Read Јаҥы Кереес 1 Коринфтегилерге 10 Bible Online

1 Коринфтегилерге 10 - Јаҥы Кереес bible

1 Коринфтегилерге 10

¹Адаларыс ончозы булуттыҥ алдында болгонын, ончозы талайды ӧткӱре ӧдӧ бергенин слерди билзин деп турум, карындаштар.

²Ончозы булут ла талай ажыра ӧдӱп, Моисейле бир болорго креске тӱшкен.

³Ончозы тынныҥ бир ле курсагын јиген,

⁴тынныҥ бир ле суузынын ичкен. Олор кожо барып јаткан тынныҥ Кайа-Тажынаҥ ичкен. Кайа-Таш Христос болгон.

⁵Је олордыҥ кӧбизи Кудайдаҥ јараду албай, куба чӧлдӧ ӧлӱп калган.

⁶Јаманга олор чылап тартылбазын деп, бу биске тем болгоны ол.

⁷Анайда ок олордыҥ кезиги чилеп, чалуларга бажырбагар, бичилгениле: «Калык отурып, јиген, ичкен, оноҥ туруп, сооттой берген».

⁸Олордыҥ кезиги чилеп, балыр кылынбайлы. Олор балыр кылынып, бир кӱнге јирме ӱч муҥы ӧлӱп калган.

⁹Олордыҥ кезиги ченегени чилеп, Христосты ченебектер. Олор јыланга чактырып, ӧлӱп калган.

¹⁰Олордыҥ кезиги калактаганы чылап, калактабагар. Олорды Јоголтоочы-Ангел ӧлтӱрип койгон.

¹¹Бу ончозы биске тем эдип олорло болгон; биске, калганчы чакта јӱрген улуска, ӱредӱ болзын деп бичилген.

¹²Оныҥ учун, бек туруп јадым деп сананып јӱрген кижи, јыгылбаска, чеберлензин.

¹³Слерге улусла болуп турган ченелте тӱшкен. Кудай чындык, Ол кӱчигер јетпес ченелтелерди болдыртпас, је ченелте тужында оны ӧдӱп чыгар арга берер.

¹⁴Анайдарда, кару улузым, чалуга бажыратаннаҥ качыгар!

¹⁵Слерге керсӱ улуска чылап айдып турум. Нени айдып турганымды бойыгар сананып кӧригер.

¹⁶Алкыштыҥ айагын алкап турганыста, Христостыҥ каныла бириккенис ол эмес пе? Калашты сындырып турганыста, Христостыҥ эди-каныла бириккенис ол эмес пе?

¹⁷Бу калаш бир, бис кӧп тӧ болзобыс, бир эт-кан боло бередис, нениҥ учун дезе ончобыс бир калашты ӱлежип јадыбыс.

¹⁸Израильдиҥ калыгын кӧригер: тайганды јип тургандары тагылла бириккени ол эмес пе?

¹⁹Мен нени айдып турум? Чалуга тайганда кандый бир учур бар деп пе, эмезе чалуныҥ бойында кандый бир учур бар деп пе?

²⁰Јок эмей. Је ӧскӧ калыктар тайылга эткенде, Кудайга эмес, шилемирлерге тайып јадылар. Мен дезе слерди шилемирлерге бирикпезин деп турум.

²¹Кайраканныҥ айагын да, шилемирлердиҥ айагын да ичип болбозыгар, Кайраканныҥ курсагын ла шилемирлердиҥ курсагын јип болбозыгар.

²²Эмезе Кайраканды ачындырарга турубыс эмеш пе? Бис Оноҥ кӱчтӱ болдыс эмеш пе?

²³Меге ончозын эдерге јараар, је ончозы туза экелбей јат. Меге ончозын эдери јарадылган, је ончозы тыҥыдар арга бербей јат.

²⁴Кем де бойына туза бедиребезин, је ӧскӧ кижиге бедирезин.

²⁵Эттиҥ базарында садылып турганын ончозын бир де шиҥдебей јигер, санаагар амыр болзын.

²⁶Јер ле ондо бар ончо неме Кайракандыйы.

²⁷Кудайга бӱтпей турган улустыҥ кемизи слерди айлына кычырза, слер барар кӱӱндӱ болзогор, алдыгарга салып бергенди бир де шиҥдебей јигер, санаагар амыр болзын.

²⁸Је кем слерге: «Бу чалуга тайылган курсак» — дезе, санаазы токыналу болзын деп, мыны айткан кижиге болуп јибегер.

²⁹Слердиҥ санаагар керегинде эмес, ӧскӧ кижинийи керегинде айдып турум. Нениҥ учун мениҥ јайымымды ӧскӧ кижиниҥ санаазы јаргылаар учурлу?

³⁰Курсакты алкыш-быйанду јип турган болзом, алкыш-быйаным айдып турган курсак учун мени не јамандайтан?

³¹Анайдарда, јип пе, ичип пе, нени де эдип турган болзогор, Кудай макталзын деп эдигер.

³²Иудейлерге де, еллиндерге де, Кудайдыҥ серкпезине де бӱдӱрилер шылтак болбой,

³³мен чилеп эдигер. Мен ончо улуска ончозында јараарга кичеенип, бойыма туза бедиребей, карын, кӧп улуска туза бедиреп, олор аргадалзын деп јадым.