Read Јаҥы Кереес 2 Коринфтегилерге 8 Bible Online

2 Коринфтегилерге 8 - Јаҥы Кереес bible

2 Коринфтегилерге 8

¹Карындаштар! Македонияныҥ серкпелерине Кудай берген јакшылыкты билигер деп турубыс:

²олор ачу-коронло улу ченелтелер ӧдӱп јадылар, је сӱӱнчиле артыктай толо. Тӱреҥиде јӱрӱп јадылар, је улуска кӱӱнзегиле бай.

³Олор бойлоры кӱӱнзеп, арга-кӱчи јеткенин, арга-кӱчи јетпезин де берген деп, керелеп турум.

⁴Олор јакшылыкту болуп, агаруларга болужарында туружарга, бисти сӱрекей сурагандар.

⁵Је неге иженгенистеҥ кӧпти эдип, бойлорын бойлоры бергендер. Олор бойлорын озо Кайраканга, оноҥ, Кудайдыҥ табыла, биске де бергендер.

⁶Оныҥ учун слерде бойы баштаган быйанду керекти тӱгессин деп, Титти сураганыс.

⁷Слерде ончозы артыктай: бӱдедигер, слерде Кудайдаҥ сӧс лӧ билгир бар, ончозында кичеенип јадыгар. Слерде бистеҥ алган сӱӱш бар. Андый болгондо, бу да јакшылыкта артыктай болыгар.

⁸Мен јакарбай јадым, је ӧскӧ улустыҥ кичеенгенин айдып, сӱӱжигердиҥ чындыгын ченейдим.

⁹Слер Иисус Христос Кайраканыстыҥ јакшылыгын билер эмейигер. Ол бай болгон, Бойыныҥ јоктузыла слерди байызын деп, слерге болуп јоксыраган.

¹⁰Слерге јӧп айдып турум. Бу керек слерге тузалу болор. Оны јаҥыс та эдип баштаган эмезигер, је былтырдаҥ бери эдерге кӱӱнзедигер.

¹¹Бу ишти учына јетире эдигер. Нени тыҥ кӱӱнзеп јадыгар, анайып тыҥ кӱӱнзеп учына јетире чыгыгар.

¹²Берерге кӱӱнзеп турган болзогор, слерде барынаҥ алып јадылар, слерде јогынаҥ эмес.

¹³Ӧскӧ улуска јеҥил, слерге дезе уур-кӱч болбос, теҥ болор учурлу.

¹⁴Эмди бойыгардыҥ артыкташканынаҥ олордо не јетпезин берер аргагар бар. Оноҥ олордо артыктажып турза, олор слерде не јетпезин берер. Анайып теҥ болор.

¹⁵Бичилгениле: «Кӧп јууган кижиде артыгы јок болгон; ас јууган кижиде јетпези јок болгон».

¹⁶Кудайга баш болзын, Ол Титтиҥ јӱрегине слерге андый кичеемел эдер кӱӱн салган.

¹⁷Титти сураган да болзом, ол бойы тыҥ кӱӱнзеп, слерге бойыныҥ кӱӱниле барды.

¹⁸Оныла кожо анайда ок бир карындашты ийдис. Сӱӱнчилӱ Јарга иштеп јӱргени учун оны ончо серкпелер јарадып јадылар.

¹⁹Анайда ок, бу быйанду ишти бӱдӱрзин деп, оны серкпелер бисти ӱйдежип јӱрзин деп туткандар. Бис Кайраканныҥ магына иштеп, мыны тыҥ кӱӱнзеп эдип јадыбыс.

²⁰Андый кӧп сыйларла нени эдип турганыгар јанынаҥ кем де каарып айдып болбозын деп кичеенедис.

²¹Јаҥыс та Кайраканныҥ алдында эмес, улустыҥ да алдында јакшы кылынарга кичеенедис.

²²Олорло кожо база бир карындажысты ийдис. Оныҥ кичееҥкей болгоны кӧп айалгаларда ченелген. Эмди ол слерге тыҥ бӱдӱмјилӱ болуп, там кичеенет.

²³Тит керегинде айтса, ол мениҥ јолдожым ла слерде кожо иштеп турган кижим болор. Арткан карындаштарыс керегинде айтса, олор — серкпелердиҥ элчилери, олор ажыра Христос макталат.

²⁴Анайдарда, ончо серкпелер олорго карузып турганыгарды кӧрӱп, слерле јолду мактанып турганысты билип алзын.