Read Јаҥы Кереес Еврейлерге 3 Bible Online

Еврейлерге 3 - Јаҥы Кереес bible

Еврейлерге 3

¹Анайдарда, агару карындаштар, Кудайдыҥ кычырузына каруу эдип, теҥеридеги јӱрӱмде туружа бердигер. Оныҥ учун Иисус Христос керегинде лаптап сананып кӧригер. Ол — Кудайдыҥ Элчизи ле Улу абыс. Ол керегинде јӱрӱмисле керелеп турубыс.

²Моисей де Кудайдыҥ туразында чындык башкарганы чылап, Оны бу керекке тургускан Кудайга Ол чындык.

³Тураныҥ бойына кӧрӧ оны туткан кижиге кӧп кӱндӱ эдилип турганы чылап, Моисейге кӧрӧ Иисуска кӧп кӱндӱӱ эдилген.

⁴Кажы ла тураны кем де тудуп јат эмей, је ончозын тудаачы — Кудай.

⁵Моисей де Оныҥ туразында јалчы чылап чындык болгон. Ол керелезин деп тургузылып, келер ӧйдӧ айдылатанын јарлаган.

⁶Оныҥ туразында башкарзын деп, Христос уулы чылап тургузылган. Ачык-јарыгысты ла неле мактанып турганыска ижемјини бек чеберлеп алар болзобыс, Оныҥ туразы — ол бис.

⁷Оныҥ учун Агару Тынныҥ айтканыла: «Бӱгӱн Оныҥ ӱнин уксагар,

⁸адаларыгар куба чӧлдӧ ченедип турарда арбанышканы чылап, јӱректеригерди катуландырбагар.

⁹Анда олор эдип јӱргенимди тӧртӧн јылдыҥ туркунына кӧргӧн дӧ болзо, Мени ченеп, шиҥдегендер.

¹⁰Оныҥ учун бу ӱйеге чугулданып, айткам: „Јаантайын азып јадылар, јӱректери јолдорымды билбес“.

¹¹Анайда чугулданып, олор Меге келип, амыр албас деп чертенгем».

¹²Калак, карындаштар, кемигер јаман ла бӱтпес јӱректӱ болуп, тирӱ Кудайдаҥ јана болбозын.

¹³Карын, эм тура «бӱгӱн» деп айдар арга бар тушта бой-бойыгарды кӱнӱҥ сайын сергидигер. Акыр, кинчекке тӧгӱндедип, кемигер де катуланбазын.

¹⁴Баштап алган јӱрӱмисти бу бойынча учына јетире бек чеберлеп турзабыс, бис Христосло бирлик болорыс.

¹⁵Бу керегинде айдылган: «Бӱгӱн Оныҥ ӱнин уксагар, адаларыгар куба чӧлдӧ ченедип турарда арбанышканы чылап, јӱректеригерди катуландырбагар».

¹⁶Оныҥ ӱнин уккандардыҥ кезиги арбанышкан, је Египеттеҥ Моисейле кожо чыккандардыҥ ончозы эмес.

¹⁷Ол тӧртӧн јыл кемдерге чугулданган? Кинчек эдип, сӧӧктӧри куба чӧлдӧ артып калган улуска эмес пе?

¹⁸Амыр албас деп, кемдерге чертенген? Ого бакпаган улуска эмес пе?

¹⁹Анайып олор бӱтпегенинеҥ улам амыр албаганын кӧрӧдис.