Read Јаҥы Кереес Еврейлерге 8 Bible Online

Еврейлерге 8 - Јаҥы Кереес bible

Еврейлерге 8

¹Айдып турганыстыҥ тӧс учуры неде дезе, бисте теҥеридеги Улу Кудайдыҥ ширеезиниҥ оҥ јанында отурган Улу абыс бар.

²Ол агару јерде, чын чадырда абыстап јат. Бу чадырды кижи эмес, Кайракан туткан.

³Кажы ла улу абыс берӱлер ле тайылгалар эдерге тудулат. Оныҥ учун бу да Улу абыста тайатан не де болор учурлу болгон.

⁴Анайдарда, Ол јерде артып калган болзо, абыс болбос эди, нениҥ учун дезе мында Јасакла Кудайга берӱлер эдип турган абыстар бар.

⁵Олор теҥеридеги немелердиҥ сӱр-кебери ле кӧлӧткӧзи болгонды эдип јадылар. Бат оныҥ учун Моисей Кудайга бажыратан чадыр эдерге јадарда, Кудай айткан: «Кӧр, ончозын сеге кырда кӧргӱскен сӱр-кеберле эт».

⁶Је эмди Иисус, ол абыстарга кӧрӧ, артык абысташ алган. Оныҥ абыстажы, Кудай ла улус ортодо Ол јӧптӧгӧн кереес канча кире артык, анча киреге артык болуп јат. Бу кереес Кудайдыҥ эҥ артык берген сӧзине тӧзӧлгӧн.

⁷Баштапкы кереес јик јок болгон болзо, ӧскӧзи керек јок болор эди.

⁸Је Кудай каарып айдат: «Бат, кӱндер келип јат, — деп, Кайракан айдат, — Мен Израильдиҥ калыгыла, Иуданыҥ калыгыла јаҥы кереес јӧптӧӧрим.

⁹Бу кереес олордыҥ адаларыла јӧптӧгӧнимдий болбос. Ол тушта Египет јеринеҥ чыгарайын деп, олорды колынаҥ туткам. Олор Мениҥ кереезимди бускан, оныҥ учун Мен олорды јектеп койгом — деп, Кайракан айдат.

¹⁰Бат эмди Израильдиҥ калыгыла бу кереести јӧптӧйтӧн кӱндер келер — деп, Кайракан айдат: јасактарымды санааларына салып, јӱректерине бичиирим. Мен олордыҥ Кудайы болорым, олор Мениҥ калыгым болор.

¹¹Кажы ла кижи айылдажын, кажы ла кижи карындажын ӱретпес, Кайраканды билип ал — дебес. Ончозы, јаанду-јаштузы Мени билип јӱрер.

¹²Олор јарамасту да болзо, олорго быйан эдерим, кинчектерин ле јарамастарын база эске албазым».

¹³Бу кереести Кудай «јаҥы» деп адап, баштапкызы эскирген деп јарлаган. Ӱлтӱреп, эскирип турганы, удабастаҥ јоголып калар.