынын кыйарга эмес, аргадаарга келген. Айдарда, олор ӧскӧ јуртка бардылар.

⁵⁷Јолой бир кижи Иисуска айтты: — Сен кайдаар да барзаҥ, Сени ээчий барарым.

⁵⁸Иисус ого айтты: — Тӱлкӱ болзо ичегендӱ, куш болзо уйалу. Кижи Уулыныҥ дезе баш та јӧлӧӧр јери јок.

⁵⁹Ӧскӧзине дезе айтты: — Мени ээчий бар. Онызы: — Кайракан! — деди. — Мен озо адамныҥ сӧӧгин јууп койорго барып келейин бе?

⁶⁰Је Ол ого айтты: — Ӧлгӧн улус ӧлгӧндӧриниҥ сӧӧгин бойлоры јуузын. Сен дезе барып, Кудайдыҥ Каандыгыныҥ Сӱӱнчилӱ Јарын јарла.

⁶¹База бир кижи айтты: — Кайракан! Мен Сениле кожо барарым, је озо барып, айылдагы улусла јакшылажып алайын ба?

⁶²Је Иисус ого айтты: — Салдага колын салала, кайра ајыктанып турган кижи, Кудайдыҥ Каандыгына ижемјизи јок.