Read Јаҥы Кереес Римдегилерге 2 Bible Online

Римдегилерге 2 - Јаҥы Кереес bible

Римдегилерге 2

¹Анайдарда, кижи, сен ӧскӧ улусты јаргылап јадыҥ ба? Сен кем де болзоҥ, акталбазыҥ. Ӧскӧ улусты јаргылап турганыҥла бойыҥды бойыҥ јаргылайдыҥ ине, нениҥ учун дезе, ӧскӧ улусты јаргылап, бойыҥ олор чылап ок кылынадыҥ.

²Анайда кылынып турган улуска Кудайдыҥ чындык јаргызы барын бис билерис.

³Кижи, анайда кылынып турган улусты јаргылап, бойыҥ олор ло чылап кылынып, Кудайдыҥ јаргызынаҥ кыйыжарым деп сананып туруҥ эмеш пе?

⁴Ол эмезе, Оныҥ улу быйанзагын, јымжак ла чыдамкай болгонын јектеп јадыҥ ба? Оныҥ быйанзагы сени кинчегиҥди алынарына экелип турганын аайлабай јадыҥ ба?

⁵Је сен кедер, јӱрегиҥ Кудайга баштанбаган. Кудайдыҥ чугулы келерине ле Оныҥ чындык јаргызы ачылар кӱнге бойыҥа бойыҥ чугул јууп јадыҥ.

⁶Ол кажы ла кижиге эткен керектерине кӧрӧ берер.

⁷Јаантайын јакшы керектер эдип, макка, кӱндӱге ле ӧлбӧскӧ јӱткӱп турган улуска ӱргӱлји јӱрӱм берер.

⁸Бойын сӱӱп, чындыкка бакпай, јаманга беринип турган улуска — чугул ла атыйланыш ийер.

⁹Јаманды эдеечи кандый ла кижиге ачу-корон ло кыйын-шыра ийер: озо баштап иудейге, анайда ок еллинге.

¹⁰Јакшыны эдеечи кажы ла кижиге мак, кӱндӱ ле амыр ийер: озо баштап иудейге, анайда ок еллинге.

¹¹Кудай улусты ылгабай јат ине.

¹²Јасагы јок улус кинчек этсе, Јасак јокко ло ӧлӱп калар. Јасакту улус кинчек этсе, Јасакла јаргыладар.

¹³Кудайдыҥ алдында Јасакты угуп турган улус акту эмес, је Јасакты бӱдӱрип турган улус акталар.

¹⁴Јасагы јок ӧскӧ калыктар бӱткен бӱдӱмиле Јасакка келижерин эдип јӱрзе, олордо Јасак јок то болзо, бойлорына бойлоры јасак болуп јадылар.

¹⁵Мынызыла олор Јасактыҥ некелтелери јӱректеринде бичилгенин кӧргӱзедилер. Мыны олордыҥ санаазы керелейт: олор бойлорында шӱӱп, бойлорын бирде бурулайдылар, бирде актайдылар.

¹⁶Мениҥ јарлыктаганымла, Иисус Христос ажыра Кудай улустыҥ јажытту керектерин јаргылаар кӱнде андый болор.

¹⁷Бат сен иудей деп аданадыҥ, Јасакка иженедиҥ, Кудайла мактанадыҥ.

¹⁸Оныҥ табын билериҥ, Јасактаҥ ӱренип, эҥ артык дегенин ылгаштырып билериҥ;

¹⁹сен сокорлордыҥ једекчизи, караҥуйда јӱргендерге јарык,

²⁰керсӱ эместердиҥ таскадаачызы, неме билбестердиҥ ӱредӱчизи болгоныҥа бӱдӱп јадыҥ, нениҥ учун дезе Јасак сеге толо билим ле чындык берет.

²¹Анайдарда, ӧскӧ улусты ӱредип, бойыҥды бойыҥ ӱретпейдиҥ бе? «Ууры этпе» деп јарлап, бойыҥ уурданып јадыҥ ба?

²²«Чайдам кылынба» деп јарлыктап, бойыҥ чайдам кылынадыҥ ба? Чалулардаҥ јескинген бойыҥ, агаруныҥ байын бузадыҥ ба?

²³Јасакла мактанадыҥ, је Јасакты бузуп, Кудайды уйатка тӱжӱредиҥ.

²⁴Айдарда, бичилгениле, слердеҥ улам ӧскӧ калыктар ортодо Кудайдыҥ ады јамандалат.

²⁵Јасакты бӱдӱрип турган болзоҥ, томдош тузалу, је Јасакты бузуп турган болзоҥ, томдолгоныҥ болбогон немедий.

²⁶Анайдарда, томдолбогон кижи Јасактыҥ некелтелерин бӱдӱрип турган болзо, Кудай оны томдолгон деп бодобос беди?

²⁷Бӱткен бӱдӱмиле томдолбогон, је Јасакты бӱдӱрип турган кижи сени јаргылабас беди? Сенде бичилген Јасак бар, сен томдолгоҥ, је Јасакты бузуп јадыҥ.

²⁸Чырайыла иудей болгоны, иудей эмес, эт-канда эдилген томдош — ол томдош эмес.

²⁹Је чын иудей — ол ич јаны андый болгоны, чын томдош јӱректе эдилгени. Ол бичилген Јасакла эмес, је Тынла эдилген. Андый кижини улус эмес, Кудай мактаар.