Read Јаҥы Кереес Еврейлерге 6 Bible Online

Еврейлерге 6 - Јаҥы Кереес bible

Еврейлерге 6

¹Оныҥ учун оноҥ ары толо кемдӱ болорго јӱткип, Христостыҥ баштаҥы ӱредӱлерине ойто бурылбактар. Кудайга бӱдери керегинде, ӧлӱмге экелеечи керектердеҥ мойнооры керегинде ӱредӱни ойто баштайтаны биске керек јок.

²Креске тӱжери, кол салып алкаары, тирилери, ӱргӱлји јаргы керегинде ӱредӱге бурылбайлы.

³Бого Кудайдыҥ табы болзо, мыны да эдерис.

⁴Бӱтпей барган улусты кинчектерин алынзын деп, Кудайга ойто баштандырар арга јок. Олор бир катап Кудайдыҥ јаркынында јӱрген, теҥериниҥ сыйын билген ле Агару Тынды алган,

⁵Кудайдыҥ сӧзиниҥ јакшызын ла келер чактардыҥ ийде-кӱчтерин билип алган.

⁶Је оноҥ туура барганда, кинчектерин алынзын деп, олорды Кудайга ойто баштандырар арга јок. Кудайдыҥ Уулын бойлорында ойто катап кере тартып, Оны ончо улус алдында уйатка тӱжӱрип јадылар.

⁷Јер бойыныҥ ӱстине улам јааган јаҥмырды ичип, ондо иштеп јӱрген улуска тузалу тӱжӱм ӧскӱрип турганда, Кудайдаҥ алкыш алып јат.

⁸Тегенек ле от-ӧлӧҥ ӧскӱрип турган јер дезе неге де јарабас, ол удабастаҥ каргышка калар, учы-тӱбинде ӧртӧлип калар.

⁹Кару улузым! Мынайда айдып та турган болзобыс, керектеригер јакшы ла слер аргадаштыҥ јолында деп, бӱдӱп турубыс.

¹⁰Кудай чындык, Ол эдип јӱргенигерди ле сӱӱжигерди ундыбас. Слер агаруларга болушканыгар, эмди де болужадыгар. Мынызыла Оны сӱӱп турганыгарды кӧргӱзип јадыгар.

¹¹Бис дезе кажыгар ла учына јетире анайда кичеензин деп кӱӱнзейдис. Ол тушта иженип јӱргенигер бӱдӱп калар.

¹²Слерди јалкуурбазын, је бӱдӱп, узак чыдажып, Кудайдыҥ берер болгонын энчиленип турган улустаҥ тем алзын деп кӱӱнзейдис.

¹³Кудай Авраамга сӧзин берип турарда, Бойы Бойыла чертенген, нениҥ учун дезе черт бергедий Бойынаҥ бийик не де јок болгон.

¹⁴Ол айткан: «Сени алкап, алкаарым да, калдыктарыҥды кӧптӧдип, кӧптӧдӧрим де».

¹⁵Анайып Авраам узак чыдажып, Кудайдыҥ берер болгонын алган.

¹⁶Улус бойынаҥ ӧрӧ турганыла чертенет ине. Олордыҥ черти айткан сӧсти лаптап, кандый ла блааш-тартышты тӱгезет.

¹⁷Кудай да берер болгон энчизин алатан улуска Оныҥ табыныҥ кубулбазын јарт кӧрзин деп кӱӱнзеген. Оныҥ учун берген сӧзин лаптап, ого черт кошкон.

¹⁸Сӧс лӧ черт берип турганда, Кудайдыҥ тӧгӱндеер аргазы јок. Бу кубулбас эки неме Кудайдаҥ корулаш бедиреп јӱрген бисти сӱрекей кооттоп јат. Анайып биске берилген ижемјидеҥ бек тудунып јадыбыс.

¹⁹Бу ижемји јӱрӱмге быжу ла бек якорьдый. Ол Ӧргӧӧниҥ сыраҥай ӧзӧгине, кӧжӧгӧниҥ ары јанына кирет.

²⁰Анаар бистеҥ озо биске болуп Иисус кирип, Мелхиседектий јамылу ӱргӱлјиге Улу абыс боло берген.