Read Јаҥы Кереес Лука 23 Bible Online

Лука 23 - Јаҥы Кереес bible

Лука 23

¹Оноҥ ончозы ӧрӧ туруп, Иисусты Пилатка апарала,

²бурулап баштады: — Бу кижи бистиҥ калыктыҥ кӱӱн-санаазын булгап, каганга калан тӧлӧӧргӧ буудактап, Бойын Христос Каан деп аданып јат.

³— Сен иудейлердиҥ Кааны ба? — деп, Пилат Оноҥ сураарда, Ол каруу јандырып, — Сен айдып туруҥ — деди.

⁴Пилат улу абыстарга ла калыкка айтты: — Бу кижидеҥ бир де буру таппай турум.

⁵Је олор јана баспай, айдып турдылар: — Ол Иудей ичинде ӱредип, улусты тӱймедип јат. Галилейде баштаган, эмди бери келген.

⁶Пилат Галилей дегенин угала, «Бу Галилейдиҥ кижизи бе?» — деп сурады.

⁷Ол Иродтыҥ јеринеҥ деп билеле, Оны Иродко ийди. Ирод бу кӱндерде база Иерусалимде болгон.

⁸Иисусты кӧрӧлӧ, Ирод сӱрекей сӱӱнди: Оны алдынаҥ бери кӧрӧйин деп јӱрген. Ол Иисус керегинде кӧп уккан, Оныҥ кандый бир кайкалын кӧрӧр болорым ба деп, иженип турган.

⁹Ол Иисуска кӧп сурактар берди, је бирӱзине де каруу албады.

¹⁰Улу абыстар ла бичикчилер анда туруп, Оны тыҥ бурулап турдылар.

¹¹Ирод дезе бойыныҥ јуучылдарыла Оны базынып ла электеп, Ого јарык кеп катанчыктайла, Пилатка кайра ийди.

¹²Мынаҥ озо ӧштӧжип јӱрген Пилат ла Ирод ол кӱннеҥ ала најылажып алдылар.

¹³Пилат дезе, улу абыстарды, бийлерди ле улусты јууйла,

¹⁴олорго айтты: — Улусты булгап јат деп, бу кижини меге экелдигер. Је бат, слердиҥ кӧзигерче шиҥжӱлеп, бурулап айткан сӧстӧригерди керелеген немени бу кижидеҥ таппадым.

¹⁵Ирод то Оноҥ буру таппай, биске кайра ийген. Айдарда, Ол ӧлӱмге тургадый неме этпеген.

¹⁶Мен Оны кезеделе, божодып ийерим.

¹⁷(Пилат байрам кӱнге кижендӱлердиҥ бирӱзин олорго божодор учурлу болгон.)

¹⁸Је ончозы кыйгырыжа берди: — Ол ӧлзин! Биске Варавваны божот!

¹⁹Варавва дезе калада тӱймеен кӧдӱрип, кижи ӧлтӱрген учун тӱрмелеткен.

²⁰Пилат Иисусты божодып ийерге, улуска катап баштанды.

²¹Је олор: — Оны керип кой! Керип кой! — деп, кыйгырыжып турдылар. Пилат олорго ӱчинчи катап айтты:

²²— Ол јаман нени эткен? Мен Оноҥ ӧлӱмге тургадый буру таппадым. Анайдарда, кезеделе, божодып ийедим.

²³Је олор Оны кере тартсын деп некеп, там ла там тыҥыда кыйгырыжып турдылар. Олордыҥ ла улу абыстардыҥ кыйгызы эркитеп ийди.

²⁴Пилат олордыҥ некелтезин бӱдӱрер деп шӱӱди.

²⁵Тӱймеен кӧдӱрип, кижи ӧлтӱрген учун тӱрмеде отурганды олордыҥ сураганыла божодып, Иисусты дезе олордыҥ табына берип ийди.

²⁶Оноҥ Иисусты апардылар. Кырада јӱреле јанып келеткен Киринейдиҥ Симон деп кижизин тудала, Иисустыҥ кийнинеҥ апарзын деп, керӱ агашты ого јӱктендирип бердилер.

²⁷Иисусты ээчий ал-тӱмен улус, база ыйлашкан-сыкташкан ӱй улус барып јаттылар.

²⁸Ол дезе, олор јаар бурылып, айтты: — Иерусалимниҥ кыстары, Мен учун ыйлабагар. Оныҥ ордына бойыгар, бала-баркагар учун ыйлагар.

²⁹«Бала таппастар, бала таппагандар, эмчегин эмиспегендер кежиктӱ!» деп айдар кӱндер једип келедири.

³⁰Ол тушта кырларга: «Ӱстибиске аҥтарылыгар!» — деп, тӧҥ-кырлаҥдарга: «Бисти кӧмӱп салыгар!» — деп, айдып тургулаар.

³¹Јажарып турган агашла анайда эдип турганда, кургак агашла не болор?

³²Оныла кожо кыйнап ӧлтӱрерге эки тонокчыны апаргандар.

³³Куу-Баш деген јерге келеле, Оны ла эки тонокчыны — бирӱзин оҥ, ӧскӧзин сол јанына керип койдылар.

³⁴Иисус дезе айтты: — Ада! Олордыҥ јаманын таштап кой. Олор нени эдип тургандарын билбей јадылар. Шыбага чачып, Оныҥ кийимин бойлоры ортодо ӱлежип алдылар.

³⁵Улус кӧрӱп турган. Олорло кожо бийлер де шоодып, айдып тургандар: — Ӧскӧ улусты аргадап јӱрген эди, Ол Христос, Кудайдыҥ талдап алганы болзо, Бойын Бойы аргадап алзын!

³⁶Јуучылдар Оны база шоодып, базып келеле, уксус берип,

³⁷— Сен иудейлердиҥ Кааны болзоҥ, Бойыҥды Бойыҥ аргадап ал! — дежип тургандар.

³⁸Оныҥ ӱсти орто «Бу — иудейлердиҥ Кааны» деп грек, рим ле еврей сӧстӧрлӱ бичик илдилер.

³⁹Керидип койгон тонокчылардыҥ бирӱзи Оны јамандап, айдып турды: — Сен Христос болзоҥ, Бойыҥды ла бисти аргадап ал!

⁴⁰Экинчизи оны токтодып, — Сен, анайып ок јаргылаткан бойыҥ, Кудайдаҥ коркыбайдыҥ ба?

⁴¹Бисти чын јаргылаган, эткен керектериске турарын алып јадыбыс. Ол дезе бир де јаманды этпеген — дейле,

⁴²Иисуска айтты: — Каандыгыҥа келзеҥ, мени эске ал, Кайракан!

⁴³Иисус ого айтты: — Чынын айдадым сеге: бӱгӱн ле Мениле кожо райда болорыҥ.

⁴⁴Тал-тӱш кирезинде тӱштиҥ ӱч саадына јетире ончо јерге караҥуй тӱшкен:

⁴⁵кӱн јоголо берген. Байзыҥдагы кӧжӧгӧ ортозыла эки јара јыртыла берген.

⁴⁶Иисус тыҥ ӱнденип, — Ада! Сениҥ колыҥа тынымды берип јадым! — дейле, тыны кыйыла берди.

⁴⁷Јӱс јуучылдыҥ јааны мыны кӧрӧлӧ, Кудайды алкап, айтты: — Бу кижи чын ла акту болгон!

⁴⁸Мыны кӧрӧргӧ јуулган улус не болгонын кӧрӧлӧ, тӧштӧрине согунып, јангылап турды.

⁴⁹Иисусты билген ончо улус ла Оны ээчий Галилейдеҥ келген ӱй улус ыраагынаҥ кӧрӱп тургандар.

⁵⁰Иудейдиҥ Аримафея калазынаҥ Иосиф деп кижи болгон. Ол Кудайдыҥ Каандыгын сакып јӱрген керсӱ ле ак-чек кижи болгон, оток-кӱрееге кирип те турган болзо, оныҥ јӧбин јаратпайтан.

⁵¹

⁵²Је бат, Пилатка келеле, Иисустыҥ мӧҥкӱзин сурады.

⁵³Сӧӧкти тӱжӱреле, кеден бӧскӧ ороп, јылым кайада ойгон сӧӧк салар јерге апарып, салып койды. Анда кемниҥ де сӧӧги салылгалак болгон.

⁵⁴Пятница кӱн болгон, суббот кӱн келип јаткан.

⁵⁵Галилейдеҥ Иисусла кожо келген ӱй улус Иосифтиҥ кийнинеҥ барып, Оныҥ сӧӧги кайда, канайып салылганын кӧрӱп турдылар.

⁵⁶Јанып келеле, јараш јытту май ла сӱркӱш белетеп, Кудайдыҥ јакылтазыла суббот кӱнде амырадылар.