Read Јаҥы Кереес Ачылта 4 Bible Online

Ачылта 4 - Јаҥы Кереес bible

Ачылта 4

¹Мыныҥ кийнинде теҥериде ачык эжикти кӧрӱп ийгем. Мен уккан, меге баштанган амыргыныҥ ӱни ошкош байагы ӱн айткан: — Бери чык, мыныҥ кийнинде не болорын кӧргӱзейин.

²Мен ол тарый Тынга алдыртып, теҥериде ширее турганын, ширееде Отурганды кӧрӱп ийгем.

³Бу Отурганы бӱдӱмиле яспис ле сардис деп таштарга тӱҥей болгон, ширеени эбире солоҥы смарагд таш чылап мызылдаган.

⁴Ширеени эбире јирме тӧрт ширее, ширеелерде отурган јирме тӧрт башчы. Олор ак кийимдӱ, баштарында — алтын ӧрӱмелдер.

⁵Ширеедеҥ јалкын јалтылдап, ӱндер угулып, кӱкӱрт кӱркӱреп турган. Ширеениҥ алдында отту јети јарыткыш — Кудайдыҥ јети тыны.

⁶Ширеениҥ алдында мӧлтӱр ташка тӱҥей ару шил талай. Ширее ортодо ло ширеени эбире алын ла кийин јанында кӧп кӧстӧрлӱ тӧрт тынду.

⁷Баштапкы тынду арсланга тӱҥей, экинчи тынду бозуга тӱҥей болгон, ӱчинчи тынду кижидий чырайлу болгон, тӧртинчи тынду учуп бараткан мӱркӱтке тӱҥей.

⁸Тӧрт тындуныҥ кажызы ла алтыдаҥ канатту болгон, канаттарды эбире ле ич јаны кӧп кӧстӧрлӱ. Тындулар тӱн-тӱш токтобой айдып тургандар: — Кайракан, кӱчтӱдеҥ кӱчтӱ Кудай агару, агару, агару! Ол болгон, бар ла келип јат.

⁹Тындулар ширееде Отурганга, ӱргӱлји чакка Јӱреечиге мак, кӱндӱ эдип, алкыш-быйанын јетиргенде,

¹⁰јирме тӧрт башчы ширееде Отурганныҥ алдына јыгылып, ӱргӱлји чакка Јӱреечиге бажырып, алтын ӧрӱмелдерин ширеениҥ алдына салып, айдып тургандар:

¹¹— Сен, Кайракан, макты, кӱндӱни ле кӱчти аларга јарамык, нениҥ учун дезе Сен ончоны јайагаҥ, Сениҥ табыҥла ончозы јӱрет, ончозы бӱткен.