Read Јаҥы Кереес Матфей 23 Bible Online

Матфей 23 - Јаҥы Кереес bible

Матфей 23

¹Ол тушта Иисус улуска ла Бойыныҥ ӱренчиктерине айдып баштады:

²— Моисейдиҥ јерине бичикчилер ле фарисейлер отурып алдылар.

³Оныҥ учун нени бӱдӱрзин дезе, бӱдӱригер, эдигер, је кылыгын кылынбагар, нениҥ учун дезе олор айдарын айдат, бойлоры этпейт.

⁴Уур ла апарарга эп јок јӱктер эдип, улустыҥ ийнине артадылар, бойлоры дезе олорды сабарыла да јылдырар кӱӱндери јок.

⁵Нени ле этсе, кижи кӧрзин деп эдедилер. Филактерийлерин[11] элбедип јат, кийиминиҥ чачагын[12] узаткылайт.

⁶Той-јыргалда тӧрдӧ кыйын отурарын, синагогаларда ичкери ӧдӱп отурарын,

⁷тепсеҥдерде уткыдарын, «Равви!»[13] деп ададарын сӱӱйдилер.

⁸Слерди дезе ӱредӱчи деп адабазын: Ӱредӱчигер јаҥыс — Христос, слер ончогор — карындаштар.

⁹Кижини јерде ада деп айтпагар: адагар јаҥыс — Теҥеридеги Ада.

¹⁰Слерди баштаачы деп адабазын: слерди Баштаары јаҥыс — Христос.

¹¹Јааныгар слерге јалчы болзын.

¹²Бийиктединген кижи јабызаар, бойын јабыс тутканы — бийиктеер.

¹³Бичикчилер ле фарисейлер, слерге ачу-корон! Эки јӱстӱлер! Слер улустыҥ алдында Теҥери Каандыгын бӧктӧп јадыгар. Ого бойыгар да кирбейдигер, кирейин дегенди де кийдирбей јадыгар.

¹⁴Бичикчилер ле фарисейлер, слерге ачу-корон! Эки јӱстӱлер! Тул ӱй улустыҥ јӧӧжӧзин ӱптеп јип, кижи кӧрзин деп, узак мӱргип јадыгар. Бу учун там буруга тӱжеригер.

¹⁵Бичикчилер ле фарисейлер, слерге ачу-корон! Эки јӱстӱлер! Бир де кижини болзо, јаҥыбыска баштандыралы деп, талай кечип, јер ӧдӧдигер. Баштандырала, оны бойыгардаҥ эки катап јаман таамыныҥ уулы эдип аладыгар.

¹⁶Сокор башчылар, слерге ачу-корон! Слер айдадыгар: «Байзыҥла чертенип турган кижиниҥ черти не де эмес, је байзыҥныҥ алтыныла чертенип турган кижи чертин бӱдӱрер учурлу».

¹⁷Сагыжы јоктор ло сокорлор! Кажызы јаан: алтын ба, эмезе алтынды агарулап турган байзыҥ ба?

¹⁸База айдадыгар: «Тагылла чертенип турган кижиниҥ черти не де эмес, је тагылдыҥ ӱстине салган берӱле чертенип турган кижи чертин бӱдӱрер учурлу».

¹⁹Јӱӱлгектер ле сокорлор! Кажызы јаан: берӱ бе, эмезе берӱни агарулап турган тагыл ба?

²⁰Анайдарда, тагылла чертенгени, тагылла чертенип, оныҥ ӱстиндезиле чертенгени ол.

²¹Байзыҥла чертенгени, байзыҥла чертенип, ичинде Јӱргениле чертенгени ол.

²²Теҥериле чертенгени, Кудайдыҥ Ширеезиле, ӱстинде Отурганыла чертенгени ол.

²³Бичикчилер ле фарисейлер, слерге ачу-корон! Эки јӱстӱлер! Слер мята, анис, тмин ӧлӧҥдӧрдиҥ онынчы ӱлӱӱзин Кудайга берип јадыгар, је Јасактагы тӧс немени: јаргыны, быйанды ла бӱдӱп јӱрерин ундып койдыгар. Мыны да эдер, оны да ундыбас керек.

²⁴Томонокты шӱӱп, тӧӧни дезе јуда салар сокор башчылар!

²⁵Бичикчилер ле фарисейлер, слерге ачу-корон! Эки јӱстӱлер! Айактыҥ, табактыҥ тыштын арутап јадыгар, је олордыҥ ичи тоношло, тӧгӱнле толо.

²⁶Сокор фарисей! Айактыҥ ла табактыҥ тышты ару болзын деп, озо баштап ичин арута.

²⁷Бичикчилер ле фарисейлер, слерге ачу-корон! Эки јӱстӱлер! Слер сӧӧк салган, череттелген јерлердий: тышты јараш деп кӧрӱнер, је ичи ӧлгӧн улустыҥ сӧӧктӧриле, кандый ла быјарла толо.

²⁸Слер андый ок: тыштыгарла ак болуп кӧрӱнедигер, ичигерде толгоны дезе, — экијӱстениш ле јарамас.

²⁹Бичикчилер ле фарисейлер, слерге ачу-корон! Эки јӱстӱлер! Слер јарлыкчыларга сӧӧк салар јерлер тудуп, актулардыҥ кереестерин кееркедип,

³⁰айдадыгар: «Адаларыстыҥ ӧйинде јӱрген болзобыс, јарлыкчылардыҥ канын тӧгӱзишпес эдибис».

³¹Анайып, бойыгарды јарлыкчыларды ӧлтӱрген улустыҥ уулдары деп, бойыгарга удура керелеп јадыгар.

³²Адаларыгар баштаганды учына јетиригер.

³³Јыландар, коронду јыланныҥ ач-ӱрени! Таамыга тӱжӱрер јаргыдаҥ канайып кыйыжарыгар?

³⁴Бат, оныҥ учун слерге јарлыкчыларды, керсӱлерди ле ӱредӱчилерди ийип јадым. Кезигин ӧлтӱреригер, кере тартарыгар, кезигин дезе синагогалараарда согорыгар, каладаҥ калага сӱреригер.

³⁵Јерде тӧгӱлген ончо актулардыҥ каны слерге тӱшкей: ак сагышту Авельдиҥ канынаҥ ала байзыҥ ла тагыл ортодо слер ӧлтӱрген Варахий уулы Захарияныҥ канына јетире.

³⁶Чынын айдадым слерге: мыныҥ ончозы бу ӱйеге једер.

³⁷Јарлыкчыларды ӧлтӱреечи, сеге ийилген элчилерди ташла шыбалаачы Иерусалим, Иерусалим! Куш бойыныҥ балдарын канады алдына јуунаткандый, балдарыҥды канча јуунадайын дебедим, је слер болбодыгар!

³⁸Бат, айлы-јуртыгар ээн артып јат.

³⁹Айдып турум слерге: «Кайраканныҥ адынаҥ келип јатканы алкышту!» деп айтпаганчаар, эмдидеҥ ары Мени кӧрбӧзигер.