Read Јаҥы Кереес Матфей 19 Bible Online

Матфей 19 - Јаҥы Кереес bible

Матфей 19

¹Иисус бу сӧзин айдып божойло, Галилейдеҥ чыгып, Иордан ары јанындагы Иудей јерине келди.

²Оныҥ кийнинеҥ кӧп улус барган. Иисус олорды анда јазып койгон.

³Ого фарисейлер базып келеле, ченеп сурадылар: — Алган эжиле не ле шылтактаҥ улам айрылыжарга јараар ба?

⁴Ол каруу јандырды: — Мыны кычырбаган бедигер: «Башталганында Јайаачы олорды эр кижи ле ӱй кижи эдип јайаган.

⁵Оныҥ учун кижи ада-энезин таштап, алганына јапшынар, эки бойы јаҥыс эт-кан болор».

⁶Андый болгондо, олор эки эмес, јаҥыс эт-кан. Анайдарда, Кудайдыҥ бириктиргенин кижи айрыбазын.

⁷Олор айттылар: — Ӱйине айрылышканын керелеген бичигин берип, оныла айрылышсын деп, Моисей не керек јакыган?

⁸Иисус олорго айтты: — Моисей јӱректеригер кату ла ӧчӧш болгонын кӧрӱп, ӱйиле айрылыжарын јараткан. Башкыда андый болбогон.

⁹Је Мен слерге айдып турум: ӱйиле айрылыжып, ӧскӧ кижи алганы, кинчек эдип јат, је јаҥыс ӱйи чайдам кылынганы учун болбозо. Айрылыжып калганды алганы, кинчек эдип јат.

¹⁰Ӱренчиктер Ого айттылар: — Эр кижиниҥ молјузы ӱйи алдында андый болзо, кижи албаза торт.

¹¹Иисус дезе олорго айтты: — Мениҥ бу айтканымды болгон-тушкан кижи аайлабас, кемге берилген, ол аайлаар.

¹²Эне ичинеҥ акталап койгондый чыккан улус бар; улуска акталадып койгондыйлар бар; Теҥери Каандыгына болуп акталап койгондый болорго јӧпсингендер бар. Аайлаар аргалу кижи, аайлазын.

¹³Ол тушта баштарына колын салып, мӱргизин деп, Иисуска балдарды экелдилер. Ӱренчиктер дезе олорды арбап тургандар.

¹⁴Је Иисус: — Балдарды божодыгар, Меге келерге буудактабагар. Теҥери Каандыгы мындыйлардыйы эди — дейле,

¹⁵олорго колын салып, алкады. Оноҥ оноортынаҥ јӱре берди.

¹⁶Је бат, Иисуска бир кижи базып келеле, айтты: — Быйанду ӱредӱчи, јакшы нени этсем, ӱргӱлји јӱрӱм аларым?

¹⁷Иисус дезе ого айтты: — Мени не быйанду дейдиҥ? Кем де быйанду эмес, јаҥыс Кудай быйанду. Ӱргӱлји јӱрӱмге кирейин дезеҥ, јакылталарды бӱдӱрип тур.

¹⁸— Кандый јакылталарды? — деп, ол сурады. Иисус айтты: — Бу мындый: «Кижи ӧлтӱрбе, чайдам кылынба, ууры этпе, тӧгӱндеп керелебе»,

¹⁹«ада-энеҥди тооп јӱр»; база: «Бойыҥды сӱӱгеҥдий, јуугыҥды сӱӱп јӱр».

²⁰— Мыныҥ ончозын јаштаҥ ала бӱдӱрип јадым — деп, уул каруу јандырды. — Меге база не јетпей јат?

²¹— Толо кемдӱ болойын дезеҥ, барып, јӧӧжӧҥди садып ийеле, тӱреҥилерге ӱлеп бер. Ол тушта теҥериде эрјинелӱ болорыҥ. Оноҥ келип, Мени ээчий бар — деп, Иисус айтты.

²²Уул мыны угала, јӧӧжӧзи кӧп болгон учун, кунукчылду јӱре берди.

²³Иисус дезе ӱренчиктерине айтты: — Чынын айдадым слерге: бай кижиге Теҥери Каандыгына кирерге кӱч.

²⁴База айдадым слерге: бай кижиге Кудайдыҥ Каандыгына киреринеҥ, тӧӧгӧ ийне ӱйдинеҥ ӧдӧргӧ јеҥил.

²⁵Мыны угала, ӱренчиктер алаҥ кайкажып, айттылар: — Андый болзо, кем аргадалар аргалу?

²⁶Иисус олор јаар кӧрӱп, айтты: — Улус мыны эдип болбос, Кудайдыҥ дезе эдип болбозы јок.

²⁷Айдарда, Петр каруу јандырды: — Бат, бастыра јӧӧжӧбисти таштап, Сениле кожо бардыбыс. Бу учун биске не болор?

²⁸Иисус дезе олорго айтты: — Чынын айдадым слерге: Кижи Уулы Бойыныҥ магыныҥ ширеезине отурып алза, слер де, тирилгендер, Мениле кожо јӱргендер, Израильдиҥ он эки угын јаргылаарга, он эки ширееге отурып аларыгар.

²⁹Кем кижи айлы-јуртын, эмезе ага-карындажын, эмезе эје-сыйнын, эмезе адазын, эмезе энезин, эмезе ӱйин, эмезе бала-барказын, эмезе кыразын Меге болуп таштаза, онызынаҥ јӱс артык алар, ӱргӱлји јӱрӱмди энчиленер.

³⁰Је баштапкы болгон кӧп улус, калганчы болор, калганчы болуп јӱргендер, баштапкы болор.