Read Јаҥы Кереес Римдегилерге 4 Bible Online

Римдегилерге 4 - Јаҥы Кереес bible

Римдегилерге 4

¹Айдарда, улу адабыс Авраам керегинде нени айдарыс? Бойы неге јединген?

²Ол эткен керектериле акталган болзо, мактанар аргазы бар. Је Кудайдыҥ алдында эмес.

³Агару Бичик не дийт? — «Авраам Кудайга бӱткен, оныҥ учун Кудай оны акту кижи деп адаган».

⁴Је иштеп турган кижиге јал — ол быйан эмес, карын, ол оны алар учурлу.

⁵Эдип турган керектери учун эмес, кинчектӱ улусты актаган Кудайга бӱдӱп турган кижи, бӱткени учун акту деп ададып јат.

⁶Анайда Давид те Кудай акту деп адаган кижини эткен керектеринеҥ камаан јокко кежиктӱ дийт:

⁷«Јарамас керектери ташталган, кинчектери јабылган улус кежиктӱ.

⁸Кудай кинчектерин тоого албай турган кижи кежиктӱ».

⁹Анайдарда, бу кежик томдолгон улустыйы ба, эмезе томдолбогон до улустыйы ба? Бис дезе Авраам Кудайга бӱткени учун оны Кудай акту кижи деп адаган дейдис.

¹⁰Качан адаган? Томдолордоҥ озо бо, эмезе соҥында ба? Соҥында эмес, томдолордоҥ озо.

¹¹Ол соҥында томдолгон. Бу темдек ол томдолордоҥ озо Кудайга бӱткени учун акталганын кӧргӱскен. Анайып Авраам бӱдӱп турган ончо улустыҥ адазы боло берген. Олор томдолбогон до болзо, бӱдӱп турган учун, Кудай олорды да акту улус деп адап јат.

¹²Ол анайда ок томдолгон до улустыҥ адазы боло берген. Олор јаҥыс та томдолгон эмес, је улу адабыстыҥ — Авраамныҥ јолыла барып, ол томдолордоҥ озо Кудайга бӱдӱп баштаганы учун бӱткендер.

¹³Кудай Авраамга ла оныҥ калдыктарына јер-телекейди энчи эдип берерим деген. Ол бу энчини Јасакты бӱдӱргени учун эмес, је бӱдӱп, акталганы ажыра берер болгон.

¹⁴Јасакла јӱрген улус энчи алып турган болзо, бӱдетени темей, берген сӧстӧ учур јок болор эди,

¹⁵нениҥ учун дезе Јасак бойыла кожо Кудайдыҥ чугулын экелет. Кайда Јасак јок, ол анда бузулбайт.

¹⁶Оныҥ учун Кудайдыҥ берген сӧзин Ого бӱдӱп, алып јадылар. Бу сӧс Авраамныҥ ончо калдыктарына Кудайдыҥ быйаны ла ижемјилӱ эп-арга болуп јат. Јаҥыс та Јасакты бӱдӱрип турган улуска эмес, је Авраам Кудайга бӱткени чилеп бӱдӱп турган улуска. Авраам — ончобыска адабыс.

¹⁷Бичилгениле: «Сени кӧп калыктардыҥ адазы эдип койдым». Ол ӧлгӧн улуска јӱрӱм береечи, јок немени бар деп айдаачы Кудайга бӱдӱп, Оныҥ алдында адабыс болуп јат.

¹⁸Иженери јок то болзо, ол иженип ле бӱдӱп, «Сениҥ калдыктарыҥ андый кӧп болор» — деп айдылганыла, кӧп калыктардыҥ адазы боло берген.

¹⁹Јӱс јашка јууктап калган кижиниҥ эди-каны ӧлӱмтик деп, Сарра карган, бала таппас деп аайлап та турза, ол Кудайга бӱткенче болгон.

²⁰Ол Кудайдыҥ берген сӧзине алаҥзыбай, бӱтпей турганын кӧргӱспеген. Карын, оноҥ тыҥ бӱдӱп, Кудайды мактап,

²¹Ол кӱчтӱ, берген сӧзин бӱдӱрер деп, бек бӱткен.

²²Оныҥ учун Кудай оны акту кижи деп адаган.

²³«Акту кижи деп адаган» деген сӧстӧр јаҥыс та ого эмес,

²⁴је биске де бичилген. Бис те, Иисус Христос Кайраканысты тиргискен Кудайга бӱдӱп турган бойлорыс, акту деп ададарыс.

²⁵Иисус бисти акталзын деп, јазыктарыс учун ӧлӱмге берилип, тирилген.