Read Јаҥы Кереес Римдегилерге 15 Bible Online

Римдегилерге 15 - Јаҥы Кереес bible

Римдегилерге 15

¹Бис, Кудайга бӱдеринде кӱчтӱ улус, бӱдеринде чине јок улустыҥ јӱгин апарыжар учурлу, бойыска јараарыла этпес учурлу.

²Кажыбыс ла јуук кижибиске јараарыла эдип, ол Кудайга бӱдеринде ӧссин деп, ого јакшыны эдер учурлу.

³Христос то Бойына јараарыла этпеген, карын, бичилгениле: «Сени јамандаган улустыҥ јамандажы Меге тӱшкен».

⁴Башкыда ончо бичилгени бисти ӱредерге бичилген. Бис олордоҥ чыду ла кӧкӱдӱ алып, ижемјибисти јылыйтпазыбыс.

⁵Чыду ла кӧкӱдӱ берип турган Кудай дезе, Христос Иисуска јараарыла, санаагарды јаҥыс этсин,

⁶санаагар јаҥыс болуп, бир ӱнле Кудайды, Иисус Христос Кайраканыстыҥ Адазын, мактазын деп.

⁷Оныҥ учун Кудай макталзын деп, слерди Христос јуудып алганы чылап, бой-бойыгарды јуудып турыгар.

⁸Кудайдыҥ чындыгына болуп Иисус Христос иудей калыкка јалчы боло бергенин слерге айдып турум. Анайып, Ол улу адаларга берген сӧсти бӱдӱрген.

⁹Ӧскӧ калыктарга дезе, олор Кудайды мактазын деп, быйан эдип јалчы боло берген, бичилгениле: «Оныҥ учун Сени, Кайракан, кара јаҥдулар ортодо мактаарым, Сеге сарындар сарнаарым».

¹⁰База айдылган: «Оныҥ калыгыла кожо јыргагар, ӧскӧ калыктар!»

¹¹База: «Кайраканды мактагар, ончо ӧскӧ калыктар! Оны макка чыгарыгар, ончо калыктар!»

¹²База Исаия айдат: «Ол Иессейдиҥ тазылынаҥ чыгып, калыктарды башкарарга келер. Ого калыктар иженер».

¹³Агару Тынныҥ кӱчиле ижемјигер там кӧптӧзин деп, ижемји берип турган Кудай Ого бӱткенигер ажыра слерди кандый ла сӱӱнчиле, амырла толтырзын.

¹⁴Бойым да слерге бӱдӱмјилӱ, карындаштарым: слер јакшыла толо, ончозын билип, бой-бойыгарды ӱредер аргагар бар.

¹⁵Је мен слерге, карындаштар, бир кезик немелерди эске алындырарга тидим бичидим, нениҥ учун дезе Кудайдаҥ меге берилген јакшылыкла

¹⁶Иисус Христостыҥ абызы болуп, ӧскӧ калыктар ортодо абыстап, Сӱӱнчилӱ Јар јарлап јадым. Олор Агару Тынла агарулалып, Кудайга јараар тайылга боло берзин деп, мыны эдип јадым.

¹⁷Анайдарда, Кудайга эткен керектеримле Иисус Христос ажыра мактанар аргам бар.

¹⁸Ӧскӧ калыктарды Кудайга уккур болорына экелерге, Христос мен ажыра нени эткен, јӱк оны тидим айдып јадым. Ол мыны сӧслӧ, керекле,

¹⁹билдилердиҥ ле кайкалдардыҥ кӱчиле, Кудайдыҥ Тыныныҥ кӱчиле эткен. Анайып, Иерусалимнеҥ ала Иллирикке јетире Христостыҥ Сӱӱнчилӱ Јарын јарлыктаар аргалу болгом.

²⁰Айла, Христостыҥ адын улус уккалак јерлерде јарлыктаарга кичеенгем, ӧскӧ кижи салган тӧскӧ неме тутпайын деп,

²¹бичилгениле: «Ол керегинде кемдерге јарлалбаган, олор кӧрӧр, кемдер укпаган, олор аайлаар».

²²Слерге кӧп катап келерге санангам, је јӱзӱн-башка шылтактардаҥ улам келишпеген.

²³Эмди бу ороондордо мен јарлыктабаган јер артпаган. Слерге кӧп јылдардыҥ туркунына келерге кӱӱнзегеним учун

²⁴Испания јаар атанып, слерге келерим. Слерле јолой кӧрӱжерим деп, иженип турум. Бир кезек ӧйгӧ дӧ болзо слерле кожо болуп, сӱӱнип алзам, оноҥ ары барарга мени јолго шыйдыырыгар.

²⁵Эмди агаруларга болужайын деп, Иерусалим јаар барып јадым.

²⁶Керек неде дезе, Македонияныҥ ла Ахаияныҥ серкпелери Иерусалимдеги јокту агаруларга болуш јетирерге кӱӱнзегендер.

²⁷Мыны бойлоры эдерге кӱӱнзегендер. Је олор мыны эдер учурлу болгон. Иудейлер Тыннаҥ берилген байлыкла ӧскӧ калыктарла ӱлешкен болзо, ӧскӧ калыктар олорго јердеги байлыкла болужар учурлу.

²⁸Бу јакылтаны бӱдӱрип, јууганымды олорго јетирзем, Испания јаар атанып, јолой слерле туштажарым.

²⁹Слерге келзем, Христостыҥ Сӱӱнчилӱ Јарыныҥ алкыжын толтыра экелерим деп, билип јадым.

³⁰Иисус Христос Кайраканыска болуп, Агару Тын берип турган сӱӱшке болуп слерди сурап турум, карындаштар: мен учун Кудайга мӱргип, мениҥ тартыжуумда мениле кожо болыгар.

³¹Ол мени Иудейдеги бӱтпестердеҥ айрызын деп, Иерусалимге эткенимди ондогы агарулар јаратсын деп,

³²Кудайдыҥ табы болзо, мени слерге сӱӱнчилӱ келип, слерле кожо амырап алзын деп мӱргигер.

³³Амырдыҥ Кудайы ончогорло кожо болгой. Аминь.