Read Јаҥы Кереес Матфей 21 Bible Online

Матфей 21 - Јаҥы Кереес bible

Матфей 21

¹Иерусалимге јууктагылап, Елеон кырдагы Виффагия деп јуртка келерде, Иисус эки ӱренчигин ийип,

²олорго айтты: — Одоштой јуртка барыгар. Ого јеткен бойынча, буулап койгон тижи эштек ле коштой турган кулун эштекти кӧрӱп ийеригер. Чечип, Меге экелигер.

³Слерге кижи неме айткажын, олор Кайраканга керек — дегер. Бу ла тарый ол кижи эштектерди апарзын деер.

⁴Јарлыкчы ажыра айдылганы бӱтсин деп, ончозы мынайда болгоны бу. Ол айткан:

⁵«Сион кызына [9] айдыгар: „Бат, сениҥ Кааныҥ јаш эштекке — ишмекчи тижи эштектиҥ кулунына минеле, сеге јобожыган келедири“».

⁶Ӱренчиктер барып, Иисустыҥ айтканыла эттилер:

⁷тижи эштек ле кулун эштекти јединип экелеле, олорго кийимдерин арта салдылар, Иисус минди.

⁸Кӧп улус кийимдерин јолго јайып турдылар, кезиктери дезе агаштыҥ бӱрин кезип, база јолго јайдылар.

⁹Алды-кийнинеҥ баскан улус кыйгырыжып турдылар: — Давид Уулына, осанна![10] Кайраканныҥ адынаҥ келип јатканы алкышту! Кӧк-теҥериде турганга, осанна!

¹⁰Ол Иерусалимге кирерде, кала тӱймеп, «Бу кем?» дешкилеп турды.

¹¹— Бу Иисус, Галилейдеги Назарет јеринеҥ Јарлыкчы — деп, улус каруу јандырып турган.

¹²Иисус байзыҥга киреле, байзыҥда садыжып, садып алып турган улусты ончозын чыгара сӱрди, акча солычылардыҥ столдорын, кӱӱле садаачылардыҥ такталарын аҥтарып,

¹³олорго айтты: — Бичилген сӧс бар: «Мениҥ айлым улус мӱргийтен айыл деп адалар». Слер дезе оны тонокчылардыҥ уйазы эдип алдыгар!

¹⁴Байзыҥда Ого сокорлор ло аксактар базып келди. Иисус олорды јазып ийди.

¹⁵Улу абыстар ла бичикчилер Оныҥ эткен кайкалдарын, «Давид Уулына, осанна!» деп, байзыҥда кыйгырыжып турган балдарды кӧргӧндӧр. Оныҥ учун чугулданып,

¹⁶Ого айттылар: — Олор не дешкилейт, угуп туруҥ ба? — Эйе, — деп, Иисус каруу јандырды, — «Јаш балдардыҥ ла эмчек балдардыҥ оозынаҥ Бойыҥа мак чыгардыҥ» дегенди качан да кычырбаган бедигер?

¹⁷Иисус олорды таштайла, каладаҥ Вифанияга једип, анда конды.

¹⁸Эртен тура калага бурулып келеделе, Иисус јолой аштай берди.

¹⁹Јолдыҥ кырында турган бир смоква агашты кӧрӧлӧ, јиилек јиирге јууктай базып келди. Бӱрдеҥ ӧскӧ неме таппай, ого айтты: — Сенде ӱргӱлјиге јиилек бӱтпезин! Ол ло тарый агаш кургап калды.

²⁰Ӱренчиктер мыны кӧрӧлӧ, кайкап айттылар: — Смоква агаш канайып кенетийин кургай берди?

²¹— Чынын айдадым слерге, — деп, Иисус каруу јандырды, — бӱдӱп, алаҥзыбас болзогор, јаҥыс та смоква агашла болгонды эдер эмезигер, је бу кырга: «Кӧдӱрилип, талайга таштал!» — дезегер, андый ла болор.

²²Мӱргип, бӱдӱп, нени де суразагар, аларыгар.

²³Иисус байзыҥга кирип, ӱредип турарда, улу абыстар ла калыктыҥ јаандары Ого базып келеле, айттылар: — Мыны кандый јаҥла эдип турадыҥ? Андый јаҥды Сеге кем берген?

²⁴— Мен де слердеҥ бир неме сурап угайын — деп, Иисус олорго айтты. — Меге каруугарды айдар болзогор, мыны кандый јаҥла эдип турганымды слерге Мен де айдайын.

²⁵Иоанныҥ крестеп јӱргени кайдаҥ болгон: теҥеридеҥ бе, эмезе улустаҥ ба? Олор дезе бойлоры ортодо табыштылар: «„Теҥеридеҥ“ дегей эди, ол тушта: „Ого не керек бӱтпедигер?“ — деер.

²⁶„Улустаҥ“ деп айдарга, калыктаҥ коркып јадыбыс, нениҥ учун дезе Иоаннды ончозы јарлыкчы деп бодоп јат».

²⁷Олор Иисуска «билбезис» — деерде, Ол до олорго мынайда айтты: — Мыны кандый јаҥла эдип турганымды слерге Мен де айтпазым.

²⁸Слер не деп сананып туругар? Бир кижи эки уулду болгон. Ол бирӱзине базып келип, айткан: «Уулым, бӱгӱн виноградыма барып иште».

²⁹Онызы: «Барбазым» — дейле, оноҥ санаа алынып, барган.

³⁰Экинчи уулына базып келип, анайда ок айткан. Мынызы: «Барып јадым, адабыс» — дейле, барбаган.

³¹Бу экӱниҥ адазыныҥ кӱӱниле эткени кажызы? Олор: — Баштапкызы — дедилер. Иисус олорго айтты: — Чынын айдадым слерге: каланчылар ла балыр јӱрӱмдӱ ӱй улус Кудайдыҥ Каандыгына слердеҥ озо кирер.

³²Иоанн чындык јол кӧргӱзерге келерде, ого бӱтпедигер, каланчылар ла балыр јӱрӱмдӱ ӱй улус дезе ого бӱтти. Слер дезе, мыны кӧргӧн дӧ болзогор, буругарды алынбадыгар, ого бӱтпедигер.

³³База бир укаа сӧс угугар. Айыл ээзи кижи болгон. Ол виноград-агаш тарыйла, эбире манаган, сыскыру казып, багана туткан, тарыган агажын ишчилерге табыштырып, атана берген.

³⁴Јиилек терер ӧй јууктап келерде, јиилегимди экелигер деп, ишчилерге јалчыларын ийген.

³⁵Ишчилер јалчыларын тудуп алала, кезигин согуп койгон, кезигин ӧлтӱрип койгон, кезигин дезе ташла шыбалаган.

³⁶База ӧскӧ, оноҥ кӧп јалчыларын ийерде, олорло анайда ок кылынгандар.

³⁷«Олор уулымнаҥ уйалар» — деп, ээзи айдып, арт-учында бойыныҥ уулын ийген.

³⁸Ишчилер дезе, оныҥ уулын кӧрӧлӧ, бой-бойлорына айдышкан: «Энчи алар уул бу. Оны ӧлтӱреле, энчизин алалы».

³⁹Оны тудуп, виноград-агаштыҥ аразынаҥ чыгарала, ӧлтӱрип койгондор.

⁴⁰Анайдарда, виноград-агаштыҥ ээзи келгежин, ол ишчилерди канайдар деп туругар?

⁴¹— Бу кара сагыштуларды јаман ӧлӱмле ӧлтӱрер, виноград агажын дезе ӧскӧ ишчилерге табыштырар, олор тӱжӱмин бойыныҥ ӧйинде јетирип турар — деп, Ого каруу јандырдылар.

⁴²Иисус айтты: — «Тура тудаачылар јектеп койгон таш булуҥныҥ тӧзиндеги таш болуп калды. Бу мынайда Кайраканнаҥ болды, бис оны кайкап кӧрӧдис» дегенди Агару Бичиктеҥ качан да кычырбаган бедигер?

⁴³Оныҥ учун айдып турум слерге: Кудайдыҥ Каандыгы слердеҥ ойто алылып, Оныҥ тӱжӱмин јетирер калыкка берилер.

⁴⁴Бу ташка јыгылган кижи јер башка чачылар, таш кемниҥ ӱстине тӱшсе, оны былчып койор.

⁴⁵Улу абыстар ла фарисейлер Оныҥ укаа сӧстӧрин угала, олор керегинде айдып туру деп, билип ийдилер.

⁴⁶Оны тудайын дейле, улустаҥ коркыдылар, нениҥ учун дезе Оны јарлыкчы деп бодоп тургандар.