Read Јаҥы Кереес Петрдыҥ 1-кы самаразы 4 Bible Online

Петрдыҥ 1-кы самаразы 4 - Јаҥы Кереес bible

Петрдыҥ 1-кы самаразы 4

¹Анайдарда, Христос бис учун эди-каныла шыралаган. Слер де ол ло санаала јепсенигер, нениҥ учун дезе эди-каныла шыралап јӱрген кижи кинчек этпей барат.

²Јердеги јӱрӱминиҥ арткан ӧйин кижиниҥ кычаларына башкартпай, је Кудайдыҥ табыла ӧткӱрерге, оныҥ анайда эдип турганы ол.

³Ӧткӧн ӧйлӧрдӧ кара јаҥдулар чылап јӱргенигер, болор. Балыр јӱрӱп, кычага башкартып, аракыдап, тойлоп-јыргап, ичип-јип, јескинчилӱ чалуларга бажырган эдигер.

⁴Оныҥ учун олордыҥ јӱрӱмди јылыйтар керектеринде турушпай турганыгарды кайкап, олор слерди јамандап јадылар.

⁵Олор саадабай тирӱлерди ле ӧлгӧндӧрди јаргылайтан Кудайга каруу берер.

⁶Бого болуп ӧлгӧн дӧ улуска Сӱӱнчилӱ Јар јарлалган, олор, ончо улус чылап эт-канныҥ эткен керектери учун јаргылаткан бойлоры, тыныла Кудайдыйы чылап јӱрзин.

⁷Је ончозыныҥ учы јуук. Анайдарда, керсӱ болыгар, мӱргип, сергек болыгар.

⁸Элдеҥ озо бой-бойыгарга јаантайын карузып јӱригер, нениҥ учун дезе сӱӱш кӧп кинчектерди таштаттырып јат.

⁹Арбанбай, бой-бойыгарга кӱндӱзек болыгар.

¹⁰Кажыгар ла Кудайдыҥ јӱзӱн-башка јакшылыгын башкарып јадыгар. Оныҥ учун алган јайалтагарды тузаланып, бой-бойыгарга болужыгар.

¹¹Айдып турган кижи, Кудайдыҥ сӧстӧрин чилеп айтсын, серкпеде иштеп јӱрген кижи, Кудай берип турган кӱчле иштезин. Ол Иисус Христос ажыра ончозында макталзын деп, анайда эдигер. Ого чактардыҥ чакка мак ла јаҥ. Аминь.

¹²Кару улузым! Слерге Кудай отло ченелте ийзе, кайкабагар, ол слерге туш неме деп бодобогор.

¹³Карын, сӱӱнигер, нениҥ учун дезе Христостыҥ шыраларында туружып јадыгар. Оныҥ магы ачылза, сӱӱнеригер ле јыргаарыгар.

¹⁴Христостыҥ ады учун слерди јамандап турган болзо, кежиктӱ болгоныгар ол, нениҥ учун дезе Кудайдыҥ мактулу Тыны слерде амырап јат. Олор Оны јамандап јадылар, слер мактап јадыгар[1].

¹⁵Слерге шыралаарга келишсе, ол шырагар ӧлтӱргени, уурдаганы, јаман эткени, ӧскӧ кижинийин кӱӱнзегени учун эмес болзын.

¹⁶Христостыҥ кижизи чилеп шыралап јӱрген болзоҥ, уйалба, је андый салым учун Кудайды макта. Оныҥ адын аданып јӱргениҥ учун Оны макта.

¹⁷Кудайдыҥ калыгынаҥ башталатан јаргыныҥ ӧйи једип келген ине. Озо бистеҥ башталза, Кудайдыҥ Сӱӱнчилӱ Јарына бакпай турган улусла не болор?

¹⁸Актузы јӱк арайдаҥ аргаданып турган болзо, Кудайга бӱтпезиле, кинчектӱзиле не болор?

¹⁹Анайдарда, Кудайдыҥ табыла шыралап јӱргендер јакшыны эдип, Ого, сӧзине чындык Јайаачыга, јӱрӱмин бӱдӱмјилезин.