Read Јаҥы Кереес 2 Коринфтегилерге 10 Bible Online

2 Коринфтегилерге 10 - Јаҥы Кереес bible

2 Коринфтегилерге 10

¹Мен, Павел, ортогордо јӱргемде јобош, слердеҥ ыраакта јӱргемде кату бойым, јобош ло јымжак Христоско болуп слерди сурап турум:

²слерге келзем, мени катуландырбагар, нениҥ учун дезе тегин кижиниҥ сананганыла кылынып јадыс деп, бис керегинде сананып јӱрген кезик улуска кату да болорым.

³Бис улус ортодо јӱрӱп, улус чылап јуулашпайдыс,

⁴нениҥ учун дезе кижиниҥ эмес, Кудайдыҥ мылтык-јепселиле јуулажадыс. Ол шибеелерди јайрадар кӱчтӱ.

⁵Кудайды билип аларга удурлажып турган тӱп-шӱӱлтелерди ле улуркашты јайрадып, кандый ла умзанышты Христоско уккур эдерге олјолойдыс.

⁶Бис, сыраҥай уккур боло берзегер, уккур эмес кандый ла кижини кезедерге белен.

⁷Слер керектиҥ тыш јанын кӧрӱп јадыгар ба? Бойын Христостыйы деп бӱдӱмјилӱ кижи сананып кӧрзин. Ол Христостыйы болзо, бис те Христостыйы.

⁸Бисте бар јаҥла артыктай мактанып турган болзом, уйатка калбас эдим. Бу јаҥды биске Кайракан берген ине, јоголторго эмес, слерди тыҥытсын деп берген.

⁹Слерди самараларла коркыдып турум деп, мен керегинде сананбазын.

¹⁰Кем де айдат: «Самараларда ол кату ла кӱчтӱ. Је бойы кӧрӱнип келгенде, чине јок, айткан сӧзи неге де турбас».

¹¹Андый кижи билип јӱрзин: ортогордо јок тужыбыста самараларда кандый эдибис, ортогордо јӱргенисте керекте андый ла болорыс.

¹²Бойлорын бойлоры кӧргӱзерин сӱӱйтен улусла бойлорысты теҥдеерге эмезе тӱҥейлеерге тидинбейдис. Олор аайлабай, бойлорын бойлорыныҥ кемјӱзиле кемјип, бойлорын бойлорыла тӱҥейлеп јадылар.

¹³Бис дезе ӧйинеҥ ӧткӱре мактанбазыс. Је Кудай биске берген керектердиҥ кирезиле мактанарыс. Бис бу керектерле слерге јеткенис.

¹⁴Слерге келбеген болзобыс, мактанганыс ӧйинеҥ ӧткӱре болор эди. Је бис Христостыҥ Сӱӱнчилӱ Јарын јарлап, слерге јеткенис.

¹⁵Бис, анаар ла, ӧскӧ улустыҥ иштериле мактанбай јадыс, је бӱдӱп турганыгар тыҥыган сайын ортогордо оноҥ кӧп керектер эдерис деп, иженип турубыс.

¹⁶Ол тушта слердеҥ арыгы јерлерде Сӱӱнчилӱ Јарды јарлап, ӧскӧ улус эткен керектерле мактанбазыс.

¹⁷Мактанып турган кижи, Кайраканла мактанзын.

¹⁸Бойын бойы мактап турган кижи эмес, карын, Кайраканга мактатканы јарамыкту ине.