Read Јаҥы Кереес Лука 18 Bible Online

Лука 18 - Јаҥы Кереес bible

Лука 18

¹Јаантайын мӱргип, чӧкӧбӧйтӧнин билип јӱрзин деп, Иисус олорго укаа сӧс айтты:

²— Бир калада јаргычы болгон. Ол Кудайдаҥ да коркыбайтан, улустаҥ да уйалбайтан.

³Ол ло калада бир тул ӱй кижи болгон. Ол јаргычыга келип, «Мени ӧштӱӱмнеҥ корула» — деп, јайнап сурап туратан.

⁴Јаргычы узак ӧйгӧ јӧпсинбей, оноҥ бойында айдынган: «Мен Кудайдаҥ коркыбас, улустаҥ уйалбас та болзом,

⁵бу тул ӱй кижи меге амыр бербей турганда, оны корулайын, мени тӱйметпезин, база келбезин».

⁶— Ак-чек эмес јаргычы нени айтканын уктыгар ба? — деп, Кайракан айтты. —

⁷Кудай Ого тӱн-тӱш јайнап турган Бойы талдап алгандарын корулабас беди, олорды корулаарын саададып та турган болзо?

⁸Айдып турум слерге: олорды саадабай корулаар. Је Кижи Уулы келеле, Ого бӱдӱп турганды јердеҥ табар ба?

⁹Бойлорын актузынып, ӧскӧлӧрин јабыссынып турган кезик улуска дезе Иисус укаа сӧс айтты:

¹⁰— Эки кижи мӱргиирге, байзыҥга кирген: бирӱзи фарисей, экинчизи дезе — каланчы.

¹¹Фарисей туруп, бойында мӱргиген: «Э-э, Кудай! Мен ӧскӧ улустый тонокчы, кӱјӱрчи, балыр јӱрӱмдӱ эмезе бу каланчыдый эмес болгоныма, Сеге алкыш-быйан јетирип турум.

¹²Неделеде эки катап орозо тудуп, алганымныҥ онынчы ӱлӱӱзин берип јадым».

¹³Каланчы дезе, ыраагында туруп, теҥери ӧрӧ кӧрӧргӧ дӧ тидинбей, је тӧжине согунып, айдынып турган: «Э-э, Кудай, меге, кинчектӱ кижиге, буурзак бол!»

¹⁴Айдып турум слерге: фарисей эмес, бу кижи Кудайдыҥ алдында кӧп акталып јанган. Бойын бийик туткан кажы ла кижи — јабызадылар, бойын јабыс тутканы — бийиктедилер.

¹⁵Кол тийгиссин деп, Иисуска кичӱ балдарды экелип турдылар. Ӱренчиктери дезе, мыны кӧрӧлӧ, олорды арбап тургандар.

¹⁶Је Иисус балдарды Бойына кычырып алып, айтты: — Балдарды бери божодыгар, Меге келерге буудактабагар. Кудайдыҥ Каандыгы мындыйлардыйы.

¹⁷Чынын айдадым слерге: Кудайдыҥ Каандыгын бала чылап алынбаган кижи ого кирбес.

¹⁸— Быйанду Ӱредӱчи! Ӱргӱлји јӱрӱмди энчиленерге, нени эдейин? — деп, бийлердиҥ бирӱзи Иисустаҥ сурады.

¹⁹Иисус ого айтты: — Мени не быйанду дейдиҥ? Кем де быйанду эмес, јаҥыс Кудай быйанду.

²⁰Чайдам болбо, кижи ӧлтӱрбе, ууры этпе, тӧгӱн керелебе, ада-энеҥди тооп јӱр деген јакылталарды билериҥ.

²¹Бий: — Мыны ончозын јиит тужымнаҥ ала буспай туткан эдим — деди.

²²Мыны угала, Иисус ого айтты: — Сеге база бир неме јетпейт: не барыҥды садып ийеле, тӱреҥилерге ӱлеп бер. Ол тушта теҥериде эрјинелӱ болорыҥ. Оноҥ келип, Мени ээчий бар.

²³Је байагы кижи мыны угала, кунуга берди: ол коркышту бай кижи болгон.

²⁴Иисус оныҥ кунуга бергенин кӧрӧлӧ, айтты: — Бай улуска Кудайдыҥ Каандыгына кирерге кандый кӱч!

²⁵Бай кижиге Кудайдыҥ Каандыгына киреринеҥ, тӧӧгӧ ийне ӱйдинеҥ ӧдӧргӧ јеҥил. Мыны уккан улус айттылар:

²⁶— Айдарда, кем аргаданар аргалу?

²⁷— Улустыҥ эдип болбозын Кудай эдер аргалу — деп, Ол каруу јандырды.

²⁸Петр айтты: — Бат, айлы-јуртыбысты артырып, Сениле кожо јӱрӱп јадыбыс.

²⁹Иисус олорго айтты: — Чынын айдадым слерге: кижи айлы-јуртын, эмезе ада-энезин, эмезе ага-карындажын, эмезе эје-сыйнын, эмезе алган эжин, эмезе бала-барказын Кудайдыҥ Каандыгына болуп артырала,

³⁰бу чакта канча катап кӧпти алар, келер чакта — мӧҥкӱ јӱрӱм.

³¹Он эки ӱренчигин туура апарала, олорго айтты: — Бат, Иерусалимди ӧрӧ чыгып отурыс. Кижи Уулы керегинде јарлыкчылардыҥ ончо бичилгени бӱдер.

³²Эйе, Оны кара јаҥдуларга берип ийгилеер, электегилеер, базынгылаар, Ого тӱкӱргилеер,

³³Оны камчылагылаар, оноҥ ӧлтӱргилеп койор. Је ӱчинчи кӱнде Ол тирилер.

³⁴Је олор мынаҥ нени де аайлабадылар. Бу сӧстӧр олорго туйук болгон, олор айдылганын оҥдобогондор.

³⁵Иисус Иерихонго јууктап келерде, јолдыҥ јанында бир сокор суранчыктап отурган.

³⁶Јаныла кӧп улус ӧдӱп јатканын угала, ол бу не атасы — деп сурады.

³⁷Ого: — Назарет јеринеҥ Иисус ӧдӱп јат — дедилер.

³⁸Айдарда, сокор: — Давид Уулы Иисус, меге буурза! — деп, кыйгыра берди.

³⁹Ичкертинде базып бараткан улус оны унчуктырбаста, ол там ары кыйгырды: — Давид Уулы, меге буурза!

⁴⁰Иисус токтой тӱжӱп, «Оны Меге экелигер» — деди. Сокор Ого базып келерде,

⁴¹— Сеге нени эдейин? Сеге не керек? — деп, оноҥ сурады. Ол айтты: — Кайракан, кӧзим јарызын деп турум!

⁴²Иисус ого: — Кӧзиҥ јарызын! — деди. — Бӱдӱп турганыҥ сени аргадап алды.

⁴³Бу тарый кӧзи јарып, ол Кудайды мактап, Иисусты ээчий басты. Мыны кӧрӧлӧ, ончо улус Кудайды мактадылар.