Read Јаҥы Кереес 1 Фессалоникадагыларга 5 Bible Online

1 Фессалоникадагыларга 5 - Јаҥы Кереес bible

1 Фессалоникадагыларга 5

¹Ӧйлӧр лӧ кӱндер керегинде слерге бичийтени керек јок, карындаштар.

²Кайраканныҥ кӱни тӱнде уурчы чылап келерин бойыгар да быжу билеригер.

³«Амыр, кайдаҥ да јеткер јок» дешкилеп турза, олорго сакыбаган јанынаҥ јайраду табарар. Ол барлу ӱй кижини толголткон оорудый болор. Олор мынаҥ бир де кыйыжып болбос.

⁴Слер дезе, карындаштар, карачкыда эмезигер, ол кӱн слерге уурчы чылап једе конбос.

⁵Слер ончогор — јарыктыйы ла тӱштийи болуп јадыгар. Бис тӱндийи де, карачкыныйы да эмезис.

⁶Анайдарда, ӧскӧлӧри чилеп уйуктабайлы, је ойгу ла сергек бололы.

⁷Уйуктап турган улус тӱнде уйуктайдылар, ичип тургандары тӱнде ичинип аладылар.

⁸Бис дезе, тӱштиҥ улузы, сергек бололы. Бойыбыска бӱдетенин ле сӱӱшти алалы, ол кӧӧ-куйагыс болор; аргадаларыс деп, бойыбыска ижемјини алалы, ол јуучыл бӧрӱгис болор.

⁹Кудай бисти чугул кӧрзин деп эмес, Иисус Христос Кайраканыс ажыра аргадаш алзын деп туткан.

¹⁰Ойгу ба, айса уйуктап јатканыс па, Оныла кожо јӱрзин деп, Ол бис учун ӧлгӧн.

¹¹Оныҥ учун, эмди эдип турганыгар чылап, бой-бойыгарды кӧкӱдип, бой-бойыгарды тыҥыдыгар.

¹²Слерди, карындаштар, сурап турубыс: Кайраканга болуп јол кӧргӱзип, санандырып, ортогордо иштеп јӱргендерди тоогор.

¹³Олорго буурзап, эдип јӱрген ижи учун эҥ бийик кӱндӱӱ эдигер. Ортогордо амыр болзын.

¹⁴Анайда ок слерди, карындаштар, кычырып турубыс: акара баш јок улусты санандырыгар, чинези јокты кӧкӱдигер, јӱдектерди јӧмӧгӧр, ончо улуска узакка чыдамкай болыгар.

¹⁵Кемге де јаманныҥ ордына јаманды јандыра бербегер. Карын, бой-бойыгарга ла ончо улуска јаантайын быйанзак болыгар.

¹⁶Јаантайын сӱӱнип јӱригер.

¹⁷Туркаары мӱргигер.

¹⁸Ончозы учун алкыш јетиригер. Слерге, Христос Иисусла бирлик болуп јӱргендерге, Кудайдыҥ табы андый.

¹⁹Тынды ӧчӱрбегер.

²⁰Судурлап айдылганды јектебегер.

²¹Ончозын ченеп кӧригер, јакшыдаҥ тудуныгар.

²²Кандый ла јаманнаҥ кыйыжыгар.

²³Амырдыҥ Кудайы Бойы слерди толо агарулазын; Иисус Христос Кайраканыс келеринде тыныгар, јулагар ла эдигер бӱткӱл, јек јок болуп чеберлелзин.

²⁴Слерди кычырып турганы чындык, Ол мыны јайаар.

²⁵Карындаштар, бис те учун мӱргигер.

²⁶Ончо карындаштарды агару окшошло уткыгар.

²⁷Кайраканла слерди сурап турум: бу самараны ончо агару карындаштарга кычырыгар.

²⁸Иисус Христос Кайраканыстыҥ јакшылыгы слерле кожо. Аминь.