Read Јаҥы Кереес Марк 16 Bible Online

Марк 16 - Јаҥы Кереес bible

Марк 16

¹Суббот кӱн ӧдӧ берерде, Мария Магдалина, Иаковтыҥ энези Мария, оноҥ Саломия Иисустыҥ мӧҥкӱзин барып сӱркӱштеерге, јараш јытту сӱркӱш садып алдылар.

²Неделениҥ баштапкы кӱнинде эрте таҥда, кӱн чыгарда, сӧӧк салар јерге келип,

³бойлоры ортодо эрмектештилер: — Сӧӧк салган јердиҥ эжигинеҥ ташты биске кем аҥтарып берер?

⁴Кӧрзӧ, таш аҥтарылып калтыр. Ол дезе тапту јаан болгон.

⁵Сӧӧк салган јерге киреле, оҥ јанында ак кийимдӱ јиит уул отурганын кӧрӱп, коркый бердилер.

⁶Ол дезе ӱй улуска айтты: — Алаҥ кайкабагар! Слер Назарет јеринеҥ, кере тартылган Иисусты бедиреп јадыгар. Ол тирилген, мында јок. Јаткан јери бу.

⁷Је барып, ӱренчиктерине ле Петрга айдыгар: «Оныҥ слерге айтканыла, Ол Галилейге слердеҥ озо барып јат, Оны анда кӧрӧригер».

⁸Олор чыгала, сӧӧк салган јердеҥ јӱгӱре бердилер. Сертилдеп, куйка баштары јимиреп, коркыган бойынча, кижиге неме айтпадылар.

⁹Неделениҥ баштапкы кӱнинде эрте таҥда тирилеле, Иисус озо Мария Магдалинага кӧрӱнди. Ол башкыда оныҥ ӧзӧк-буурынаҥ јети шилемир чыгарган.

¹⁰Мария Магдалина барып, Иисусла кожо јӱргендерге, олорго, ыйлажып-сыктажып отургандарга, тил јетирди.

¹¹Је олор Иисус эзен, Мария Магдалина Оны кӧргӧн деп угала, бӱтпедилер.

¹²Мыныҥ кийнинде олордыҥ экӱзи јурт јаар барадарда, Иисус ӧскӧ бӱдӱмдӱ болуп, олорго јолдо кӧрӱнди.

¹³Олор бурылып, ӧскӧлӧрине табыш јетирдилер, је олорго до бӱтпедилер.

¹⁴Адакыда эҥирде курсак јип кыйын отурган тужында он бир ӱренчигине кӧрӱнип, олорды бӱтпези ле јӱректери сокортыганы учун каарып айтты, нениҥ учун дезе Оныҥ тирилген Бойын кӧргӧндӧргӧ бӱтпегендер.

¹⁵Олорго айтты: — Јер-телекей сайын барыгар, ончо јайалганга Сӱӱнчилӱ Јарды јарлагар.

¹⁶Ого бӱделе, креске тӱшкен кижи аргадалар. Бӱтпеген кижи дезе јаргыладар.

¹⁷Бӱткендерге мындый билдилер коштонып јӱрер: олор Мениҥ адымла шилемирлерди чыгарар, јаҥы тилле эрмектенер;

¹⁸јыланды колло тудар, ӧлгӧдий де неме ичсе, олорго каршу јетпес; јоболдуларга колын салып, алкаар, олор јазылар.

¹⁹Анайып, олорло эрмектешкен кийнинде, Иисус Кайракан теҥериге кӧдӱрилип, Кудайдыҥ оҥ јанына отурды.

²⁰Олор дезе барып, јер сайын јарлап јӱрдилер. Кайракан олорго болужып, олордыҥ сӧзин билдилерле тыҥыдып турды. Аминь[2].