Read Јаҥы Кереес Еврейлерге 11 Bible Online

Еврейлерге 11 - Јаҥы Кереес bible

Еврейлерге 11

¹Кудайга бӱдери — ол неге иженип јӱргениске бӱдӱмјилӱ болоры. Ол кӧрӱнбей турган немелерди чын эдет.

²Бӱдӱмји ажыра улу адалар Кудайдаҥ јараду алган.

³Бӱдӱмјибис ажыра орчылаҥ Кудайдыҥ сӧзиле јайалган деп, кӧрӱнип турган немелер кӧрӱнбей тургандарынаҥ табылган деп, аайлап јадыбыс.

⁴Бӱдӱмји ажыра Авель Кудайга Каиндийинеҥ артык тайылга эткен. Бӱдӱмји ажыра ол акту кижи деп, Кудайдаҥ кере алган, нениҥ учун дезе оныҥ тайылгазын Кудай бойы јараткан. Бӱдӱмјиле ол, ӧлӱп калган бойы, эмдиге јетире айтканча.

⁵Бӱдӱмји ажыра Енох јердиҥ ӱстинеҥ алылып, ӧлӱм кӧрбӧгӧн. Оны таап болбогондор, нениҥ учун дезе оны Кудай Бойына алып алган. Ол јердеҥ алылардаҥ озо Кудайга јараган деп, ого кере берилген болгон.

⁶Бӱдӱмји јокко, Кудайга јараар арга јок. Ол бар деп, Оны чын бедиреп јӱрген улуска кайрал болор деп, Кудайга келип турган кижи бӱдер учурлу.

⁷Бӱдӱмји ажыра Нойго кӧрӱнбей турганы озолондыра айдылган. Ол Кудайдаҥ айап, айлы-јуртын аргадаарга ковчег туткан. Мынайып бӱдӱмји ажыра ол бу телекейдиҥ улузын јаргылап, бӱдӱмји ажыра берилип турган акту болорын энчи эдип алган.

⁸Бӱдӱмји ажыра Авраам Кудайдыҥ кычырузын угуп, энчи эдип алатан јерге барган. Ол кайдаар барып јатканын билбей, јӱре берген.

⁹Бӱдӱмји ажыра ол Кудай берер болгон јерде ӧскӧ ороонныҥ кижизи чилеп јӱрген. Ол андый ок энчи алар болгон Исаакла, Иаковло кожо чадырларда јаткан.

¹⁰Авраам мынайда јӱрӱп, Кудай чӱмдеп туткан бек тӧстӱ каланы сакыган.

¹¹Бӱдӱмји ажыра Сарра, бала таппас бойы, јажай да берген болзо, барланып, бала тапкан. Ол сӧзин берген Кудай чындык деп билген.

¹²Анайып, Авраамнаҥ, керек дезе ӧлӱмжиреп калган кижидеҥ, теҥеридеги јылдыстардый, талайдыҥ јарадындагы кумактый тоо јок калдыктар туулган.

¹³Олор ончозы ӧлӧрдиҥ ӧлгӧнчӧ Кудайга бӱткендер. Оныҥ берер болгонын албагандар, је мыны јӱк ыраагынаҥ кӧрӱп, ого сӱӱнип, бис јерде ӧскӧ ороонныҥ улузы, туш-туура улус деп, бойлоры керегинде ачыгынча айдып јӱргендер.

¹⁴Мынайда айдып јӱрген улус тӧрӧлин бедиреп турганын кӧргӱзип јат.

¹⁵Олор чыгып барган јерин сананган болзо, ого бурылар аргалу болор эди.

¹⁶Је олор мынаҥ артыгына — теҥеридеги тӧрӧлине јӱткиген. Оныҥ учун Кудай да олордыҥ Кудайы деп ададарга уйалбайт. Ол бу улуска кала белетеп койгон ине.

¹⁷Бӱдӱмји ажыра Авраам Исаакты тайган. Оны Кудай ченеп турарда, Кудайдыҥ берген сӧзин алган бойы, сок јаҥыс уулын тайарга белен болгон.

¹⁸Бу уулы керегинде айдылган: «Сениҥ калдыктарыҥ Исаактаҥ болор».

¹⁹Кудай ӧлгӧн улусты тиргизер аргалу деп, Авраам бодогон. Сӱрлеп айтса, ол бойыныҥ уулын ӧлӱмнеҥ кайра алган.

²⁰Бӱдӱмји ажыра Исаак келер ӧйдӧ бу бӱдер деп сананып, Иаков ло Исавты алкаган.

²¹Бӱдӱмји ажыра Иаков ӧлӧр алдында Иосифтиҥ кажы ла уулына алкыжын берип, тайагына јӧлӧнип, Кудайга бажырган.

²²Бӱдӱмји ажыра Иосиф ӧлӧр алдында Израильдиҥ улузы Египеттеҥ чыгып баратанын эске алындырып, сӧӧгин кайда тудатанын јакыган.

²³Моисей тууларда, оны ада-энези бӱдӱмјизи ажыра ӱч ай јажырган. Бала кеен-јараш болгонын кӧрӱп, олор каанныҥ јакарузын бузарга коркыбагандар.

²⁴Бӱдӱмји ажыра Моисей, чыдап келеле, фараонныҥ кызыныҥ уулы деп ададарынаҥ мойногон.

²⁵Удурумга кинчекте сайрап јӱргенче, Кудайдыҥ калыгыла кожо кыйналып јӱрерин артыксынган.

²⁶Ол келер ӧйдӧги кайралды сананып, Христоско болуп јамандадарын Египеттиҥ эрјинезинеҥ баалу деп бодогон.

²⁷Бӱдӱмји ажыра ол Египетти таштап, каан чугулданат деп коркыбаган. Ол кӧрӱнбес Кудайды кӧрӱп турган чылап, чыдамкай болгон.

²⁸Јайрадаачы-ангел тун балдарга тийбезин деп, ол бӱдӱмји ажыра Пасханыҥ тайылгазын эдип, эжиктердиҥ јаактарын канла ӱрӱстеген.

²⁹Бӱдӱмји ажыра Израильдиҥ улузы Кызыл талайды кургак јерле чилеп кечкен. Египеттиҥ улузы база кечейин дейле, чӧҥӱп калган.

³⁰Бӱдӱмји ажыра Израильдиҥ улузы јети кӱнниҥ туркунына Иерихонды эбире баскан кийнинде каланыҥ стенелери јемириле берген.

³¹Бӱдӱмји ажыра балыр јӱрӱмдӱ Раав бакпас улусла кожо ӧлбӧгӧн, нениҥ учун дезе кайучылдарды айлына кӱӱнзеп кийдирген.

³²База нени айдайын? Гедеон, Варак, Самсон, Иеффай, Давид, Самуил ле јарлыкчылар керегинде айдарга меге ӧй јетпес.

³³Олор бӱдӱмји ажыра каандыктарды јеҥген, чынды јайаган, Кудайдыҥ берер болгонын алган, арсландарды јобожыткан,

³⁴оттыҥ јалбыжын ӧчӱрген, кылыштыҥ мизинеҥ аргаданган, чине јок бойлоры кӱч алган, јуу-согушта катан боло берген, ӧскӧ јердиҥ черӱлерин сӱрген.

³⁵Ӱй улус бойлорыныҥ ӧлӱп калгандарын ойто тирӱге алган. Кезиктери кыйнадып, мынаҥ артык јӱрӱмге тирилерге, јайымнаҥ мойногон.

³⁶Ӧскӧлӧри электеткен, камчылаткан, анайда ок кынјылаткан, тӱрмеде отурган,

³⁷ташла шыбалаткан, киреле кестирген, кылыштаҥ ӧлгӧн, кой ло эчки терези кийимдӱ тенип јӱрген, јоксыраган, кыйналган, базынчыкта јӱрген.

³⁸Телекей бу улуска јарамык эмес болгон. Олор куба чӧлдӧрдӧ, кырларда, куй-таштарда ла капчалдарда азып-тозуп јӱргендер.

³⁹Олор ончозы бӱдӱп, ол керегинде кере алган. Је Кудайдыҥ берер болгонын албаган,

⁴⁰нениҥ учун дезе, олор бисле кожо толо кемине јетсин деп, Кудай биске артык болгонды белетеп койгон.