Read Јаҥы Кереес 2 Коринфтегилерге 6 Bible Online

2 Коринфтегилерге 6 - Јаҥы Кереес bible

2 Коринфтегилерге 6

¹Бис, Кудайга кожо иштеп турган улус, слерди јайнап турубыс: Кудайдыҥ јакшылыгын темей албагар.

²Ол айдат: «Сени јарамыкту ӧйдӧ уктым, сеге аргадаштыҥ кӱнинде болуштым». Бат эмди јарамыкту ӧй, бат эмди аргадаштыҥ кӱни једип келди.

³Јалчы болуп јӱргенистеҥ кем де јик таппазын деп, кемге де кандый да буудак этпейдис.

⁴Карын, ончозында бойыбысты Кудайдыҥ јалчылары деп кӧргӱзедис: узакка чыдажып турганыста, тӱбекке тӱшкенисте, не-немедеҥ тутакту јӱргенисте, уур-кӱч айалгаларга учураганыста,

⁵бисти согуп, тӱрмелеп, истежип турганда, кӧп иштеп, уйкузы јок тӱндерди ӧткӱрип, торолоп турганыста;

⁶бис бойыбысты Кудайдыҥ јалчылары деп, арубысла, билимисле, турумкайысла, быйанзагысла, Агару Тынла, ару сӱӱжибисле,

⁷чындыктыҥ сӧзиле, Кудайдыҥ кӱчиле, оҥ ло сол колыбыста тудунган чынныҥ мылтык-јепселиле кӧргӱзедис.

⁸Биске кӱндӱ де эдип, уйатка да тӱжӱрип турганда, јамандап та, мактап та турганда, бойлорысты Кудайдыҥ јалчылары деп кӧргӱзедис. Бисти тӧгӱнчи деп бодойдылар, је бис чындык.

⁹Бисти таныбайдылар, је бис танылу. Бисти ӧлгӧн деп бодойдылар, је бат, бис тирӱ. Бисти кезедедилер, је бис ӧлбӧйдис.

¹⁰Бисти ачуркандырадылар, је бис јаантайын сӱӱнип јӱредис. Бис јокту, је кӧп улусты байыдадыс. Бисте не де јок, је ончо немелерди ээлейдис.

¹¹Бис слерге ачыгынча айтканыс, Коринфтиҥ улузы, слерге јӱректерис кеҥиде ачык.

¹²Јӱректеристе слерге јаантайын јер бар, је слер биске јӱректеригерди јаап јадыгар.

¹³Балдарыма чылап айдып турум: биске андый ок каруу эдип, јӱректеригерди ачыгар!

¹⁴Кудайга бӱтпес улусла кожо бир комутка јегинбегер. Акту ла јарамас ортодо текши не де болор аргазы бар ба? Јарыкта караҥуйла текши не бар?

¹⁵Христос ло Велиар[3] ортодо эп-јӧп болор аргазы бар ба? Эмезе бӱдӱп турган кижиде бӱтпес кижиле кандый ӱлӱӱ бар?

¹⁶Кудайдыҥ байзыҥына чалулар келижер бе? Слер — тирӱ Кудайдыҥ байзыҥы, Кудайдыҥ мынайда айтканыла: «Мен слерге келип јуртай берерим, ортогордо јӱрерим. Мен слердиҥ Кудайыгар болорым, слер Мениҥ калыгым болорыгар».

¹⁷«Оныҥ учун олордыҥ ортозынаҥ чыгып, олордоҥ бӧлӱнигер, — деп, Кайракан айдат, — ару эмеске тийбегер, Мен слерди јуудып аларым».

¹⁸«Мен слерге Ада болорым, слер Мениҥ уулдарым ла кыстарым болорыгар — деп, кӱчтӱдеҥ кӱчтӱ Кайракан айдат».