Read Јаҥы Кереес Римдегилерге 1 Bible Online

Римдегилерге 1 - Јаҥы Кереес bible

Римдегилерге 1

¹Христос Иисустыҥ кулынаҥ, кычырылган Павел апостолдоҥ. Мен Кудайдыҥ Сӱӱнчилӱ Јарын јарлаарга тудулгам.

²Башкыда Ол Бойыныҥ јарлыкчылары ажыра бу Јар керегинде Агару Бичикте сӧзин берген.

³Бу Јар Оныҥ Уулы — Иисус Христос Кайраканыс керегинде. Ол Давидтиҥ угынаҥ кижи чилеп туулган ла агарулыктыҥ тыныныҥ кӱчиле тирилгени ажыра Кудайдыҥ Уулы деп ачылган.

⁵Ол ажыра јакшылык алып, ончо калыктар Оныҥ адына болуп Кудайга бӱдӱп, Ого уккур болзын деп, апостолдор боло бергенис.

⁶Бу калыктардыҥ ортозында слер де, Иисус Христостыйы болорго кычырылган улус, јӱрӱп јадыгар.

⁷Слерге, Кудай сӱӱп турган, Оныҥ агару калыгы болорго кычырылган, Римде јӱрген ончо улуска, Кудай Адабыстаҥ ла Иисус Христос Кайраканнаҥ јакшылык ла амыр јетсин.

⁸Элдеҥ озо Иисус Христос ажыра ончогор учун Кудайымга алкыш-быйаным айдып турум, нениҥ учун дезе бӱдӱп турганыгар керегинде бастыра телекейде јарлалат.

⁹Кудай мениҥ керечим: Оныҥ Уулы керегинде Сӱӱнчилӱ Јар јарлап, Ого тынымла бажырып јӱрӱм. Слерди туркаары эске алынып,

¹⁰мӱргип, Кудайдыҥ табыла качан бирде слерге келер аргалу болойын деп, јаантайын сурайдым.

¹¹Агару Тыннаҥ алган јайалтаны берейин, слерди тыҥыдайын деп, слерди кӧрӱксеп јадым.

¹²Ӧскӧртӧ айтса, ортогордо болзом, бӱдӱп турганыс ажыра бой-бойыстаҥ кӧкӱдӱ аларыс, слер менеҥ, мен слердеҥ аларым.

¹³Слерди билзин деп турум, карындаштар: слерге кӧп катап келерге јазангам, је эмдиге јетире буудактарга учурагам. Слерге келип, ӧскӧ калыктардыҥ ортозында чылап, слердиҥ де ортогордо ижимниҥ турултазы болзын дегем.

¹⁴Мен еллиндерге ле ӧскӧ улуска, ойгорлорго ло неме билбестерге јарлыктаар учурлу.

¹⁵Анайдарда, мен керегинде айтса, слерге де, Римде јӱрген улуска, Сӱӱнчилӱ Јар јарлаарга белен.

¹⁶Мен Христостыҥ Сӱӱнчилӱ Јарынаҥ уйалбай јадым, нениҥ учун дезе ол — Кудайдыҥ кӱчи, ол бӱдӱп турган ончо улусты аргадайт: озо баштап иудейлерди, анайда ок еллиндерди.

¹⁷Бу Јар улусты Кудайга бӱткени ажыра оноҥ кӧп бӱдерине экелип, Кудай канайда актап турганын кӧргӱзет, бичилгениле: «Акту кижи бӱдӱп, тирӱ јӱрер».

¹⁸Кудайды тообой, јаман эдип, јаманыла чындыкты јаба базып турган улуска теҥеридеҥ Кудайдыҥ чугулы келип јат.

¹⁹Олор Кудай керегинде билетенин билип јадылар, нениҥ учун дезе мыны олорго Кудай ачкан.

²⁰Кӧскӧ кӧрӱнбес немелер — Оныҥ ӱзӱлбес-тӱгенбес кӱчи ле кудайлыгы телекейдиҥ јайалганынаҥ ала иле кӧрӱнет. Олор Оныҥ јайаганы ажыра аайлалат. Оныҥ учун бу улус бойлорын актап, нени де айдып болбос.

²¹Олор Кудайды билип алып, Оны Кудайды чылап мактабадылар, Ого алкыш-быйанын айтпадылар. Карын, бойлорын куру санаа-шӱӱлтелерге берип койдылар. Мынаҥ улам неме аайлабас јӱректери караҥуйга алдырган.

²²Бойлорын ойгор деп адап, тенек болуп калдылар.

²³Ӧлбӧс Кудайга бажырардыҥ ордына ӧлӱмдӱ кижидий, куштардый, тӧрт санду тындулардый ла јылып, јорголоп јӱрер тындулардый сӱр-кеберлерге бажырадылар.

²⁴Оныҥ учун Кудай олорды јӱректери кӱӱнзеген быјарга берип койгон. Олор эди-кандарын бойлоры быјарсыдып,

²⁵Кудайдыҥ чындыгын меке-тӧгӱнге солыгандар, јайалган немелерди байлап, олорго бажыргандар. Јайаачыбыс дезе ӱргӱлји чакка алкышту, аминь.

²⁶Бу учун Кудай олорды уйатту кычаларына берип койгон: олордыҥ ӱй улузы эр улусла ары јанынаҥ берилген колбуны јектеп, ого удура кылынып јадылар.

²⁷Анайда ок эр де улус ӱй улусла ары јанынаҥ берилген колбуны јектеп, бой-бойлорын сӱрекей кӱӱнзейдилер: эр улус эр улусла уйатту немелер эдип, бойлорыныҥ азып тургандары учун бойлорында бойлоры кезедӱ алып јадылар.

²⁸Кудайды билип аларын керектебеген учун Кудай олорды саҥ-тескери санаага берип койгон. Оныҥ учун олор этпести эдедилер.

²⁹Олор чын эмес керектерле, балыр кылыкла толо: ачыркайдылар, чайдам кылык кылынадылар, кӱйӱнедилер, ӧлтӱредилер, ӧӧркӧжӧдилер, мекелейдилер, јабарлап јадылар, коптойдылар;

³⁰куурмактажып јадылар, Кудайды јаман кӧрӧдилер, бойлорын тудунбайдылар, улуркайдылар, јакшыркайдылар, јаманды эдейин деп јӱредилер, ада-энелериниҥ сӧзин укпайдылар;

³¹тенексийдилер, сӧзине турбайдылар, улуска килебейдилер, јарашпайдылар, быйан этпейдилер.

³²Анайда кылынып турган улус Кудайдыҥ чындык јасагыла ӧлӱмге турар деп билип, јаҥыс та анайда кылынып турган эмес, је анайда кылынып турган улусты јарадып јадылар.