Read Јаҥы Кереес Матфей 4 Bible Online

Матфей 4 - Јаҥы Кереес bible

Матфей 4

¹Мыныҥ соҥында Тын Иисусты кӧрмӧскӧ ченедерге, куба чӧлгӧ апарды.

²Иисус тӧртӧн тӱш ле тӧртӧн тӱн орозо тудуп, аштай берди.

³Ченеечи Ого базып келеле, айтты: — Сен Кудайдыҥ Уулы болзоҥ, бу таштарга калаш боло берзин деп айт.

⁴Је Ол каруу јандырды: — Бичилген сӧс бар: «Кижи јаҥыс калаш јип тирӱ јӱрер эмес, је Кудай айдып турган кандый ла сӧслӧ тирӱ јӱрер».

⁵Айдарда, кӧрмӧс Оны агару калага апарып, байзыҥныҥ ӱстине тургузала,

⁶айтты: — Сен Кудайдыҥ Уулы болзоҥ, тӧмӧн калып ий. Бичилген јок беди: «Бойыныҥ ангелдерине јакарар. Будыҥ ташка бӱдӱрилбезин деп, Сени кол бажына апарар».

⁷— База бичигени бар: «Кайраканды, сениҥ Кудайыҥды, ченебе» — деп, Иисус каруу јандырды.

⁸Кӧрмӧс Оны база бир сӱрекей бийик кырга апарала, телекейдиҥ ончо каандыктарын ла олордыҥ магын кӧргӱзип,

⁹айтты: — Меге кӧҥкӧрӧ тӱжӱп бажырар болзоҥ, мыныҥ ончозын Сеге берерим.

¹⁰— Менеҥ кеде тайыл, сатана! — деп, Иисус айтты. — Бичилген јок беди: «Кайраканга, сениҥ Кудайыҥа, бажыр, јаҥыс Ого јалчы бол».

¹¹Мыныҥ соҥында кӧрмӧс Иисустаҥ јӱре берди. Је бат, ангелдер келип, Ого јалчы болуп јӱрдилер.

¹²Иоаннды тӱрмелеп койгонын угала, Иисус Галилей јерине јӱре берди.

¹³Назареттеҥ чыгала, талай јаказындагы Капернаумга келип јӱрди. Ол Завулон ло Неффалимниҥ јери болгон.

¹⁴Исаия деген јарлыкчы ажыра айдылганы бӱтсин деп, мынайда болгоны бу. Ол айткан:

¹⁵«Талай јаар јӱре берген јолду Завулон јери, Неффалим јери! Иордан ары јаны! Кара јаҥду јурт турган Галилей јери!

¹⁶Караҥуйда отурган калык улу јарык кӧрди, ӧлӱмниҥ кӧлӧткӧзи бӱркеген ороондо јӱрген улуска јарык јарыды».

¹⁷Оноҥ ло бери Иисус јарлыктап, айдып јӱрер болды: — Кинчектеригерди алынып, Кудайга баштаныгар! Теҥери Каандыгы јууктап келди!

¹⁸Галилейдиҥ талайын јакалай барадып, Иисус эки карындашты кӧрӱп ийди: Петр дейтен Симонды ла оныҥ Андрей карындажын. Олор балыкчылар болгон учун талайда шӱӱндеп турган.

¹⁹— Мени ээчий барыгар — деп, Иисус олорго айтты. — Слерди улус тудаачы эдип салайын.

²⁰Олор бу тарый шӱӱнин артырып койоло, Оныҥ кийнинеҥ бастылар.

²¹Оноҥ ары барып, база эки карындашты: Зеведей уулы Иаковты ла оныҥ Иоанн карындажын кӧрӱп ийди. Олор Зеведей адазыла кожо кемеде шӱӱнин јамап отурган. Олорды кычырды.

²²Олор бу ла тарый, кемезин ле адазын артырып койоло, Оныла кожо бастылар.

²³Иисус Галилейдиҥ бастыра јерлериле јӱрди, олордыҥ синагогаларына кирип ӱретти, Каандык керегинде Сӱӱнчилӱ Јар јарлап, улустыҥ не ле оорузын, не ле јоболын јазып јӱрди.

²⁴Иисус керегинде табыш Сирия ичине јайылды. Ого ончо јоболдуларды, јӱзӱн-јӱӱр ооруга бастырткандарды: туткак оорулу улусты, ӧзӧк-буурында шилемирлӱ, улаарып базып јӱрер улусты, курулып калгандарды экелип тургандар. Ол ончозын јазып турган.

²⁵Галилей јеринеҥ, Он-Турадаҥ, Иерусалимнеҥ, Иудей јеринеҥ, Иордан ары јанынаҥ камык улус Оныла кожо јӱрген.