Read Јаҥы Кереес Римдегилерге 7 Bible Online

Римдегилерге 7 - Јаҥы Кереес bible

Римдегилерге 7

¹Слерге, карындаштар, Јасакты билер улуска, айдып турум: кижи тирӱ јӱргенде, оны Јасак башкарып турганын билбейдигер эмеш пе?

²Айылду ӱй кижи тирӱ јӱрген ӧбӧӧниле Јасакла колболгон. Је ӧбӧӧни јада калза, ол ӧбӧӧниле колбогон Јасактаҥ јайымдалат.

³Оныҥ учун, ӧбӧӧни тирӱ јӱрерде ӧскӧ кижиге барза, балыр јӱрӱмдӱ ӱй кижи болор. Је ӧбӧӧни јада калза, ол Јасактаҥ јайым, ӧскӧ кижиге барып, балыр јӱрӱмдӱ ӱй кижи болбос.

⁴Анайып слер де, карындаштарым: Христостыҥ эди-каны ажыра Јасакка ӧлдигер. Слер тирилген Христостыйы болорго ӧлдигер. Анайып, Кудайга јарамыкту керектер эдер аргагар бар.

⁵Бӱткен бӱдӱмисле јӱреристе, Јасак ажыра ачылган кинчектӱ кычалар биске ӧлӱмди экелерге, ӱйелеристе бойыныҥ ижин эткен.

⁶Је эмди бис Јасактаҥ, бисти киженде туткан ончо немедеҥ јайымдалдыс. Оныҥ учун бичилген Јасакка эмес, Тынга башкартып, Кудайга јаҥыдаҥ јалчы болуп јадыбыс.

⁷Айдарда, не деерибис? Јасак — ол кинчек пе? Јок туру! Је Јасак эмес болзо, кинчек ол не дегенин билбес эдим. Јасак: «Кӱӱнзебе...» — дебеген болзо, андый кӱӱнзешти билбес эдим.

⁸Кинчек дезе јакылтага тайанып, бойымда јӱзӱн-базын кӱӱнзештерди ойгоскон. Јасак јокко кинчек јӱрбей јат ине.

⁹Мен качан да Јасак јокко јӱргем. Је јакылта табыларда, кинчек тынданып келген,

¹⁰мен дезе ӧлӱп калгам. Јӱрӱм берер јакылта меге чындаптаҥ ӧлӱм экелгени јарталган.

¹¹Кинчек дезе јакылтага тайанып, мени тӧгӱндеп, оныҥ болужыла ӧлтӱрип койгон.

¹²Оныҥ учун Јасак агару, јакылта агару, чын ла јакшы.

¹³Анайдарда, јакшы меге ӧлӱм экелди эмеш пе? Јок туру! Карын, мыны кинчек эткен, ол кинчек болуп ачыларга, јакшыны тузаланып, меге ӧлӱм экелген. Кинчек канча кире јаман болгонын јакылта ажыра кӧргӱзерге, анайда болгоны ол.

¹⁴Јасак тынга айдат деп, бис билерибис. Мен дезе эт-канду кижи, кинчекке садылгам.

¹⁵Нени эдип турганымды аайлабайдым. Эдейин дегенди, этпейдим, нени кӧрӧр кӱӱним јок, оны эдедим.

¹⁶Этпейин дегенди эдип турган болзом, Јасак јакшы деп, јӧпсинип јадым.

¹⁷Оныҥ учун мыны мен эдип турган эмезим, је менде јӱрген кинчек эдет.

¹⁸Мен билерим, менде, мениҥ бойымда јакшы јӱрбей јат. Менде јакшыны эдер кӱӱн бар, је оны эдерге менде јакшы јок.

¹⁹Эдейин деген јакшыны, этпейдим, этпейин деген јаманды, эдедим.

²⁰Этпейин дегенди эдип турган болзом, мыны мен эдип турган эмезим, је менде јӱрген кинчек эдип јат.

²¹Анайдарда, јасакты кӧрӱп турум: јакшыны эдейин деген бойымда јаҥыс јаман бар.

²²Ичимдеги кижи Кудайдыҥ Јасагына сӱӱнип јат,

²³је эди-каным ӧскӧ јасакла јӱрӱп јат. Ол санаам јарадып турган јасакка удура тартыжып, эди-канымдагы кинчектӱ јасакка мени олјолоп јат.

²⁴Бараксанды мени! Ӧлӱмге экелеечи бу эт-каннаҥ мени кем јайымдаар?

²⁵Кудайымга алкыш-быйаным, Ол мыны Иисус Христос Кайраканыс ажыра эткен. Анайдарда, мен бойым бойымныҥ санаамла Кудайдыҥ Јасагына кул, је эди-канымла кинчектиҥ јасагына кул.