Read Јаҥы Кереес 1 Коринфтегилерге 11 Bible Online

1 Коринфтегилерге 11 - Јаҥы Кереес bible

1 Коринфтегилерге 11

¹Христостоҥ тем алып турганым чылап, менеҥ тем алыгар.

²Менийин ончозын ундыбаганыгар учун, мен слерге берген ӱредӱдеҥ кыйбай јӱргенигер учун слерди мактап турум, карындаштар.

³Анайда ок слерди билзин деп турум: кажы ла эр кижиге баш — Христос, ӱй кижиге баш — ӧбӧӧни, Христоско баш — Кудай.

⁴Бажын јабынып алып мӱргип эмезе судурлап турган кажы ла эр кижи бойыныҥ бажын уйатка тӱжӱрет.

⁵Бажын јабынбай мӱргип эмезе судурлап турган кажы ла ӱй кижи бойыныҥ бажын уйатка тӱжӱрет. Ол бажын јӱлӱдип койгон ӱй кижидий.

⁶Ӱй кижи јабынбаска турган болзо, чачын кайчылазын. Је кайчыладып эмезе јӱлӱдип койгоны ӱй кижиге уйатту болзо, јабынзын.

⁷Анайдарда, эр кижи бажын јабынбас учурлу, нениҥ учун дезе ол — Кудайдыҥ сӱр-кебери ле магы, ӱй кижи — ӧбӧӧниниҥ магы.

⁸Эр кижи ӱй кижидеҥ табылган эмес, ӱй кижи эр кижидеҥ табылган.

⁹Эр кижи ӱй кижиге јайалган эмес, ӱй кижи эр кижиге јайалган.

¹⁰Оныҥ учун ӱй кижи бажын јабынар учурлу. Мынызы дезе, ол јаҥныҥ алдында јӱрген деп, ангелдерге темдек болор.

¹¹Андый да болзо, Кайраканла бир болуп турганда, эр кижи ӱй кижини, ӱй кижи эр кижини толтырат.

¹²Ӱй кижи эр кижидеҥ чилеп, эр де кижи ӱй кижидеҥ табылат, је ончозы Кудайдаҥ болуп јат.

¹³Бойыгар сананып кӧригер, ӱй кижиге бажын јабынбай Кудайга мӱргиирге јакшы ба?

¹⁴Эр кижи узун чачту јӱрзе, мынызы ого уйат деп, слерди ары јанынаҥ берилгени ӱретпей јат па?

¹⁵Је ӱй кижи узун чачту јӱрзе, мынызы ого кӱндӱ. Чач ого јабынчыныҥ ордына берилген ине.

¹⁶Кем сӧс блаажарга кӱӱнзезе, ого айдатаным бу: бисте де, Кудайдыҥ серкпелеринде де ӧскӧртӧ этпей јат.

¹⁷Слерге база айдып, мактабазым, нениҥ учун дезе кӧп сабазында јакшыга эмес, јаманга јуулыжып јадыгар.

¹⁸Јуунга јуулышканыгарда, ортогордо бӧлиниш болуп јат деп, меге угулат. Бого кезектей бӱдӱп јадым.

¹⁹Кудай кемигерди јарадып турганы јарталзын деп, ортогордо јӱзӱн-башка шӱӱлтелер де болор учурлу.

²⁰Анайдарда, кожо јуулышканыгарда, оны Кайраканныҥ ажын јиирге јуулыштыгар деп айдарга јарабас,

²¹нениҥ учун дезе кажыгар ла бойыныҥ ажын јиирге меҥдейт. Анайып бирӱгер аштап артат, ӧскӧгӧр ичинип алат.

²²Ичип-јиирге слерде айыл-јурт јок по? Эмезе Кудайдыҥ Серкпезин јектеп, јоктуларды базынып јадыгар ба? Слерге нени айдар? Мактайтан ба? Бу учун слерди мактабазым.

²³Слерге бергенимди Кайраканныҥ бойынаҥ алдым: садып ийген тӱнде Иисус Кайракан калаш алып,

²⁴алкыш јетирген, сындырала, айткан: «Алыгар, јигер. Бу — слерге сындырылып јаткан эди-каным. Мени эске алынып, анайда эдип јӱригер».

²⁵Анайда ок курсак јигенниҥ кийнинде айакты да алып, айткан: «Бу айак — Мениҥ канымдагы јаҥы кереес. Бу айактаҥ кажы ла сайын ичсегер, Мени эске алыныгар.

²⁶Кажы ла сайын бу калашты јип, бу айакты ичип турганыгарда, Кайракан келбегенче Оныҥ ӧлӱмин јарлап јадыгар».

²⁷Анайдарда, Кайраканныҥ бу калажын јип эмезе айагын ичип, мыны јарамыкту эмес эдип турган кижи, Оныҥ эди ле каны алдында бурулу болор.

²⁸Кижи бойын ченезин, анайып бу калаштаҥ јизин, бу айактаҥ ичсин,

²⁹нениҥ учун дезе, Кайраканныҥ эди-канын сананбай ичип-јип турган кижи бойыныҥ јаргызын ичип-јип јат.

³⁰Мынаҥ улам ортогордо чине јок ло оору улус кӧп, кӧбизи ӧлӱп јат.

³¹Је бойыбысты бойыбыс јаргылаган болзобыс, јаргылатпас эдибис.

³²Бу телекейдиҥ улузыла кожо јаргылабаска, Кайракан бисти јаргылап, кезедип јат.

³³Анайдарда, карындаштарым, курсак јиирге јуулыжып, сакыжыгар.

³⁴Аштап турганыгар айлында ажанып алзын. Слерге јаргыга јуулышпаска анайда эдигер. Келзем, ӧскӧ сурактардыҥ аайына чыгарым.