Read Јаҥы Кереес Марк 4 Bible Online

Марк 4 - Јаҥы Кереес bible

Марк 4

¹Иисус талайдыҥ јаказында ойто ло ӱредип баштады. Ого кӧп улус јуулып келерде, кемеге кирип, талайда отурды, улус дезе ончозы талайдыҥ јарадында турды.

²Ол укаа сӧстӧр айдып, кӧп ӱретти, ӱредип тура, олорго айтты:

³— Угугар! Ӱрендеечи кижи ӱрендеерге чыккан.

⁴Ӱрендеп турарда, кезик ӱрен јол кырына тӱшкен. Куштар учуп келеле, олорды чокып койгон.

⁵Кезиги тобрагы ас ташту јерге тӱшкен. Тобрагы калыҥ эмес болгондо, удабай кылгазы ӧзӱп чыккан.

⁶Кӱн чыгарда чалдыгып, тазыл јок болгон учун, кургап калган.

⁷Кезиги тегенектӱ јерге тӱшкен. Тегенек ӧзӱп, оны туй базып койордо, ажы бӱтпеген.

⁸Кезиги јакшы јерге тӱшкен. Ӧскӱлеҥ болуп, мажак бӱткен, ӱрендегенине кӧрӧ кезиги одус, кезиги алтан, кезиги јӱс катап кӧп тӱжӱм берген.

⁹Иисус оноҥ айтты: — Кулакту кижи уксын!

¹⁰Ол јаҥыскан артып каларда, Оныҥ јанында јӱргендер он эки ӱренчикле кожо укаа сӧс керегинде сурадылар.

¹¹Иисус олорго айтты: — Слерге Кудайдыҥ Каандыгыныҥ јажыттарын билери берилген, ӧскӧ-туш улуска дезе, ончозын укаалап айдатан,

¹²нениҥ учун дезе олор кӧзиле кӧрзӧ дӧ, кӧрбӧйдилер, кулагыла укса да, аайлабайдылар. Кудайга баштанган болзо, кинчектери ташталар эди.

¹³Оноҥ сурады: — Бу укаа сӧсти аайлабадыгар ба? Андый болзо, ончо укаа сӧстӧрди канайып аайлаарыгар?

¹⁴Ӱрендеечи сӧс ӱрендейт.

¹⁵Јол кырына тӱшкен ӱрен деп, мындыйларды айтканы: олорго сӧс ӱренделер, је олор сӧсти укса ла, сатана келип, јӱрегинде ӱренделген сӧсти алып барат.

¹⁶Анайып ок ташту јерге тӱшкен ӱрен деп, мындыйларды айтканы: олор айткан сӧсти укканда, бу тарый сӱӱнип, кӧксине алынадылар.

¹⁷Је олор бойында тазыл јок, турумкай эмес. Оноҥ, сӧс учун ачу келгежин эмезе истежӱ болгожын, бу тарый јана тӱшкилейт.

¹⁸Тегенектӱ јерге тӱшкен ӱрен деп, сӧсти уккан улусты айтканы.

¹⁹Је јадынды кичеейтени, јӧӧжӧгӧ тартылатаны, ӧскӧ дӧ кычалар олордыҥ ичине кирип, уккан сӧсти туй базып койот, ол сӧс тӱжӱм јок артып калат.

²⁰Јакшы јерге ӱренделген дегени, сӧсти угуп, кӧксине алынып турган улусты айтканы. Ол сӧс ӱрендегенине кӧрӧ бирӱзи одус, ӧскӧзи алтан, кезиги јӱс катап кӧп тӱжӱм берет.

²¹Иисус олорго айтты: — Јарыткышты табактыҥ эмезе орынныҥ алдына тургузарга экелетен беди? Оны јарыткыштыҥ јерине тургузарга экелетен эмес пе?

²²Иле болбос јажыт неме јок; тыштына чыкпас туйук неме јок.

²³Кулакту кижи уксын!

²⁴База айтты: — Угуп турганыгарга ајару эдигер. Кандый кемјӱле кемјииригер, анайып ла бойыгарга кемјилер, слерге, угуп тургандарга, ӱзеери кожулар.

²⁵Кемде бар, ого берилер, кемде дезе јок, оныҥ бары да айрылар.

²⁶База айтты: — Кудайдыҥ Каандыгы бого тӱҥей: кижи јерге ӱрен чачат,

²⁷тӱнде уйуктайт, тӱште турат, је ӱрен канайда чыгып, ӧзӱп турганын билбейт.

²⁸Јер дезе бойы бойынаҥ озо баштап кӧк ӧскӱрет, оноҥ мажак, оноҥ мажакты ашла толтырат.

²⁹Аш бышканда, бу тарый ол серп алып, кырага барат, нениҥ учун дезе ашты кезер ӧй једип келген.

³⁰База айтты: — Кудайдыҥ Каандыгын неге тӱҥдейли? Эмезе кандый укаа сӧслӧ оны айдалы?

³¹Ол горчицаныҥ ӱренине тӱҥей. Оны јерге ӱрендеп јатканда, јердеги ончо ӱрендердеҥ оок.

³²Ӱрендеп койгондо, чыгып, кандый ла маала ажынаҥ бийик болор, сабактары барбак болуп, оныҥ кӧлӧткӧзине теҥериниҥ куштары уйа тартар аргалу.

³³Кӧп андый укаа сӧстӧрлӧ олордыҥ оҥдоор кирезиле сӧс јарлап јӱрди.

³⁴Укаалабай олорго неме айтпас болды, ӱренчиктерине дезе јаҥыскандыра ончозын јартап турды.

³⁵Ол кӱн эҥирде Иисус ӱренчиктерине: — Ол јанына кечели — деди.

³⁶Олор улусты јандырып ийеле, кемеде отурган Иисусты кожо алып, јӱстилер. Анда ӧскӧ дӧ кемелер болгон.

³⁷Јаан јоткон тӱшти. Толкулар кемеге табарарда, ичине суу кирип, толуп турды.

³⁸Иисус дезе кемениҥ кийни јанында неме јастанып алала, уйуктап јаткан. Оны ойгозып, айттылар: — Ӱредӱчи! Чӧҥӱп баратканыс Сеге тӱҥей ле бе?

³⁹Ол туруп, салкынды токтодып, талайга айтты: — Тымы, токто! Салкын токтоп, тып-тымык боло берди.

⁴⁰— Слер не андый коркынчак болдыгар? — деп, Иисус олорго айтты. — Бӱтпес болуп кайттыгар?

⁴¹Олордыҥ куйка баштары јимиреп, бой-бойына айдып турдылар: «Салкын да, талай да Ого уккур болордо, бу Кем болотон?»