Read Јаҥы Кереес Филимонго 1 Bible Online

Филимонго 1 - Јаҥы Кереес bible

Филимонго 1

¹Иисус Христостыҥ кижендӱзи Павелдеҥ ле Тимофей карындаштаҥ — бисле кожо иштеп турган кару Филимонго,

²анайда ок сӱӱген Апфия эјебиске, тартыжуда кожо туружып турган Архиппке ле айлыҥдагы серкпеге.

³Слерге Кудай Адабыстаҥ ла Иисус Христос Кайраканнаҥ јакшылык ла амыр јетсин.

⁴Мӱргип тургамда, сени јаантайын эске алып, Кудайымга алкыш јетиредим, нениҥ учун дезе

⁵ончо агаруларга карузып, Иисус Кайраканга бӱдӱп турганыҥды угуп јадым.

⁶Сениҥ бӱдӱп турганыҥ ончобысла текши болзын деп, мӱргип турум. Мынызы сени Христос Иисуска болуп бисте бар ончо јакшыны билип аларына экелер.

⁷Сениҥ сӱӱжиҥ меге улу сӱӱнчи ле коот берген, сен ажыра, карындаш, агарулардыҥ јӱректери токынаган.

⁸Оныҥ учун нени эдетениҥди јакарарга Христостыҥ Бойында улу тидимдӱ болуп,

⁹је сӱӱшке болуп сурап турум. Ӧскӧ кем де эмес, мен, карган Павел, эмди дезе Иисус Христостыҥ кижендӱзи бойым,

¹⁰сени Онисим[1] уулым учун сурап турум. Ол кижендӱ тужымда мениҥ уулым боло берген.

¹¹Башкыда ол сеге туза јок болгон, эмди дезе, сеге де, меге де тузалу.

¹²Мен оны сеге кайра ийип јадым, оны јӱрегимди чилеп уткы.

¹³Мен Сӱӱнчилӱ Јардыҥ киженинде јӱрген тужымда сениҥ ордыҥа меге болушсын деп, оны бойымла кожо артырарга санангам.

¹⁴Је јӧбиҥ јокко нени де этпеске санангам. Сен јакшыны албанла эмес, акту кӱӱниҥле этсин деп турум.

¹⁵Айса болзо, ол сенеҥ кыска ӧйгӧ айрылган, сен оны јажына јуудып алзын деп,

¹⁶кулды чылап эмес, је кулдаҥ бийик чилеп, кару карындажыҥды чылап. Ол меге сӱрекей баалу, је сеге оноҥ баалу, кижи де чилеп, Кайраканныҥ Бойындагы карындаш та чылап.

¹⁷Анайдарда, мениле бирлик болзоҥ, оны мени чилеп јуудып ал.

¹⁸Ол сеге јаман эткен болзо, эмезе тӧлӱлӱ болзо, сеге мен тӧлӱлӱ деп бодо.

¹⁹Мен, Павел, бойымныҥ колымла бичидим: мен тӧлӧп берерим. Сен бойыҥ да меге тӧлӱлӱ, ол тӧлӱ — сениҥ јӱрӱмиҥ, онызын айтпай да јадым.

²⁰Эйе, карындаш, Кайраканныҥ Бойында меге тузалу бол, јӱрегимди Кайраканныҥ Бойында токынадып кой.

²¹Сӧсуккурыҥа бӱдӱмјилӱ болуп, айдып турганымнаҥ кӧп эдериҥди билип, сеге бичидим.

²²Анайда ок меге кып белетеп кой, нениҥ учун дезе Кудай мӱргигенеерди угуп, мени слерге келерге быйан берер деп, иженип турум.

²³Христос Иисуска болуп мениле кожо кижендеткен Епафрас,

²⁴кожо иштеп турган улузым Марк, Аристарх, Димас ла Лука сеге эзен айдып турулар.

²⁵Иисус Христос Кайраканныҥ јакшылыгы слердиҥ тыныгарла болзын. Аминь.