Read Јаҥы Кереес Матфей 27 Bible Online

Матфей 27 - Јаҥы Кереес bible

Матфей 27

¹Эрте таҥда ончо улу абыстар ла калыктыҥ јаандары Иисусты ӧлтӱрер деп јӧптӧштилер.

²Оны кӱлийле, Понтий Пилат башчыга апарып бердилер.

³Ол тушта Иисусты садып ийген Иуда Оны јаргылаганын кӧрӱп, бурузын алынала, одус мӧҥӱн акчазын улу абыстарга ла јаандарга кайра јандырып,

⁴айтты: — Актуны ӧлӱмге садып ийип, кинчек эттим. — Бистиҥ ондо не керегис бар? — деп, олор каруу јандырдылар. — Бойыҥ кӧр.

⁵Ол мӧҥӱнин байзыҥда таштап, оноҥ чыгып барала, буунып койды.

⁶Улу абыстар акчаны алып, айттылар: — Мыны байзыҥныҥ эрјинелӱ кайырчагына саларга јарабас, нениҥ учун дезе ол — тӧгӱлер канныҥ баазы.

⁷Јӧптӧжӧлӧ, ол акчала ӧскӧ јердеҥ келгендердиҥ сӧӧгин јуурга, той балкаш узыныҥ јерин садып алдылар.

⁸Оныҥ учун байагы јерди бӱгӱнге јетире «Кан јери» дейтен.

⁹Айдарда, Иеремия деген јарлыкчы ажыра айдылганы бӱтти. Ол айткан: «Олор одус мӧҥӱн акчаны — Израильдиҥ уулдары Оны баалаган бааны алала,

¹⁰той балкаш узыныҥ јери учун берип койдылар. Анайда меге Кайракан айткан».

¹¹Иисус дезе башчыныҥ алдына келип турды. — Сен иудейлердиҥ Кааны ба? — деп, башчы Оноҥ сураарда, Иисус: — Сен айдып туруҥ — деди.

¹²Улу абыстар ла јаандар Оны бурулап турарда, Ол бир де каруу бербеди.

¹³Айдарда, Пилат айтты: — Сен не, укпай туруҥ ба? Сеге удура керелеп турган немениҥ кӧбин!

¹⁴Је оныҥ бир де сӧзине каруу бербесте, башчы сӱрекей кайкады.

¹⁵Башчы дезе калыктыҥ кӱӱниле, тӱрмеде отургандардыҥ бирӱзин байрам кӱнде јаҥжыкканыла божодотон болгон.

¹⁶Ол тушта Варавва деп јарлу кижи кижендӱ отурган.

¹⁷Анайдарда, калык јуулыжып келерде, Пилат сурады: — Мени слерге кемди божотсын деп туругар: Варавваны ба, эмезе Христос дейтен Иисусты ба?

¹⁸Иисусты кӱйӱнеле берип ийгендерин ол билер болгон.

¹⁹Качан ол јаргы эдетен јерде отурарда, абакайы айттырып ийди: «Ол Актуга тийбеген болзоҥ кайдар? Бӱгӱн тӱш јеримде Ол учун кӧп кыйналдым».

²⁰Бу ӧйдӧ улу абыстар ла јаандар Варавваны некезин, Иисусты ӧлтӱрзин деп, калыкты бӱдӱндирип ийдилер.

²¹Башчы олордоҥ сурады: — Мени слерге бу экӱниҥ кажызын божотсын деп туругар? Олор: — Варавваны — дедилер.

²²— Христос дейтен Иисусты канайдайын? — деп, Пилат сурады. Ончолоры: — Кере тартсын! — дештилер.

²³— Ол јаман нени эткен? — деп, башчы сурады. Је олор там тыҥыда кыйгырышты: — Кере тартсын!

²⁴Пилат аргазын таппай, калыктыҥ тӱймеени тыҥып турганын кӧрӧлӧ, суу сузуп, калык кӧзинче колын јунуп, айтты: — Бу Актуныҥ канында бурулу эмезим. Бойыгар кӧрӱгер.

²⁵— Оныҥ каны биске, бала-баркабыска болгой — деп, ончолоры каруу јандырдылар.

²⁶Айдарда, Пилат олорго Варавваны божотты, Иисусты дезе камчыладала, кере тартсын деп, берип ийди.

²⁷Ол тушта башчыныҥ јуучылдары Иисусты претория дейтен кӱрентик ичине экелеле, Оны эбире ончо черӱни јууп алдылар.

²⁸Оныҥ кийимин чечип, Ого кубакай-кызыл катанчык кийдирдилер.

²⁹Тегенекти ӧӧрӧлӧ, бажына салып, оҥ колына тайак туттырып, алдына тизеленип, «Иудейлердиҥ Кааны эзендик болзын!» — деп, каткырыжа бердилер.

³⁰Ого тӱкӱрип, тайак алып, бажына согуп турдылар.

³¹Оны шоодоло, катанчыкты уштып, Бойыныҥ кебин кийдиреле, керӱге апардылар.

³²Чыгып барадып, Киринейдиҥ Симон деп кижизине туштайла, Иисустыҥ керӱ агажын апарзын деп, ого јакардылар.

³³Голгофа — «Куу-Баш» деп јерге келеле,

³⁴Ого ӧт кошкон уксус ичерге бердилер, је Ол амзайла, ичпеди.

³⁵Оны кере тарткандар дезе шыбага таштап, кийимин ӱлежип алдылар,

³⁶отурып алып, Оны анда каруулдадылар.

³⁷Бажыныҥ ӱсти орто Оныҥ бурузын кӧргӱскен бичик илдилер: «Бу Иисус, иудейлердиҥ Кааны».

³⁸Оныла кожо эки тонокчыны керип койгондор: бирӱзин оҥ јанына, ӧскӧзин — сол.

³⁹Ӧдӱп бараткан улус баштарын кекип, Оны јамандап,

⁴⁰айдыжып турдылар: — Байзыҥды бузаачы ла ӱч кӱнге тудаачы! Бойыҥды Бойыҥ аргада! Кудайдыҥ Уулы болзоҥ, керӱ агаштаҥ тӱш!

⁴¹Анайып улу абыстар да бичикчилерле, јаандарла, фарисейлерле кожо шоодып, айдып турдылар:

⁴²— Ӧскӧ улусты аргадап јӱрген эди, Бойын Бойы дезе аргадап болбойт! Ол Израильдиҥ Кааны болзо, эмди керӱ агаштаҥ тӱшсин, ол тушта Ого бӱдерис.

⁴³Кудайга иженген эди, Ого јарамыкту болзо, эмди Кудай Оны аргадазын. Ол Бойын Кудайдыҥ Уулы деп аданган јок беди.

⁴⁴Оныла кожо кере тартырган тонокчылар да Оны анайып ок сӧгӱп турдылар.

⁴⁵Тал-тӱштеҥ ала јер ӱстине караҥуй тӱжӱп, ӱч саатка јетире турды.

⁴⁶Ӱч саат кирезинде дезе Иисус тыҥ ӱнденип, айтты: — Или, Или! Лама савахфани? Онызы: «Кудайым, Кудайым! Мени не таштадыҥ?» — дегени.

⁴⁷Анда турган улустыҥ кезиги мыны угала, айттылар: — Ол Илияны кычырып јат.

⁴⁸Олордыҥ бирӱзи тап эдип јӱгӱрип барала, шиҥдиретен неме алып, уксусла чыктытты, тайакка саптап, Ого ичерге берди.

⁴⁹Кезиктери дезе айттылар: — Акыр, Илия Оны аргадаарга келгей не, кӧрӧлик.

⁵⁰Иисус дезе, база катап тыҥ ӱнденип, тыны кыйыла берди.

⁵¹Је бат, байзыҥдагы кӧжӧгӧ ӱстиги бажынаҥ тӧмӧн тӱжӱре эки јара јыртылды. Јер силкинди, таштар јарылды,

⁵²сӧӧк салган јерлердиҥ эжиктери ачылды. Кӧп агарулар тирилип,

⁵³сӧӧк салган јерлердеҥ чыктылар. Ол тирилген кийнинде олор агару калага кирип, кӧп улуска кӧрӱнгендер.

⁵⁴Јӱс јуучылдыҥ јааны ла Иисусты каруулдаган улус дезе јер силкингенин, не ле болгонын кӧрӧлӧ, куды чыгып, айттылар: — Ол чындаптаҥ Кудайдыҥ Уулы болгон!

⁵⁵Анайда ок ыраагынаҥ кӧрӱп турган кӧп ӱй улус болгон. Олор Иисуска болужып, Оныла кожо Галилейдеҥ келгендер.

⁵⁶Олордыҥ ортозында Мария Магдалина, Иаков ло Иосийдиҥ энези Мария, Зеведейдиҥ уулдарыныҥ энези болгондор.

⁵⁷Эҥирде Аримафейдеҥ Иосиф деп бай кижи келди. Ол база Иисустыҥ ӱренчиги болгон.

⁵⁸Пилатка келеле, ол Иисустыҥ сӧӧгин сурады. Айдарда, Пилат сӧӧкти берзин деди.

⁵⁹Иосиф оны алала, ару кеден бӧслӧ ороп,

⁶⁰јуукта бойы кайадаҥ ойгон сӧӧк салар јаҥы јерге апарып, салып койды. Эжигин јаан ташла базырала, јӱре берди.

⁶¹Мария Магдалина, база бир Мария анда ок болуп, сӧӧк салган јердиҥ одожында отургандар.

⁶²Пятницаныҥ эртенгизи кӱн улу абыстар ла фарисейлер Пилатка јуулыжып,

⁶³айттылар: — Бийибис, ол мекечи эзен јӱрерде, ӱч кӱннеҥ тирилерим деп айтканын эске алдыбыс.

⁶⁴Оныҥ учун сӧӧк салган јерди ӱчинчи кӱнге јетире каруулдазын деп јакар. Оноҥ башка, ӱренчиктери келип, сӧӧкти уурдап алала, калыкка Оны тирилди дешпезин. Бу кийниндеги меке башкызынаҥ јаман болор.

⁶⁵— Каруулчыктар бар. Канайып каруулдайтанын бойыгар билереер — деп, Пилат олорго айтты.

⁶⁶Олор барала, сӧӧк салган јерге каруул тургустылар, тажына таҥма бастылар.