Read Јаҥы Кереес Матфей 5 Bible Online

Матфей 5 - Јаҥы Кереес bible

Матфей 5

¹Иисус улусты кӧрӧлӧ, кырга чыкты. Отура берерде, Ого ӱренчиктери базып келди.

²Олорды ӱредип баштап, айтты:

³— Тыны тӱреҥи јӱргендер кежиктӱ: Теҥери Каандыгы — олордыйы.

⁴Ыйлап јӱргендер кежиктӱ: олорго коот болор.

⁵Јобоштор кежиктӱ: олор јерди энчиленер.

⁶Чындыктаҥ аштап-суузап јӱргендер кежиктӱ: олор тойор.

⁷Быйанду улус кежиктӱ: олорго быйан једер.

⁸Ару јӱректӱлер кежиктӱ: олор Кудайды кӧрӧр.

⁹Амыр јайап јӱргендер кежиктӱ: олор Кудайдыҥ уулдары деп адалар.

¹⁰Чындык учун улуска кыстадып јӱргендер кежиктӱ: Теҥери Каандыгы — олордыйы.

¹¹Мен учун улуска јаман айттырып, сӱрдӱрип, јабарладып бурулатсагар, кежиктӱ болгоныгар ол.

¹²Сӱӱнигер, јыргагар: теҥеридеги кайралыгар улу! Анайып ок слердеҥ озо јӱрген јарлыкчылар да истеткен эди.

¹³Слер — јердиҥ тузы. Тус амтанын јылыйткажын, оны катап неле тусту эдер? Ол неге де јарабас, оны јаҥыс улус тепсезин деп, чыгара таштайтан.

¹⁴Слер — бу телекейдиҥ улузына јарык. Кыр бажында турган кала кӧскӧ илинбей калбас.

¹⁵Јарыткышты камысканда, оны казанла кӧҥкӧрбӧйтӧн. Карын, оны бойыныҥ јерине тургузатан, ол айыл ичиндеги ончо улуска јарыйт.

¹⁶Јаркыныгар улус алдында анайып јарып турзын, олор ак кылынып јӱргенигерди кӧрӱп, Теҥеридеги Адагарды алказын.

¹⁷Мен Јасакты эмезе јарлыкчылардыҥ бичигенин јоголторго келдим деп сананбагар. Јоголторго эмес, бӱдӱрерге келдим.

¹⁸Чынын айдадым слерге: теҥери ле јер јастыкпаганча, ончозы бӱтпегенче, эҥ оок бир де танык, бир де чийик Јасактаҥ јастыкпас.

¹⁹Анайдарда, кем кижи бу эҥ кичӱ јакылталардыҥ кажы бирӱзин бузуп, улусты да бого ӱретсе, Теҥери Каандыгында эҥ кичӱ деп адалар. Кем кижи јакылтаны бӱдӱрип, улусты да бого ӱретсе, Теҥери Каандыгында улу деп адалар.

²⁰Айдып турум слерге: Кудайга чындык болгоныгар бичикчилердийин ле фарисейлердийин артыктабаза, Теҥери Каандыгына кирбезигер.

²¹Кижи ӧлтӱрбе деп, ада-ӧбӧкӧлӧргӧ айткан сӧсти укканыгар. Кижи ӧлтӱргени јаргыладар.

²²Је Мениҥ слерге айдып турганым бу: карындажына темей чугулданып турган кижи јаргыладар; карындажына «рака»[2] дегени, оток-кӱрееде јаргыладар; «аамай» дегени, отту гееннага[3] тӱжер эдип буруладар.

²³Анайдарда, Кудайга берӱ берейин деп, тагылга келеле, карындажыҥ сеге комыдалду болгоны санааҥа киргежин,

²⁴берейин дегениҥди тагылдыҥ јанына салып кой; барып, озо карындажыҥла јаражып ал, оноҥ келип, берейин дегениҥди бер.

²⁵Бурулаачы кижиҥле јолдо кожо тужыҥда саадабай јаражып ал; бурулаачы кижиҥ сени јаргычыга апарып бербезин, јаргычы сени тӱрмениҥ ишчизине берип ийбезин, анайып сени тӱрмелеп койгылабазын.

²⁶Чынын айдадым сеге: калганчы оок акчаны тӧлӧбӧгӧнчӧҥ, оноортынаҥ чыкпазыҥ.

²⁷Чайдам [4] болбо деп, ада-ӧбӧкӧлӧргӧ айткан сӧсти укканыгар.

²⁸Је Мениҥ слерге айдып турганым бу: ӱй кижиге кӱӱнзеп кӧргӧни, оныла кожо јӱрегинде кинчек эткени ол.

²⁹Оҥ кӧзиҥ сени јаманга баштап турган болзо, оныҥды кодоро тартып, бойыҥнаҥ ары таштап ий. Алкы бойыҥ таамыга ташталганчаҥ, эдиҥниҥ бир ӱйезинеҥ айрылып калганыҥ бойыҥа јакшы.

³⁰Оҥ колыҥ сени јаманга баштап турган болзо, оныҥды кезип, бойыҥнаҥ ары таштап ий. Сен бойыҥ таамыга ташталганчаҥ, бир ӱйенеҥ айрылып калганыҥ бойыҥа јакшы.

³¹База айткан сӧс бар: «Алган эжиле айрылыжып јаткан кижи, онызына айрылышканы керегинде кере бичик берзин».

³²Је Мениҥ слерге айдып турганым бу: чайдам эмес эжиле айрылыжып јатканы, онызын ӧскӧ кижиле кинчекке кийдирип јат; айрылыжып калганды алганы, оныла кожо кинчекке кирип јат.

³³Черт буспа, је Кайраканныҥ алдына чертенип айтканыҥды бӱдӱр деп, ада-ӧбӧкӧлӧргӧ айткан сӧсти база укканыгар.

³⁴Је Мениҥ слерге айдып турганым бу: качан да чертенбегер. Теҥериле де чертенбегер, Кудайдыҥ Ширеези ол;

³⁵јерле де чертенбегер, Кудайдыҥ бут алды ол; Иерусалимле де чертенбегер, улу Каанныҥ калазы ол;

³⁶бажыҥла да чертенбе, бажыҥныҥ бир де кылын агартып эмезе карартып болбозыҥ.

³⁷Айдар сӧзигер мындый болзын: эйе болзо, «эйе», јок болзо, «јок». Кожуп айтканы, — јаманнаҥ.

³⁸Кӧс ордына кӧс, тиш ордына тиш дегенин укканыгар.

³⁹Је Мениҥ слерге айдып турганым бу: јаманга удурлашпа. Карын, оҥ јаагыҥа тажып ийген кижиге база бир јаагыҥды тӧгӧп бер.

⁴⁰Сениле јаргылажып, чамчаҥды алайын дегенге, катанчыгыҥды да суурып бер.

⁴¹Бир чакырым јерге кожо барып кел деп албадаган кижиле кожо эки чакырым јерге барып кел.

⁴²Сураганга — бер, тӧлӱге алайын дегеннеҥ — туура баштанба.

⁴³Јуугыҥга буурзап јӱр, ӧштӱҥди јаман кӧр дегенин укканыгар.

⁴⁴Је Мениҥ слерге айдып турганым бу: ӧштӱлеригерге буурзагар, слерди каргагандарды алкагар, слерди јаман кӧргӧндӧргӧ јакшыгар јетиригер, слерге јаманын јетиргендер учун, слерди истегендер учун мӱргигер.

⁴⁵Јаҥыс анайып Теҥеридеги Адагардыҥ уулдары болорыгар. Ол Бойыныҥ кӱнин јамандардыҥ да, јакшылардыҥ да ӱстине чыксын дийт; јаҥмырын ак сагыштуга ла кара сагыштуга ийет.

⁴⁶Слерге буурзап тургандарга буурзаар болзогор, слерди не учун кайралдайтан? Каланчылар да анайда эдип турган эмес беди?

⁴⁷Јаҥыс карындаштарыгарды уткып турган болзогор, аҥылу нени эдип јадыгар? Ӧскӧ калыктар да анайда эдип турган эмес беди?

⁴⁸Анайдарда, теҥеридеги толо кемдӱ Адагардый, толо кемдӱ болыгар.