Read Јаҥы Кереес 2 Коринфтегилерге 13 Bible Online

2 Коринфтегилерге 13 - Јаҥы Кереес bible

2 Коринфтегилерге 13

¹Слерге ӱчинчи катап барып јадым. Кандый ла керек эки эмезе ӱч кижи керелегенде кӧрӱлет.

²Экинчи катап келип турарымда, кинчек эткен улуска, арткан ончо улуска озолондыра айткам, эмди слерде јок тужымда бичип турум: ойто келзем, олорды килебезим.

³Мен ажыра чындаптаҥ Христос айдып туру ба деп, слерге кӧргӱзерин тыҥ кӱӱнзеп јадыгар. Ол слерге чине јок эмес, је Ол слердиҥ бойыгарда кӱчтӱ.

⁴Ол чине јок тужында керилген, је Ол Кудайдыҥ кӱчиле тирӱ. Бис те Христос чылап ок чине јок, је слерге болуп Кудайдыҥ кӱчиле Оныла кожо јӱрерис.

⁵Чындаптаҥ бӱдӱп турганыгар ба деп, бойыгарды бойыгар ченегер, бойыгарды бойыгар шиҥдегер. Эмезе бойыгарда Иисус Христос јӱрӱп јат деп, бойыгарды бойыгар билбейдигер бе? Андый эмес болзо, ченелтени ӧдӱп албаган болороор бо?

⁶Бис дезе ченелтени ӧткӧнисти билип аларыгар деп, иженип турум.

⁷Слерди бир де јаманды этпезин деп, Кудайга мӱргийдис. Ченелтени ӧткӧнис деп, бойыбысты кӧргӱзерге мынайда эдип турган эмезис, је оны ӧдӱп албаганыс деп билдирзе де, јакшыны эдигер деп кӱӱнзейдис.

⁸Бистиҥ кӱчибис чындыкка удура эмес, чындык учун.

⁹Бис чине јок, слер кӱчтӱ тужыгарда сӱӱнип јадыбыс. Ол учун, слерди тӱзелзин деп мӱргийдис.

¹⁰Оныҥ учун ортогордо јок тужымда мыны бичип јадым. Слерге келзем, јаҥды тузаланып, кату болор кӱӱним јок. Бу јаҥды Кайракан тутсын деп берген, јайратсын деп эмес.

¹¹Адакыда, карындаштар: сӱӱнигер, толо кемине једигер, бой-бойыгарды кӧкӱдигер, санаагар јаҥыс болзын, амыр-энчӱ јӱригер. Ол тушта сӱӱштиҥ ле амырдыҥ Кудайы слерле кожо болор.

¹²Бой-бойыгарла агару окшошло эзендежигер. Слерге ончо агарулар эзен айдып турулар.

¹³Иисус Христос Кайраканыстыҥ јакшылыгы, Ада Кудайдыҥ сӱӱжи ле Агару Тынныҥ бирлиги ончогорло кожо болзын. Аминь.