Read Јаҥы Кереес Иуданыҥ самаразы 1 Bible Online

Иуданыҥ самаразы 1 - Јаҥы Кереес bible

Иуданыҥ самаразы 1

¹Иисус Христостыҥ кулынаҥ, Иаковтыҥ Иуда карындажынаҥ — слерге, агарулалган, кычырылган, Ада Кудай сӱӱген ле Иисус Христос чеберлеген улуска.

²Слерге быйан, амыр ла сӱӱш кожулзын.

³Кару улузым! Бистиҥ текши аргаданыжыс керегинде бичиирге сӱрекей кӱӱнзедим. Оныҥ учун агаруларга Кудайдаҥ бир катап ӱргӱлјиге берилген бӱдӱмји учун слерди тартышсын деп, слерге кычыру бичиири керектӱ деп бододым.

⁴Ортогорго бир кезик улус сӱмеленип кирген. Андый улуска јебрен ӧйлӧрдӧҥ ала јаргы јарлалган. Олор Кудайга чындык эмес, Кудайыстыҥ јакшылыгын алып, оны саҥ-тескери эдип, тудунбас јӱрӱмиле јӱргенче. Олор сок јаҥыс Ээбис Кудайды, Иисус Христос Кайраканысты, јектеп јадылар.

⁵Мыны билер де болзогор, слерге эске алындырар кӱӱним бар: Кайракан калыкты Египет јеринеҥ бир катап ӱргӱлјиге аргадайла, оноҥ бӱтпегендерди јоголтып койгон.

⁶Ол анайып ок баштаҥы айалгазын чеберлебей, јӱрген јерин таштап барган ангелдерди улу кӱнде јаргылаарга, карачкыда ӱргӱлјиге кӱлӱде тудуп јат.

⁷Анайда ок Содом ло Гоморрала, јакалай калаларла болгон. Олордыҥ улузы анайып балыр кылынып, ӧскӧ эт-канды бедирегендер. Бу учун олор ӧчпӧс оттыҥ кезедӱзин алып, тем эдип кӧргӱзилген.

⁸Шак мынайда байагы улусла болор. Олор бойлорыныҥ сезим санаазыла азып, бойы бойлорын быјарсыдып, башкараачыларды јектеп, теҥериниҥ јаҥдарын јамандап јадылар.

⁹Архангел Михаил дезе Моисейдиҥ эт-каны керегинде кӧрмӧслӧ эрмектежип, оны јамандап бурулаарга тидинбей, айткан: «Сеге Кайракан табын бербезин».

¹⁰Бу улус нени билбес, оны јамандап јадылар; санаа-укаа јок тындулар чылап, бӱткен сезимиле нени билер, оныла бойлорын јайрадып јадылар.

¹¹Олорго ачу-корон, нениҥ учун дезе Каинниҥ јолыла барып јадылар; Валаам бойыныҥ асканы учун алган кайралга јайылып јадылар; удурлажуда Корей чилеп ӧлӱп јадылар.

¹²Андый улус карындаштык курсак јииринде кир болуп јат. Олор слерле кожо јыргап, бойлорын коркыш јокко тойдырат. Олор — салкынга айдаткан јаҥмыр јаадырбас булуттар; јиилек јок, эки катап ӧлӱп калган, тазылы кодорылган кӱски агаштар.

¹³Олор — бойлорыныҥ быјарыла кӧбӱктелген талайдыҥ калапту толкулары, азып јӱрген јылдыстар. Олорго ӱргӱлјиге карачкыныҥ карачкызы белетелген.

¹⁴Олор керегинде баштапкы кижиниҥ јетинчи калдыгы Енох јарлыкчы да айткан: «Бат, Кайракан Бойыныҥ тӱмен агаруларыла кожо келип јат.

¹⁵Ол кажы ла кижини јаргылаарга келип јат. Ол кажы ла кижини Кудайга удура эткен јаман керектери учун, Кудайы јок јӱрген кинчектӱлерди Ого удура айткан ончо кату сӧстӧри учун јаргылаар».

¹⁶Бу — јаантайын калактап, јӱрӱмине комыдап, кычазыла кинчектӱ ле јарамас кылынып јӱрген улус. Олор кӧӧрӧм сӧстӧр айдадылар, бойыныҥ тузазына болуп, улус алдында јарамзыйдылар.

¹⁷Је слер, кару улузым, Иисус Христос Кайраканыстыҥ апостолдоры башкыда айткан сӧстӧрди сананып јӱригер.

¹⁸Калганчы ӧйдӧ Кудай јок кычаларыла кылынып јӱрген электеечи улус табылар деп, олор слерге айткан.

¹⁹Бойлорын бӧлӱп турган бу улус бӱдетенниҥ бирлигинеҥ тынла эмес, сезимле јӱрӱп јадылар.

²⁰Слер дезе, кару улузым, бойыгардыҥ јӱрӱмигерди агару бӱдӱмјигерге тӧзӧп, Агару Тынла мӱргигер.

²¹Ӱргӱлји јӱрӱм аларга, Иисус Христос Кайраканыстаҥ быйан алынып, бойыгарды Кудайдыҥ сӱӱжинде чеберлегер.

²²Эреҥистелип јӱрген кезик улуска быйан эдигер,

²³кезигин коркыдып, оттоҥ ала койып аргадагар. Кезигине база быйан эдигер, је Кайракан алдында айап, эт-канныҥ кинчегиле быјарсыган кийимнеҥ де јескинигер.

²⁴Кудай слерди јыгыларынаҥ аргадаар ла Бойыныҥ магы алдында јек јок ло сӱӱнчиде тургузар аргалу.

²⁵Ого, Бирлик, Ойгордоҥ Ойгор Кудайга, Аргадаачыбыска, ончо чактардаҥ озо, эмди ле ончо чактарга Иисус Христос Кайраканыс ажыра мак, улулык, кӱч ле јаҥ. Аминь.