Read Јаҥы Кереес Лука 24 Bible Online

Лука 24 - Јаҥы Кереес bible

Лука 24

¹Неделениҥ баштапкы кӱнинде эрте таҥда, белетеп алган јараш јытту немелерин алганча, эпшилер ле олорло кожо бир кезик ӧскӧ улус сӧӧк салган јерге келдилер.

²Је оныҥ тажы аҥтарылып калган јатты.

³Ичине киреле, Иисус Кайраканныҥ сӧӧгин таппадылар.

⁴Кайкап калган тургулаарда, кенетийин олордыҥ алдына мызылдууш кийимдӱ эки эр кижи кӧрӱнип келди.

⁵Олор коркыганына јабыс эҥчейип ийерде, ол экӱ айттылар: — Тирӱ кижини ӧлгӧн улустыҥ ортозынаҥ не бедиреп туругар?

⁶Ол мында јок, тирилип калган. Туку Галилейде јӱрерде, слерге Ол нени айтканын эске алынып ийзегер:

⁷«Кижи Уулы кинчектӱлердиҥ колына берилип, кере тартырар, је ӱчинчи кӱнде тирилер».

⁸Оныҥ айткан сӧстӧри санааларына кирип келди.

⁹Сӧӧк салган јердеҥ бурылып, он бирге ле ӧскӧлӧриниҥ ончозына тил јетирдилер.

¹⁰Олор Магдалина Мария, Иоанна, Иаковтыҥ энези Мария болгондор. Олорло кожо болгон ӧскӧ дӧ ӱй улус апостолдорго анайып ла айдып турдылар.

¹¹Ӱй улуска кемизи де бӱтпеди, мыны сананып тапкан неме дештилер.

¹²Је Петр туруп, сӧӧк салган јер јаар јӱгӱрди. Оныҥ ичине карап, сӧӧкти оройтон кеден бӧстӧҥ ӧскӧ неме кӧрбӧди. Не болгонын бойында кайкап, јанып ийди.

¹³Ол ло кӱн ӱренчиктердиҥ экӱзи Иерусалимнеҥ он беристе киреде турган Эммаус деп јурт јаар барадып,

¹⁴не болгонын ончозын эрмектежип тургандар.

¹⁵Олор эрмектежип, бойлоры ортодо шӱӱшкилеп турарда, Иисус Бойы јууктап келип, кожо базып ийди.

¹⁶Је олордыҥ кӧстӧри бӧктӱдий болуп, Оны таныбадылар.

¹⁷— Јолдо нени шӱӱжип барадыгар? — деп, Иисус олордоҥ сурады. — Чырайлараар не бӱркӱк?

¹⁸Олордыҥ бирӱзи, Клеопа дегени, айтты: — Бу кӱндерде Иерусалимде не болгонын ого келген улустаҥ јаҥыс сен билбес болдыҥ ба?

¹⁹— Анда не болгон? — деп, Ол сурады. Олор айттылар: — Бис Назарет јеринеҥ Иисусла не болгонын айдадыс. Ол Кудайдыҥ да, ончо улустыҥ да алдында сӧстӧ лӧ керекте кӱчтӱзин кӧргӱскен јарлыкчы болгон.

²⁰Је улу абыстарыс ла башчыларыс Оны ӧлтӱрер эдип јаргылайла, керип койгондор.

²¹Израильди јайымдаары Ол деп, иженген болгоныс. Је бат, бу керектиҥ болгоны ӱчинчи кӱнге барып јат.

²²Бир кезик ӱй улузыс бисти кайкатты. Олор эрте таҥда сӧӧк салган јерге барала,

²³Оныҥ сӧӧгин таппай, биске келип, айткандар: «Биске ангелдер кӧрӱнди, Оны тирӱ дешти».

²⁴Айдарда, бистиҥ улустыҥ кезиги сӧӧк салган јерге барып кӧрӧрдӧ, ӱй улустыҥ айтканы чын болуп калган, је Оныҥ Бойын кӧрбӧгӧндӧр.

²⁵Иисус олорго айтты: — Э-э, сананбастар, јарлыкчылар айткан сӧстӧргӧ бӱдерге, оны јӱрегеерле оҥдоорго бачымдабайдыгар.

²⁶Бойыныҥ магына једерге, Христос бу ончо шыраны ӧтпӧс учурлу болгон бо?

²⁷Моисейдеҥ ле ончо јарлыкчылардаҥ баштайла, Ол Бойы керегинде Агару Бичикте айдылганын јартады.

²⁸Олор Эммаус јуртка јууктап келерде, Иисус оноҥ ары бараачы болды.

²⁹Је ӱренчиктер Оны токтодып, — Эҥир кирип барадыры, бисле кожо артып кал — деп, сурап турдылар. Ол ӱйге кирип, олорло кожо артып калды.

³⁰Олорло кожо кыйын отурып, калашты алып алкады, сындырала, ӱренчиктерге берди.

³¹Олордыҥ кӧстӧри ачылып, Оны танып ийдилер. Је Ол ӱренчиктерине кӧрӱнбес боло берди.

³²Олор бой-бойына айдыштылар: — Јолдо Ол бисле эрмектежип, Агару Бичикти јартаарда, кӧксибисте јӱректерис кӱйбеген беди?

³³Олор тургуза ла туруп, Иерусалимге бурылдылар. Анда он бир апостолды ла олорло кожо јӱргендерди таап алдылар.

³⁴Ӱренчиктер айттылар: — Кайраканныҥ тирилгени чын, Ол Симонго кӧрӱнген.

³⁵Оноҥ байагы эки ӱренчик јолдо не болгонын, калаш сындырып јадарда, Оны канайда таныганын айттылар.

³⁶Олор мынайда айдып турганча, Иисус Бойы олордыҥ ортозына туруп: — Слерге амыр болзын! — деди.

³⁷Олор сӱне кӧрӱп турус дежип, куйка баштары јимирей берди.

³⁸— Не тӱймей бердигер, јӱректеригер нениҥ учун эреҥистелишле толо? — деп, Ол сурады. —

³⁹Мениҥ колымды, Мениҥ будымды кӧригер: бу Мен Бойым эдим. Мени тудуп-сыймап кӧригер: сӱнеде эт-кан да, сӧӧк тӧ јок, Менде дезе бар болгонын кӧрӱп турыгар.

⁴⁰Мынайда айдала, олорго колы-будын кӧргӱсти.

⁴¹Олор сӱӱнгенине, бӱдӱп болбой, кайкажып турарда, Ол: — Мында слерде јиир курсак бар ба? — деди.

⁴²Олор каарып койгон балык ла адаруныҥ балын алып бердилер.

⁴³Балыкты алып, олордыҥ кӧзинче јиди.

⁴⁴Оноҥ айтты: — Моисейдиҥ Јасагында, јарлыкчылардыҥ бичигинде, сарындарда Мен керегинде айдылганы ончозы бӱдер учурлу деп, слерле кожо јӱрген тужымда айдып туратаным бу.

⁴⁵Иисус олорго Агару Бичиктерди оҥдоор сагыш ачып,

⁴⁶айтты: — Бичилгениле, Христос кыйналар, је ӱчинчи кӱнде тирилер;

⁴⁷Оныҥ адында кинчектер ташталзын деп, Кудайга баштанары Иерусалимнеҥ баштайла ончо калыктарда јарлалар.

⁴⁸Слер дезе мыныҥ керечилери.

⁴⁹Адамныҥ берер болгонын слерге ийерим. Слер дезе, ӧрӧртинеҥ кӱч алганчагар, бу калада јӱригер.

⁵⁰Ӱренчиктерин каладаҥ чыгарала, Вифанияга једеле, колдорын саҥ ӧрӧ эдип, олорды алкады.

⁵¹Алкап туруп, олордоҥ айрылып, теҥериге кӧдӱрилип баштады.

⁵²Ӱренчиктер Ого бажырып, сӱӱнчизин бадырып болбой, Иерусалимге јанып келдилер.

⁵³Кудайды алкап, јаантайын байзыҥда болуп јӱрдилер. Аминь.