Read Јаҥы Кереес Галаттарга 6 Bible Online

Галаттарга 6 - Јаҥы Кереес bible

Галаттарга 6

¹Карындаштар! Кандый-бир кинчекке туттурган кижини слер, тынла јӱргендер, тӱзедигер. Је мыны јобош тынла эдигер. Бойыгар кинчекке туттурбаска, кажыгар ла бойыгарга ајарыҥкай болыгар.

²Бой-бойыгардыҥ јӱктеригерди апарыжыгар. Анайып, Христостыҥ Јасагын бӱдӱрип койорыгар.

³Кем де эмес бойы, бойын кем де деп бодогон кижи, бойын бойы астырат.

⁴Кажы ла кижи бойыныҥ керектерин ченезин, ол тушта ӧскӧ улустаҥ эмес, бойы бойында јараду алар.

⁵Кажы ла кижи бойыныҥ јӱгин апарар ине.

⁶Сӧслӧ ӱредӱ алып турган кижи ӱредӱчизиле ончо јакшыла ӱлешсин.

⁷Аспагар! Кудайды электеер арга јок. Кижи нени ӱрендеер, оны јууп алар.

⁸Эт-канына болуп ӱрендеечи, эт-каннаҥ чирип турганды јууп алар; Тынга болуп ӱрендеечи, Тыннаҥ ӱргӱлји јӱрӱмди јууп алар.

⁹Јакшыны эдип, јобобойлы. Уйадабазабыс, бойыныҥ ӧйинде тӱжӱмди јууп аларыс.

¹⁰Анайдарда, эм тура ӧй бар тушта, ончо улуска јакшыны эдели, анчада ла бӱдӱп турган улузыска.

¹¹Бу јаан таныктарды кӧрӱп турыгар ба? Олорды мен слерге акту бойымныҥ колымла бичидим.

¹²Слерди томдонзын деп албадап тургандар улуска јараар кӱӱндӱ. Олор мыны Христостыҥ керӱ агажы учун сӱрдӱрбеске болуп эдедилер.

¹³Олор, томдолгон до болзо, бойлоры Јасакты бӱдӱрбейдилер, слерди дезе тыш керектеригерле мактанарга, томдолзын деп кӱӱнзейдилер.

¹⁴Иисус Христос Кайраканыстыҥ керӱ агажынаҥ башка, Мен неле де мактанар кӱӱним јок. Бу керӱ агаштыҥ шылтузында меге телекей ӧлӱп калган, мен телекейге ӧлӱп калгам.

¹⁵Кижи томдолгон бо, томдолбогон бо, Христос Иисустыҥ Бойында бир де учур јок ине. Је ол Кудайдыҥ јаҥы јайалганы боло бергени учурлу.

¹⁶Бу ээжиле јӱрӱп турган улуска, Кудайдыҥ Израилине амыр ла быйан јетсин.

¹⁷Адакыда айдарым бу: мени кем де јоботпозын, нениҥ учун дезе эди-канымда Иисус Кайраканныҥ сорбуларын алып јӱрӱм.

¹⁸Иисус Христос Кайраканыстыҥ јакшылыгы слердиҥ тыныгарла болгой, карындаштар. Аминь.