Read Јаҥы Кереес Еврейлерге 12 Bible Online

Еврейлерге 12 - Јаҥы Кереес bible

Еврейлерге 12

¹Оныҥ учун бисти эбире андый кӧп керечилер бар болуп, базырып турган кандый ла јӱкти, капкыр кинчекти бойыбыстаҥ алып, туура таштактар. Иисуска кӧрӱп, биске темдектелген тартыжуны чыдамкай болуп ӧдӧли. Ол ажыра Кудайга бӱдӱп баштайдыс, бӱдӱп јӱргенис толо кемине једет. Ого темдектелген сӱӱнчиниҥ ордына Ол уйатка каларын керекке албай, керӱ агашта кыйынды чыдажып ӧдӱп, Кудайдыҥ ширеезиниҥ оҥ јанына отурып алган.

³Кинчектӱ улустыҥ удурлашканына чыдашкан Иисус керегинде шӱӱп кӧригер. Ол тушта чинегер чыкпас, сӱригер тӱшпес.

⁴Кинчекке удура тартыжуда эм тура, кан тӧгӱлгенче, удурлашпадыгар,

⁵слерге уулдарына чылап мынайда айдылган коот сӧстӧрди ундып койдыгар: «Уулым, сени Кайракан кезедип турганда, мыны јектебе, каарып айдып турганда, сӱриҥ тӱшпезин,

⁶нениҥ учун дезе Кайракан буурзап турган кижизин кезедет, Бойына јуудып турган кажы ла уулын сабайт».

⁷Кезедӱге чыдажып турганыгарда, Кудай слерле уулдарыла чылап Бойын тудат. Адазы кезетпей турган уул бар эмеш пе?

⁸Ончо уулдар кезедилер учурлу. Кезедилбей турган болзогор, слер уулдары эмезигер, слер — сурас балдар.

⁹Анайда ла бисти јердеги ада-энебис кезедип туратан, бис олордоҥ айап јӱргенис. Андый болгондо, јӱрӱм јӱрерге, тындардыҥ Адазына оноҥ артык багар учурлу эмезис пе?

¹⁰Бисти јердеги адаларыс кыска ӧйгӧ лӧ бойлоры чын деп бодогоныла кезеткен. Теҥеридеги Ада дезе биске чын туза болзын, Оныҥ агарулыгында кожо турушсын деп кезедет.

¹¹Кандый да кезедӱ эдилип турганда, сӱӱндирбей, кунуктырат. Мыныҥ кийнинде бу ажыра ӱредип койгон улуска амыр ла акту јӱрӱм берет.

¹²Оныҥ учун бош салынган колдорыгарды ла уйадай берген тизегерди тыҥыдыгар.

¹³Аксак бут бертинбезин, карын, јазылзын деп, будыгардыҥ алдында јолды тӱс эдигер.

¹⁴Ончо улусла амыр јадарга, агару јӱрӱмдӱ болорго кичеенигер. Бу јокко Кайраканды кем де кӧрӱп болбос.

¹⁵Ајарып јӱригер, кем-кем Кудайдыҥ јакшылыгы јокко артып калбазын, кандый-бир ачу тазыл ӧзӱп, тӱбек этпезин, бу ажыра кӧп улус быјарсыбазын.

¹⁶Ортогордо балыр јӱрӱмдӱ эмезе байланбас Исавтый кижи болбозын. Ол бир катап ажанарга болуп бойыныҥ тун уул деп адалганын садып ийген.

¹⁷Слер билеригер, ол мыныҥ кийнинде алкыш алайын дейле, јектедип койгон. Ыйлап, сураган да болзо, эдип койгонын солып болбогон.

¹⁸Слер тудуп кӧрӧр аргалу немеге, јалбыраган отту тууга, караҥуйга, карачкыга, јотконго,

¹⁹амыргыныҥ табыжына ла айдып турганныҥ ӱнине јууктабадыгар. Бу ӱнди уккан улус сӧсти база укпаска јайнаган.

²⁰Мындый јакаруны чыдажып угуп болбой тургандар: «Кырга тынар-тынду да тийип ийзе, ташла шыбаладар».

²¹Бу кӧрӱлте коркышту болуп, Моисей айткан: «Мен коркып, тыркыражып јадым».

²²Је слер Сион кырга ла тирӱ Кудайдыҥ калазына, теҥеридеги Иерусалимге ле тӱмен ангелдерге јууктадыгар.

²³Слер тун туулган улустыҥ байрамдык јуунына келдигер. Олордыҥ ады-јолдоры теҥериде бичилген. Слер ончозыныҥ јаргылаачызы Кудайга, толо кемине јеткен актулардыҥ тындарына келдигер.

²⁴Слер јаҥы кереестиҥ Ортокчызы Иисуска келип, арутап турган канга јууктадыгар. Бу кан Авельдиҥ канынаҥ артык керелейт.

²⁵Калак, айдып турган Кудайды угарга мойнобогор. Байагы улус олорго јерде айдып турганды угарынаҥ мойногон учун кезедӱни кыйыжып болбогон. Анчада ла биске теҥеридеҥ айдып турганды угарынаҥ мойнозобыс, кезедӱни кыйыжып болбозыс.

²⁶Ол тушта Оныҥ ӱни јерди јайкаган. Эмди дезе, сӧзин берип, айдат: «База катап јаҥыс та јерди эмес, теҥерини де јайкаарым».

²⁷«База катап» дегени јайканбас немелер артсын деп, јайалган немелер јайканып ырадыларын кӧргӱзет.

²⁸Анайдарда, јайканбас каандыкты алып, јакшылыкты чеберлектер. Бу ажыра Кудайды тооп ло Оноҥ айап, Ого јараар эдип бажырып јӱректер,

²⁹нениҥ учун дезе, бистиҥ Кудайыс — ол јуда салар от.