Read Јаҥы Кереес Ачылта 10 Bible Online

Ачылта 10 - Јаҥы Кереес bible

Ачылта 10

¹Теҥеридеҥ тӱжӱп јаткан, булутла оролгон ӧскӧ кӱчтӱ ангелди кӧрӱп ийгем. Бажыныҥ ӱстинде солоҥы болгон, чырайы кӱндий, буттары от баканадый.

²Колында ачык тӱрбек тудунып алган. Оҥ будыла талайга, сол будыла јерге базып,

³арслан ыркыранганы чылап, тыҥ ӱнденип кыйгырган. Ол кыйгырарда, јети кӱкӱрт бойлорыныҥ ӱндериле ӱнденип ийген.

⁴Јети кӱкӱрт ӱнденерде, бичиирге санангам, је теҥеридеҥ меге айткан ӱнди угуп ийгем: — Јети кӱкӱрттиҥ айтканын таҥмалап кой, оны бичибе.

⁵Талайда ла јерде турганын мен кӧргӧн ангел колын теҥери ӧрӧ кӧдӱрген.

⁶Ӧй база болбос деп, ол теҥерини ле ондо барын, јерди ле ондо барын, талайды ла ондо барын јайаган ӱргӱлји чакка Јӱреечиле чертенген.

⁷Је јетинчи ангел амыргылаар кӱндерде, Ол Бойыныҥ кулдарына — јарлыкчыларына, јарлаганыла, Кудайдыҥ јажыды бӱдер.

⁸Теҥеридеҥ мен угуп ийген ӱн меге ойто айда берген: — Барып, талайда ла јерде турган ангелдиҥ колындагы ачык тӱрбекти ал.

⁹Ангелге барып, тӱрбекти бер — дегем. Ангел меге айткан: — Оны алып, ји. Кардыҥда ол ачу болор, је оозыҥда балдый тату болор.

¹⁰Ангелдиҥ колынаҥ тӱрбекти алып, јип ийгем. Оозымда ол балдый тату болгон, јип ийеримде, кардымда ачу боло берген.

¹¹Ол меге айткан: — Сен кӧп калыктарга, уктарга, тилдерге ле каандарга ойто судурлаар учурлу.