Read Јаҥы Кереес 2 Коринфтегилерге 2 Bible Online

2 Коринфтегилерге 2 - Јаҥы Кереес bible

2 Коринфтегилерге 2

¹Слерди ойто ачуркандырбаска келбейин деп, бойымда бойым шӱӱдим.

²Слерди ачуркандырып турган болзом, мен ачуркандырган слердеҥ ӧскӧ кем мени сӱӱндирер?

³Оныҥ учун келзем, сӱӱндирер учурлу улус мени ачуркандырбазын деп, бу керегинде слерге бичип турум. Мениҥ сӱӱнчим — ол ончогорго до сӱӱнчи деп, мен бӱдедим.

⁴Слерге јаан ачу-коронго тӱжӱп, јӱрегим сыстап, кӧстиҥ јажын кӧп тӧгӱп бичийдим. Ачуркандырайын деп эмес, слерге кандый тыҥ карузып турганымды билип алзын деп бичидим.

⁵Мени ачуркандырган кижи мени эмес, је кезектей, кӧпчитпей айтса, ончогорды да ачуркандырганы ол.

⁶Ого кӧбигердеҥ алган андый кезедӱ једер.

⁷Ол тыҥ кунукка алдыртпазын деп, слерге оныҥ бурузын таштап, кооттогоны артык болор.

⁸Оныҥ учун ого карузып турганыгарды кӧргӱзигер деп, сурап турум.

⁹Ченелтени чыдажып ӧткӧнигер бе, ончозында уккур ба деп билерге бичигеним ол.

¹⁰Је кемниҥ де бурузын таштап турган болзогор, оныйын мен де таштап јадым. Сатана бисти тӧгӱндеп болбозын деп, мен де, таштайтан буру бар болзо, оны слерге болуп Христостыҥ алдында таштагам.

¹¹Бис оныҥ умзаныштарын билер эмейис.

¹²Христос керегинде Сӱӱнчилӱ Јар јарлайын деп, Троадага келеримде, Кайракан меге эжикти ачкан.

¹³Је мен токунап болбой тургам — анда Тит карындажымды таппагам. Бат оныҥ учун олорло јакшылажып алала, Македония јаар јӱре бергем.

¹⁴Је Кудайга баш болзын, Ол биске јаантайын Христосло кожо јеҥӱни байрамдаарга берип, Бойы керегинде билгирди јараш јытты чылап бис ажыра кайда ла таркадат.

¹⁵Бис — аргадалып јаткан улус ортодо ло ӧлӱп јаткан улус ортодо Кудайга Христостыҥ јараш јыды.

¹⁶Кезик улуска бис — ӧлӱмниҥ ӧлӱмдӱ јыды, ӧскӧлӧрине — јӱрӱмниҥ јӱрӱмдик јараш јыды. Бу керекке кем јараар?

¹⁷Кӧп улус чылап, Кудайдыҥ сӧзиле садышпай јадыбыс ине. Је бис Кудайдаҥ ийилген улус чылап, Оныҥ алдына Христостыҥ шылтузында ачык-јарык айдадыс.