Read Јаҥы Кереес Петрдыҥ 2-чи самаразы 3 Bible Online

Петрдыҥ 2-чи самаразы 3 - Јаҥы Кереес bible

Петрдыҥ 2-чи самаразы 3

¹Кару улузым! Слерге экинчи самара бичип турганым бу. Экилезинде эске алындырышла слерде ару санаалар ойгозып турум.

²Башкыда агару јарлыкчылар айткан сӧстӧрди, база апостолдорыгар ажыра берилген Аргадаачы Кайраканныҥ јакылтазын сананып јӱригер.

³Элдеҥ озо билип јӱригер: калганчы ӧйлӧрдӧ уйалбас электеечилер келер. Олор акту бойлорыныҥ кычаларыла башкарынып,

⁴айдыжар: «Ол айтканыла, качан келер? Адаларыс ӧлӱп јат, је телекей јайалардаҥ бери ончозы ол ло бойы артып јат».

⁵Олор мынайда айдып, теҥери ле јер Кудайдыҥ сӧзиле суудаҥ ла суу ажыра эдилгенин бойлорынаҥ бойлоры јажырып јадылар.

⁶Ол до туштагы телекей чайыкка чӧҥӱп, јоголгон.

⁷Је эмдиги теҥери ле јер Кудайдыҥ сӧзиле анайып ок отко чеберлелет; олор јаргыныҥ кӱнине ле Кудайы јок улусты јоголторго чеберлелет.

⁸Је бу бир неме слердеҥ туйук болбос учурлу, кару улузым: Кайраканга бир кӱн муҥ јыл бодолду, муҥ јыл бир кӱн бодолду.

⁹Кайракан Бойыныҥ берген сӧзин бӱдӱрерге табыланбайт; кезик улус оны табыланыш деп бодойт. Је Ол биске узак чыдажат, нениҥ учун дезе кем де ӧлӱп калбазын, карын, ончо улус кинчегин алынып, Кудайга баштанзын деп кӱӱнзейт.

¹⁰Кайраканныҥ кӱни тӱнде уурчы чылап келер, ол тушта теҥери табыштанып јоголор, телекейдиҥ тӧзӧлгӧзи дезе кӱйӱп јайрадылар, јер ле ондогы ончо керектер кӱйӱп калар.

¹¹Бу ончозы мынайда јайрадылар. Айдарда, слер, агару јӱрӱмле јӱрген, Кудайга беринген улус,

¹²слер, Кудайдыҥ кӱни келерин сакып, оны јылгырладып тургандар, кандый болор учурлу? Ол кӱнде теҥери јалбырап, јайрадылар, телекейдиҥ тӧзӧлгӧзи кайылар.

¹³Је Оныҥ берген сӧзиле, чындык бар јаҥы теҥерини ле јаҥы јерди сакып јадыбыс.

¹⁴Оныҥ учун, кару улузым, мыны сакып, Оныҥ алдына быјарзыбаган, јек јок ло амыр-энчӱде келерге кичеенип,

¹⁵Кайраканыстыҥ узак чыдажып турганы слерге аргадаш деп оҥдогор. Ол ок керегинде слерге сӱӱген Павел карындажыс бичиген эди. Ол мынайда ого берилген ойгорлыкла бичиген.

¹⁶Анайып ок ол керегинде Павел ончо самараларында айдат. Бу самараларда оҥдоорго кӱч немелер бар, олорды неме билбес ле арылык-берилик улус ӧскӧ дӧ Агару Бичиктерди чилеп, јастыра јартап, бойлорын ӧлӱмге экелип јадылар.

¹⁷Анайдарда, слер, кару улузым, мыны озолондыра билип, јарамастулардыҥ асканына тартылбаска ла бӱдӱп турганыгарды јылыйтпаска чеберленигер.

¹⁸Је Кайраканыстыҥ, Аргадаачы Иисус Христостыҥ, јакшылыгын алып, Оны билип, ӧзигер. Ого эмди ле ӱргӱлјиге мак. Аминь.