Read Јаҥы Кереес Ачылта 13 Bible Online

Ачылта 13 - Јаҥы Кереес bible

Ачылта 13

¹Мен талайдыҥ кумагында тура бергем. Талайдаҥ чыгып јаткан он мӱӱстӱ ле јети башту аҥды кӧрӱп ийгем. Мӱӱстеринде — он кӱрее, баштарында — Кудайды јамандаган ат-јолдор бичилген.

²Мен кӧрӱп ийген аҥ ирбиске тӱҥей болгон. Буттары — айуныйы, оозы — арсландыйы ошкош. Ого јелбеген бойыныҥ кӱчин, ширеезин ле улу јаҥ берген.

³Аҥныҥ баштарыныҥ бирӱзи јаан шыркалудый болгонын кӧрӱп ийгем. Је бу јаан шырка јазылып калган. Јерде јуртаган ончо улус алаҥ кайкап, аҥныҥ кийнинеҥ барган. Аҥга јаҥ берген учун јелбегенге бажыргандар.

⁴Аҥга да бажырып, айткандар: — Кем аҥга теҥ, кем оныла тартыжар аргалу?

⁵Улуркап, Кудайды јамандазын деп, аҥга оос берилген. Мыны тӧртӧн эки ай эдер јаҥ берилген.

⁶Ол Кудайды јамандап айдарга, Оныҥ адын, Оныҥ јуртын, теҥериде јуртагандарды јамандаарга оозын ачкан.

⁷Ого агаруларга удура јуулажып јеҥери берилген. Кандый ла ӱйени, калыкты, тилди ле укты башкарар јаҥ берилген.

⁸Телекей јайалганнаҥ ала сойылган Кураандагы јӱрӱмниҥ тӱрбегинде аттары бичилбеген, јерде јуртаган ончо улус бу аҥга бажырар.

⁹Кулакту кижи уксын!

¹⁰Олјого апарып јатканы, бойы олјого барар. Кылышла ӧлтӱрип јатканы, бойы кылыштаҥ ӧлӧр. Мында агарулардыҥ чыдузы ла бӱдӱмјизи керек.

¹¹Јердеҥ чыгып келген ӧскӧ аҥды кӧрӱп ийгем. Ол кураанныҥ мӱӱзи ошкош эки мӱӱстӱ болгон, јелбеген чилеп эрмектенген.

¹²Ол баштапкы аҥныҥ јаҥын оныҥ алдында бӱдӱрип, ончо јерди ле ондо јуртаган улусты јаан шырказы јазылган баштапкы аҥга бажыртат.

¹³Улу билдилер эдип, улус кӧзинче теҥеридеҥ јерге от то тӱжӱртип јат.

¹⁴Аҥныҥ алдында эдерге берилген кайкалдарла ол јерде јуртаган улусты тӧгӱндеп јат. Анайып, кылыштаҥ шыркалу, је тирӱ аҥныҥ сӱрин этсин деп, јерде јуртаган улуска айдып јат.

¹⁵Аҥныҥ сӱри айдар аргалу болзын деп, аҥныҥ сӱрине бажырбаган ончо улус ӧлтӱртсин деп, ого аҥныҥ сӱрине тын кийдирер јаҥ берилген.

¹⁶Ол ончозыныҥ, — кичӱлердиҥ ле улулардыҥ, байлардыҥ ла тӱреҥилердиҥ, јайымда јӱргендердиҥ ле кулдардыҥ — оҥ колдорына эмезе маҥдайларына таҥма тургустырып јат.

¹⁷Анайып, таҥма, эмезе аҥныҥ ады, эмезе оныҥ адыныҥ тоозы бар кижидеҥ башка кем де садып та албас, садып та болбос.

¹⁸Мында ойгорлык керектӱ. Санаа бары аҥныҥ тоозын алзын, бу — кижиниҥ тоозы. Оныҥ тоозы 666.