Read Јаҥы Кереес Петрдыҥ 1-кы самаразы 1 Bible Online

Петрдыҥ 1-кы самаразы 1 - Јаҥы Кереес bible

Петрдыҥ 1-кы самаразы 1

¹Иисус Христостыҥ апостолы Петрдаҥ — Понтто, Галатияда, Каппадокияда, Асияда ла Вифинияда чачылып, кӧчкӱндер чилеп јаткан, Кудай талдап алган улуска.

²Тын ажыра улусты агару эдер деп, башкыда темдектеп койгоныла, Ада Кудай слерди талдап алган. Ол слерди Иисус Христоско сӧсуккур болзын, Оныҥ каныла аруталзын деп, Тынла агару эдерин темдектеген. Слерге јакшылык ла амыр кожулзын.

³Кудайга, Иисус Христос Кайраканыстыҥ Адазына, баш болзын! Бисте Ого тирӱ ижемји болзын деп, Ол Бойыныҥ улу быйаныла Иисус Христостыҥ тирилгени ажыра биске јаҥы јӱрӱм берген.

⁴Бисти мӧҥкӱлик, ару ла чалдыкпас энчи алзын деп, Ол јаҥы јӱрӱм берген. Бу энчи слерге теҥериде чеберлелет.

⁵Слерди дезе Кудай Бойыныҥ кӱчиле бӱдӱмјигер ажыра аргадаарга чеберлейт. Бу аргадаш калганчы ӧйдӧ ачыларга белен.

⁶Бого сӱӱнигер. Эмди јӱзӱн-јӱӱр ченелтелердеҥ улам эмеш кунугарга келижип турган болзо, чыдажыгар.

⁷Онызы слердиҥ Кудайга чындык бӱдӱп турганыгар быртып калар алтыннаҥ баалу болуп калзын деп керектӱ. Алтынныҥ да чыҥдыйы отло ченелет ине. Ол тушта слердиҥ бӱдӱп турганыгар, Иисус Христос ачылза, јараду, мак, кӱндӱ экелер.

⁸Оны кӧрбӧй туруп сӱӱп јадыгар. Оны эмдиге кӧрбӧй јадып, Ого бӱдӱп, сӧслӧ айдып болбос улу сӱӱнчиле сӱӱнип,

⁹бӱдӱп турганыгардыҥ амадузына — тыныгарды аргадаарына једип аладыгар.

¹⁰Бу аргадаш керегинде јарлыкчылар бедиренип шиҥжӱлеген, слерге темдектелген јакшылык керегинде озолондыра айткан,

¹¹олордо јӱрген Христостыҥ Тыны кемге ле кандый ӧйгӧ кӧргӱскенин шиҥжӱлеген. Христос кыйналар, оныҥ кийнинде макталар деп, Тын озолондыра керелеген.

¹²Олордыҥ ижи бойлорына эмес, је слерге тузалу болгон деп, јарлыктарга ачылган. Эмди олордыҥ айтканын теҥеридеҥ ийилген Агару Тынла Сӱӱнчилӱ Јар јарлаган улус слерге јарлыктаган эдилер. Ангелдер де мыны билип аларга сӱрекей кӱӱнзеп јадылар.

¹³Оныҥ учун, кур курчанган чылап, санаагарды курчап, ойгу болуп, Иисус Христос ачылганда, слерге берилип турган јакшылыкка бӱткӱлинче иженигер.

¹⁴Сӧсуккур балдардый болыгар, башкыда билбей јӱргенигердеҥ улам слерде болгон кычаларга бакпагар.

¹⁵Карын, слерди кычырып алган Кудай агару чылап, бойыгар да јӱрӱмеерде агару болыгар.

¹⁶Бичилген сӧс бар ине: «Агару болыгар, нениҥ учун дезе Мен агару».

¹⁷Кудай кажы ла кижини ылгабай, эткен керектериле јаргылайт. Анайдарда, Оны Адагар деп адап турган болзогор, Оноҥ айап, јерде удурум јӱрген ӧйигерди ӧткӱригер.

¹⁸Слерге адалардаҥ берилген сандырашту јӱрӱмнеҥ быртып калар мӧҥӱнле эмезе алтынла садылып алылбаганаарды,

¹⁹карын, јек јок ло ару кураан ошкош Христостыҥ баалу каныла садылып алылганыгарды билип јадыгар.

²⁰Ол телекей јайалардаҥ озо талдалган, је слерге калганчы ӧйлӧрдӧ ачылган.

²¹Слер Ол ажыра Кудайга бӱттигер. Кудай Оны тиргизип, слерди Кудайга бӱдӱп, Ого ижензин деп, Ого мак берген.

²²Слер карындаштарды ылгабай сӱӱрге, Тын ажыра чындыкка багып, тыныгарды арутадыгар. Бой-бойыгарды ару јӱрегеердеҥ јаантайын сӱӱгер.

²³Слерге јаҥы јӱрӱм берген ӱрен ӱргӱлји болуп јат. Ол — Кудайдыҥ тирӱ ле элен-чакка артабас сӧзи,

²⁴нениҥ учун дезе кандый ла кижи ӧлӧҥдий, кижиниҥ кандый ла магы ӧлӧҥдӧги чечектий. Ӧлӧҥ кургаза, чечеги тӱжӱп калат,

²⁵је Кайраканныҥ сӧзи ӱргӱлјиге јӱрет. Бу — слерге јарлалган сӧс.