Read Јаҥы Кереес Иаковтыҥ самаразы 4 Bible Online

Иаковтыҥ самаразы 4 - Јаҥы Кереес bible

Иаковтыҥ самаразы 4

¹Слердиҥ бойыгарда ӧштӧжӱ ле ӧӧн-бӧкӧн кайдаҥ келет? Ӱйелереерде јуулажып турган соот-јыргалду кӱӱнигердеҥ болбос по?

²Нени кӱӱнзеп јадыгар, оны албайдыгар. Оныҥ учун ӧлтӱрип јадыгар. Кӱйӱнип јадыгар, је јединип болбойдыгар. Оныҥ учун ӧштӧжип ле јуулажып јадыгар. Слерде јок, нениҥ учун дезе сурабайдыгар.

³Сурап турганыгарда, албайдыгар, нениҥ учун дезе јакшыга эмес, соот-јыргалда кородорго болуп сурайдыгар.

⁴Чайдам јӱрӱмдӱлер! Телекейде бар немелерге тартылганы — ол Кудайга удура ӧштӧжӱ деп билбейдигер бе? Анайдарда, телекейде бар немелерге тартылар кӱӱндӱ кижи Кудайга ӧштӱ боло берет.

⁵Эмезе Агару Бичик мынайда тегин айдат деп сананып јадыгар ба: «Бистиҥ бойыбыста јӱрген Тын сӱрекей кӱнӱркеп сӱӱйт»?

⁶Је Кудай оноҥ кӧп јакшылык берет, оныҥ да учун айдылган: «Кудай бийиркектерге удурлажат, јобожыгандарга јакшылык берет».

⁷Анайдарда, Кудайга багыгар. Кӧрмӧскӧ удура турыгар, ол слердеҥ кача берер.

⁸Кудайга јууктагар, Ол слерге јууктаар. Колдорыгарды јуныгар, кинчектӱлер, јӱректеригерди арутагар, экиленген санаалу улус.

⁹Ачуланыгар, ыйлагар, сыктагар. Каткыгар ый боло берзин, сӱӱнчигер — кунук.

¹⁰Кайракан алдында јобожыгар, Ол слерди кӧдӱрер.

¹¹Бой-бойыгарды јамандашпагар, карындаштарым. Карындажын јамандап эмезе карындажын јаргылап турган кижи, Јасакты јамандап, Јасакты јаргылайт. Јасакты јаргылап турган болзоҥ, сен Јасак бӱдӱреечи эмезиҥ, бойыҥды јаргычы эдип јадыҥ.

¹²Јасак Чыгараачы ла Јаргычы јаҥыс. Ол аргадаар ла ӧлтӱрер аргалу. А сен кем андый, јуук кижиҥди јаргылайтан?

¹³Эмди угыгар, мынайда айдып јӱргендер: «Бӱгӱн эмезе эртен мындый да калага барарыс, ондо бир јыл јӱрӱп, садыжып, кирелте аларыс».

¹⁴Слер керек дезе эртен не болорын билбей јадыгар, нениҥ учун дезе слердиҥ јӱрӱмигер — ол суудаҥ кӧдӱрилеле, јоголып калар буу.

¹⁵Оныҥ ордына айдыгар: «Кайраканныҥ табы болзо, тирӱ јӱрерис, оны эмезе мыны эдерис».

¹⁶Эмди дезе улуркак болгоныгар учун мактанып јадыгар. Кандый ла андый мактаныш — ол јаман.

¹⁷Анайдарда, јакшыны эдерин билип, оны этпей турган кижи кинчек эдет.