Read Јаҥы Кереес Лука 4 Bible Online

Лука 4 - Јаҥы Кереес bible

Лука 4

¹Иисус Агару Тын алынып, Иорданнаҥ јанып келерде, Тын Оны куба чӧлгӧ апарды.

²Анда Ол тӧртӧн кӱнниҥ туркунына кӧрмӧскӧ ченетти. Бу кӱндерде нени де јибеди, учында аштай берди.

³Кӧрмӧс Ого айтты: — Сен Кудайдыҥ Уулы болзоҥ, калаш боло берзин деп, бу ташка јакарып ий.

⁴Иисус каруу јандырып, айтты: — Кижи јаҥыс калаш јип тирӱ јӱрер эмес, је Кудайдыҥ не ле сӧзиле тирӱ јӱрер деп бичилген сӧс бар.

⁵Кӧрмӧс Оны бийикке кӧдӱрип, орчылаҥныҥ ончо каандыктарын элес эттире кӧргӱзип,

⁶Ого айтты: — Бастыра мыныҥ бажын билерин, оныҥ магын Сеге берейин. Мыныҥ ончозы меге берилген ине, кемге берейин дезем, берерим.

⁷Анайдарда, меге бажырар болзоҥ, ончозы Сенийи болор.

⁸Иисус каруу јандырды: — Менеҥ кеде тайыл, сатана! Бичилген сӧс бар: «Кайраканга, бойыҥныҥ Кудайыҥа, бажыр, јаҥыс Ого јалчы бол».

⁹Кӧрмӧс Оны Иерусалимге апарып, байзыҥныҥ јабынтызына тургузала, айтты: — Сен Кудайдыҥ Уулы болзоҥ, мыны тӧмӧн калып ий.

¹⁰Бичилген јок беди: «Сени чеберлеп јӱрзин деп, Бойыныҥ ангелдерине јакарар.

¹¹Будыҥ ташка бӱдӱрилбезин деп, Сени кол бажына апарар».

¹²Иисус каруу јандырды: — Кудайыҥ Кайраканды ченебе деп айдылган.

¹³Ончо ченелтезин туузылтала, кӧрмӧс Иисустаҥ бир кезекке јӱре берди.

¹⁴Тыннаҥ кӱч алынала, Иисус Галилейге бурылды. Ол керегинде табыш эбире јерлерге текши јайылды.

¹⁵Олордыҥ синагогаларында улус ӱретти, ончозы Оны макка чыгарып турдылар.

¹⁶Ол Назарет алтайына келди. Бойыныҥ јаҥыла суббот кӱнде синагогага кирип, Агару Бичикти кычырарга ӧрӧ турды.

¹⁷Ого Исаия јарлыкчыныҥ тӱрбегин алып бердилер. Ол тӱрбекти јайа тудуп, мынайда бичилген јерди таап алды:

¹⁸«Кайраканныҥ Тыны — Менде. Ол Мени майлап, тӱреҥи улуска Сӱӱнчилӱ Јар јетирзин деп, кунугып, јӱреги сыстап јӱргендерди јассын деп, олјого киргендерге јайым керегинде, сокорлорго кӧстӧри јарыйтаны керегинде јарлазын деп ийген. Мени Ол базынчыкта јӱргендерди божотсын,

¹⁹Кайраканныҥ быйанду јылы једип келгенин јарлазын деп ийген».

²⁰Тӱрбекти тӱрӱп, синагоганыҥ јалчызына табыштырып, отура берди. Синагогада болгон улус ончозы Оноҥ кӧс албай турдылар.

²¹Иисус олорго айдып баштады: — Мында айдылган, слер уккан сӧстӧр бӱгӱн бӱтти.

²²Ончозы мыныҥ чынын керелеп, Оныҥ айткан јакшылык сӧстӧрин кайкажып, «Бу Иосифтиҥ уулы эмес беди?» — деп, сурап турдылар.

²³Ол айтты: — «Эмчи, бойыҥды бойыҥ јас» деген кеп сӧсти Меге айтпай кайдарыгар, «Бистиҥ укканыбысла, Капернаумда нени эткен эдиҥ, мында, алтайыҥда, база анайда эт» дешкейигер.

²⁴Је чынын айдадым слерге: кандый да јарлыкчыны бойыныҥ јеринде јуутпай јадылар.

²⁵База чынын айдып турум слерге: Илия тушта ӱч јыл алты ай теҥери бӧктӧлип, ончо јерлерде ачана-торо болордо, Израильде кӧп тул ӱй улус болгон.

²⁶Је Илия олордыҥ кемизине де эмес, јаҥыс Сидонныҥ јуугындагы Сарептада јаткан тул ӱй кижиге ийилген.

²⁷Анайып ок Елисей јарлыкчы тушта Израильде капкаш балулу улус кӧп болгон, је Сирияныҥ кижизи Нееманнаҥ ӧскӧ, олордыҥ бирӱзи де аруталбаган.

²⁸Мыны угала, синагогадагы улус ончозы атыйлана берди.

²⁹Тура јӱгӱрижип, Оны каладаҥ чыгарала, јардаҥ ийде салып ийерге, кала турган кырдыҥ ӱстине апардылар.

³⁰Је Ол кӧп улустыҥ ортозыла ӧдӱп, јӱре берди.

³¹Иисус Галилейдеги Капернаум калага келип, суббот кӱнде улус ӱретти.

³²Оныҥ ӱредӱзин кайкап турдылар, нениҥ учун дезе Оныҥ айткан сӧстӧринде ийде-кӱч бар болгон.

³³Синагогада кара јелбиске туттурган, ӧзӧк-буурында шилемирлӱ кижи болгон. Ол тыҥ кыйгыра берди:

³⁴— Эй, Сениҥ бисте не керегиҥ бар, Назарет јеринеҥ Иисус? Сен бисти ӧлтӱрерге келдиҥ бе? Кем болгоныҥды билер турум, Сен — Кудайдыҥ Агарузы!

³⁵Је Иисус: — Унчукпа, бу кижидеҥ чык! — деп, кара јелбиске јакарды. Шилемир оору кижини улустыҥ ортозына јыга базып, ого каршу јетирбей, ӧзӧк-буурынаҥ чыга конды.

³⁶Ончозыныҥ куды чыгып, бой-бойына айдыжып турдылар: — Бу не сӧс? Ондо јаҥ ла кӱч бар, Ол кара јелбистерге јакарып ийгенде, олор чыга бергилейт!

³⁷Иисус керегинде табыш эбире јерлерге текши јайылды.

³⁸Синагогадаҥ чыгала, Ол Симон-эшке кирди. Симонныҥ кайын энезиниҥ эди изип-кӱйӱп, оорып јаткан. Ого болушсын деп сурадылар.

³⁹Иисус ого эҥчейип, ооруга јакарып ийди. Ол јазылып, бу тарый ӧрӧ туруп, олорды ашкарды.

⁴⁰Кӱн ажып барадарда, јӱзӱн-јӱӱр оору-јоболду улусты Иисуска экелип турдылар. Ол кажызына ла колын салып алкап, јазып турды.

⁴¹— Сен Христос, Кудайдыҥ Уулы! — деп кыйгырганча, анайда ок шилемирлер де кӧп улустаҥ чыгып турдылар. Ол дезе, Мен Христос болгонымды билип турганыгарды айтпагар — деп, олорго јакарып турды.

⁴²Тӱш боло берерде, Ол чыгып, аалга јерге јӱре берди. Кӧп улус Оны бедиреп барды. Табала, олордоҥ барбазын деп, сурап турдылар.

⁴³Је Ол айтты: — Кудайдыҥ Каандыгыныҥ Сӱӱнчилӱ Јарын Мен ӧскӧ дӧ јерлерге јарлаар учурлу. Мен мыны эдерге ийилгем.

⁴⁴Анайып Ол Галилейдиҥ синагогаларында јарлыктап јӱрди.