Read Јаҥы Кереес Римдегилерге 9 Bible Online

Римдегилерге 9 - Јаҥы Кереес bible

Римдегилерге 9

¹Христос алдында чынды айдадым, тӧгӱндебей јадым. Онызын Агару Тынга башкарткан санаам керелейт:

²меге сӱрекей эрикчил, јӱрегимде токтобос сыс.

³Каны јаҥыс карындаштарым учун мен бойым каргышка калып, Христостоҥ айрыткан болзом кайдадым.

⁴Олор Израильдиҥ улузы: олорды Кудай балазынып алган, олорго Бойыныҥ магын ачкан, кереестер ле Јасак берген, Ого бажырып јӱрерин ле Бойыныҥ сӧзин берген.

⁵Олор улу адалардыҥ калдыктары, олордыҥ ортозынаҥ кижи чилеп Христос туулган. Ол ончозынаҥ ӧрӧ турган ӱргӱлји чакка алкышту Кудай. Аминь.

⁶Је бу Кудайдыҥ берген сӧзи кӱчин јылыйтып салган дегени эмес. Израильдеҥ туулган ончо улус Израильдийи эмес ине.

⁷Анайда ок Авраамныҥ ончо калдыктары оныҥ балдары эмес. Је мынайда айдылган: «Исаактаҥ туулганы калдыгыҥ деп адалар».

⁸Ӧскӧртӧ айтса, јӱк эт-каннаҥ туулган балдар Кудайдыҥ балдары эмес, је Оныҥ берген сӧзиле туулган балдар чын калдыктар деп бодолор.

⁹Бат, берген сӧс бу: «Бу ок ӧйдӧ келерим, Сарра уулду болор».

¹⁰Је бу ончозы эмес. Ревеккала база андый болгон. Ол бир кижидеҥ — улу Исаак адабыстаҥ эки уулду болгон.

¹¹Олор туулгалакта, бир јакшыны эмезе бир јаманды эткелекте, Ревеккага айдылган: «Јаан уул кичӱзине јалчы болор». Анайып, Кудайдыҥ табы талдаш ажыра бӱдет, бу талдаш эткен керектердеҥ эмес, Оныҥ кычырузынаҥ камаанду.

¹³Бичилгениле: «Иаковко карузый бергем, Исавты кӧрбӧй баргам».

¹⁴Айдарда, не деерибис? Кудай чын эмес эдет эмеш пе? Јок туру!

¹⁵Ол Моисейге айткан ине: «Быйан эдетениме, быйан эдерим, буурзайтаныма, буурзарым».

¹⁶Оныҥ учун ончозы кижиниҥ кӱӱнинеҥ эмес, оныҥ кичеенип турганынаҥ эмес, быйан эдип турган Кудайдаҥ камаанду.

¹⁷Ол Агару Бичикте фараонго айдат: «Сен ажыра кӱчимди кӧргӱзерим, адым јер-ӱстинде јарлалар. Оныҥ учун сени кӧдӱргем».

¹⁸Анайдарда, Ол быйан эдейин дегенге, быйан эдет, катуландырайын дегенди, катуландырат.

¹⁹Сен меге айтпай кайдарыҥ: «Ол база не учун бурулап турган? Оныҥ табына кем удурлажар?»

²⁰Је сен кем андый, кижи, Кудайла сӧс блаажарга? «Мени не керек андый эттиҥ?» — деп, эдилген неме оны эткен кижиге айдар беди?

²¹Той балкаштыҥ узы бир чейинтиле чӱмдӱ јыракы ла тегин јыракы эдер јаҥы јок по?

²²Кудай дезе Бойыныҥ чугулын ла кӱчин кӧргӱзерге кӱӱнзеп, Оныҥ чугулын алып турган ла ӧлӱмге јаргылаткан улуска килеп, узак чыдашкан.

²³Ол анайда ок макка белетелген, Оныҥ быйанын алып турган улуска Бойыныҥ магыныҥ байлыгын кӧргӱзерге кӱӱнзеген.

²⁴Ол улус бис эдибис. Ол бисти јаҥыс та иудейлердеҥ эмес, је ӧскӧ дӧ калыктардаҥ кычырып алган.

²⁵Бу керегинде Ол анайда ок Осия јарлыкчы ажыра айдат: «Мениҥ эмес калыкты, Мениҥ калыгым деп адаарым, сӱӱбегенди, сӱӱгеним деп адаарым.

²⁶Мениҥ калыгым эмезигер деп айдылган јерде олорды тирӱ Кудайдыҥ уулдары деп адагылаар».

²⁷Исаия дезе Израиль керегинде јарлап јат: «Израильдиҥ уулдарыныҥ тоозы талайдыҥ кумагындый да болзо, јӱк арткан-калганы аргадалар.

²⁸Кайракан јерде Бойыныҥ керегин тӱгезип јат, оны чынынча, јылгыр ла јана баспай бӱдӱрип койор».

²⁹Исаияныҥ озолодо айтканыла: «Саваоф Кайракан калдыктарыска килебеген болзо, Содомдый болор, Гоморрага тӱҥейлежер эдибис».

³⁰Айдарда, не деерибис? Акту болорго јӱткӱбеген ӧскӧ калыктар акталган, Кудайга бӱткени ажыра акталган.

³¹Израильдиҥ улузы дезе, Јасак ажыра акту болорго јӱткӱп, акталбаган.

³²Нениҥ учун? Бӱткениле эмес, јасакты бӱдӱргениле акту болорго јӱткигени учун. Олор бӱдӱрилетен ташка бӱдӱрилгендер.

³³Бичилгениле: «Бат, Сиондо таш салып јадым — ого бӱдӱрилгилеер, кайа-таш салып јадым — оноҥ улам јыгылгылаар. Је Ого бӱдӱп турган кандый ла кижиге уйатту болбос».